Thursday, July 23, 2009

Dr. Thang Cin Lian te Mopawi Ding

Posted by: "Hau Za Cin" suante2002@yahoo.com suante2002
Thu May 15, 2008 5:25 am (PDT)
Kalai, kalai, zi nei ding e? Tu'n? Phingphing! Phalbi beita hilo maw; khuakhal zong a bei ding hita a, tuuk guah hong luang ding hita hiven. Hui-ha!! Na sawm teitei uh-leh-lah bang i cih dia..... LUNGDAMPIHNA KONG KHAK HI cih loh i gen ding om nawn kei ei U Lian. Kisaisak hong ci ken la, na theihsa ahih hang May 19, 2008 niin na theihsa thu tampi mangngilh ding na hih manin kong vaikhak nop khat om hi. Tua Cope Memorial Baptist Church Biakinn gei a Phuitong Liim ah na tu kei un maw. Ahang pen tu laitak Phuitong paak hun hilo a, a gah zong min khin zo a, a gah zong pulh khin in lei lak ah kia khin in a nuai ah vok, bawng leh zusa, vasa te in a tang (seed) te nene ta uh hi. Tua manin a teh, Phuitong tehte (leaves) te lungno in ne a, a nuai ah pulh in i ci tungah hong tu leh i ci thak thei hi. Phuitong Liim ah na tutkhawl uh leh lungme na tuak kha ding uh a, pumpi ci thak ding hi. Lungme tuak a nop loh dan na theihsa hi ven maw (na theih nai kei leh zong tua ni in na sin kha het kei in)...... tua zan ihmut theih loh khak ding lauhuai hi, lauhuai hi mai (ihmut bel...... ) Phillipines na omlai nikhat zankhat sawt na sak mahmah hunte tua May 19, 2008 zingsang nai 9 ciangin na mangngilh dikdek dinga, tan 10 result suak cianga, 'tua sangin na hahkat zaw leng, tua sang mark tam ngah zaw mah ding hi veng maw' i cih lungsim hong suak in, lungzuan zatam tamzaw na thuak kha hi leng tuni Ni suak mahmah hih sangin nakpi takin etlawm, ngaihbang, romantic, hoihzaw thamtham ding hiven maw na ci peelmawh ding hi. Tua tak ciangin na lupna tunga nangguak khitui luang pelhpolh a na ngaihsutte, na mitkha tawh na bawl tawmtawm te a takpi in muhtheih in hong pai dinga na upmawh sangin a tamzaw mipi hong lungdampihte tawh Topa phat in na laamlaamta ding hi. Tua hun nuam ah kei zong ka pumpi takpi tawh hong kihel thei in, ka mit dim tak tawh hong en in na nupa un hong mu in, hong khutlet in kong lungdampihna hanga ka lungdamna kam tawh ka gen siam loh khempeuh zong ka maitang na muh ciang na telzawk dingin hong lak thei leng ka ut mahmah hi. Ahi zongin i omna mun leh mual in hong hal a, tuipi in hong hal ahih manin ka lungsim tawh kong kihel hangin ka tak hong kihel thei lo ding ahih manin nong maisak leh nong theihsiam ding kong thum hi. Ngaihno khutnel nik nek na let ciang na khut kisai litlit in na khua-ul neel a luansak khak leh zong na mainul tawh nul ziahziah lel inla, na pakbawk piak ding khawng a kisin khiat naunau khak leh zong tua paakte a tolo hizaw lel ding hi, phamawhsa vet ken. Mopawi hunzatna a sawtluat ding leh sun in zomvet in, nitak lamin zo khin leng hoihpen hi. Zan hun pen Pasian in tawlngak nanga hong bawlsak hi ciin Pastor pa in tuani in themkhat hong uang gen deuh mai leh phamawh dia hia. Ahang pen tulai zan tom mahmah a, sun sawt mahmah hi........ he he...... tua aive phalbi beita i cihcih! Tam gelh leng zong na lungsim ka laigelh ah om nawnlo ding (ni dang bang nawnlo ding) ahih manin hihzah tawh hong khawlbawl ning. Hun nuam, hun siangtho hong zang un. Topa awi in nupa nuam hong suak un. Tanu tapa tawi in Ama'n hong siam hen. Lungdampihna lianpi tawh, Hong phawk, Hau Za Cin

No comments: