Ahoih mahmah amanpha mahmah khat akingah khiat nading in thazung tha- tang kisuk ngiat, haksat na, lauhuai na tampi tak aki phukkhak ciangin ahoih agil kingah khia pan hi. Pilna siamna thazung thatang, khua-ul sisan luang-khia ziahziah mahleh gil cihtak mahin gilgemgam in to mahmah pah hi. I pumpi bek tawllo in ii lungsim mahmah zong hong vul niknek ciangin alimci mahmah agah akilo kha hong hipan hi.Tua agah pen alimcit mahbangin aduh adei tam, alo nuam tam mahmah ahih manin aci dingin kila ciat aa pung mahmah hi.Aki lemden, aki tawngngei kieuhkeuh lo innkuan, unau sanggam, lawmta, pawlpi, kipawlna atuamtuam veng leh pam, khua leh tui pen omlo hi. A tawntung in kithutuak in omkhawm gamta khawm hialhial den cihbang om ngeilo hi. Khat veivei ki tawngzel, ki thutuak takin nasem khawm hialhial zel aa, hihbang ninia tengtawh ni leh kha te kikantan to hiathiat zel hi. Hihpen leitung nuntak zia leh leitung mite huihnun zia ahi hi.Ki thutuak na leh ki lemna pen namkhat bekin aom hangin, ki tot kiselna ahih- leh nampi nih in kikhen suk thei hi. A khatna ah, deihsakna taktak tawh thu leh la tungtawn in kitot kiselna, a nih na ah, muhdah etsat na, hazatna leh simmawh neumuh zahko nate ahi hi.Pawlkhat te in thuzaknop khempeuh thupi leh thu manpha sa uh aa a zaknop huai thu leh la te bekmah lunggulh tawntung uh hi. Ahizong in thuzaknop khempeuh thu manpha leh thu laigil nahikhin tuan peuhmah lo hi. Tuamah bangin mitawh akitawng geilo akisel ngeilo mi pen mi manpha mi dik zong nahikhin tuan hetlo citciat hi. Mi muhna mi theihna te thusim sak lo in ama muhna lian bek thu asa den kuamah akuppih nuamlo mi pen mi dik kici thei tuanlo ding hi. Mi te muhna theihna te leh ama muhna ama theihna te gawmtuah zel, etkak zel in akhialhna munte ah, khial ing ei aci mi pen thu khinkhai thei pen ahih mah bangin mi picing micim, mi hampha leh mi dik taktak ahi hi. Ama muhna lianbek dik asa, tang asa tawntung, ama aa lianbel hi asa geugeu, mi te theihna mi te muhkhiatna te athu simsak hetlo, aki theisak aki diksak tawngtung mi pen mi picing pen hi, kici ngeilo ding hi.Thupai tungtawn in gam leh minam, khua leh tui ading lungsim laigil taktak tawh akitawng akisel ngiatngiat te pen mi ginalo, mi gilo kici theilo hi. Bang hang hiam cihleh amau te in deihsak na laigil taktak tawh thu leh la khat peuh sel tinten uh a, mitampi asuukhalo ding anawngkai sak hetlo ding te ahi uh hi. Pawlkhat te in thu asel uh ciangin mimal in cinuam hetlo uh aa, ahehna te uh kuitung sak in tungnun tuhnuam uh ahih manin akilawm hetlo kammal te leh mitampi lai natna dingin Beh, Minam, Pawlpi, khua leh tui mintawh tawng gawp kawkgawp uh hi. Hih bangin mitampi asuukha bullawhna kammal te in Minam sung tawknawi gawp tawntung hi. Mitampi thanem na, lainat na ding leh khasiat ding te sangin mimal ngiat aa kikawk na pen asia lakpan ahoih pen lawmpawl ahi hi. Thuhoih la hoih apiangkhiat ding alunggulh taktak te in mi tampi lainat nading sangin mi tampi hamphat nading phattuam nading alungsim tawngpan in lung gulh uh ahih man un, ki pawlna, beh leh phung, khua leh tui min in pholak vua vua hetlo uh hi. Deihsak na taktak tawh thu leh la gen ahih manin khat veivei ciang bangin kamkhauh mahmah tawh kibang hi. Akam pan aa aluangkhia kammal hilo a, alungtang tawngpek pan aa aluangkhia hiauhiau kammal ahih manin apaupa ading kamsia kamkhauh mahmah ahiphial zongin azakha angai kha te adingin khum mahmah teitei hi. Agen ma saksak mi khempeuh bilsung ah luang detdet lel hi. A lunggulh ngiat te ading in athuk akha zong kiphawk khaman lo aa, alungkhia masasa kitangtawm pahpah hi.Mipil mi khangto gam te ah, gam makai te thu leh la akikup uh ciang un, a hoih ding deihlua uh ahih man un, kisel tangtang kinial tangtang uh aa a tawpna bang ah kilai phialmawk uh hi. A kitot akisel nate uh, Newspaper, Tv cihkhawng ah mipi te theihpih dingin tangko, alim tawh bangtawh suaksak pah zihziah lel uh hi. Mimal khatciat angaigsut nate uh puulak khia diamdiam uh a muhdan san'dan khat leh khat akibatloh uh hangin, khat leh khat muhdah na, ki elna leh kinuak cihte omsak tuanlo, neituanlo, vomtuanlo uh a, gam leh minam ading in lungsim laigil taktak tawh nasem khawm ziahziah lel uh hi.Khatvei China Press ka etkhat bang peuhmah thu leh la kiniallua kisa kilai ngiat zen uh hi. Khatpa bang pen nakhehlua kisa dawhkaan tungpan akhuttum zial phikphek zawzen in ah, anuai aa a ompa tumsuk dingin kithawi aa alawm te in len ngeingai uh hi. Gam leh minam ading thu leh la kisel aa aki tawng uh ahi uh hi. Hih thu leh la tungtawn in ngaihsun na tampi tak ong ngahkhia sak hi. Itna leh deihsak taktak in hibang himawk amaw, Zomi te hihbang dan dinmun khat ah om hileh makaai lam te zunko ekko in kiko dikdek zending ( azadah ii omphial zongin ), cih kangaihsut teh Zomi te khuamuh dan, ngaihsun dan te tawmkhat kisam lai ahi tam ci-in kei ommuang in ka lungngai theizel hi.Zomi te aki tawng akisel khat omleh, asialam bekbek in kila lualiang lawmlawm kasa hi. Amun amaul, athupai te en in ngaihsun thei le-hang, ii khantoh nading lampi khat ahong ii hikha thei ding hi. Thugil lagil, thu manpha ii deihleh nial cihtak mahin ki nial tangtang le-hang, ahoih penpen alaigil penpen aki ngahkhia ahi hi.Tu laitak Zomi te kikaihtuah na, thugil lagil atuamtuam thusia thupha namkim akizak tuahna ahi, ZONET bang pen Zomi tampi tak te in kitot kisel na in mu uh aa thupi salo uh hi. ( Minam vai ahilo leh mimal ki neumuh kithusim lo nate lobuang ) Minam lungsim leh apicing lungsim te aki neihnai lohlam nakpi tak in kilang mahmah hi. Muhna toilailua maw ahih keileh minam lungsim, lunggulh na taktak kinei nai vetvet lo maw, tua ahihkeileh alimci apicing lungsim laigil taktak kinei zo nai mahmah lo hikha ding hi. I lunggulh ii zaknop thu leh la te in ii minam ading phattuam na hongpia ding, ii minam hong khangto sak ding tam hetlo hi. I zaknop te pen tu laitak thuthang hiding gualkhat gualnih bek phading, atam dendan asau deda hilo ding cihbang peuh hitazen a, hih bang keukiau khawng tawh minam liankhat a ding in ametna aphattuam na leh akhangtoh nading lampi malkhat mahmah zong om kieuhkeuh lo hi.Suang manpha khempeuh leisung tawngthukpi pek aa a om ahih samloh hang in atamzaw pen leitawng pekpek mah ah, omzaw hi.
Note itna sungah,thaw thawn.
No comments:
Post a Comment