Posted by: "Paul Khaipu" paultkkhai@yahoo.com paultkkhai
Wed Aug 6, 2008 6:42 pm (PDT)
Guaite, Chin/Zomi deih leh deihlohna hi kei. Athu omdan ong kawkkhia nuam ing. "Zomi picing zolo, recognized ngahlo/neilo ahihman Chin mah akizangh hi" i cihcih laiteng Zomi pen cikmah hun in picing lo dinga, zong koimah ah recognized om ngei loding hi. Akizangh lo ci in akizanghteng bekbek taw-phah leng tua akizangh nai lopen cik ciang kizangh nawn ding? Zomi kideihsakteng mah in Zomi zumpih ngamlo lel in ka thei. Zomi cihpen minam thupi leh minam lian hi a, ahizong Zomi sunga om namneuten asusia leh aneusuaksak ahizaw hi. Tua namneuteng in nampi min tawh kalsuan ding pen haksa sacait uh hi. Ahizong nampi min lah paikhia tuan thei samlo. I minam min pen Englishten tua ong ci ahihman, Kawlten tua ong ci ahihman, tua mah zui ni cih ding zong hituan sam hiam? Min tawh buaibuai kei ni i cih leh zong tua ong kipia min mah tawh lungdamtak a nasep ding hipah lel hi. Minam min adiktak pen mah zangh nuam hang i cih leh lah tua mah bulphuh in sepna khempeuh ah minam min dik pen mah tawh sep ngiatngiat ding ahi. Ahun zui in minam min laihkawikawi cih pen minam itna man/dik hi lo hi. Zomi ki tamzat semsem leh Zomi kitheisemsem dinga recognized na omsemsem ding cihna hipah hi. Mailam ah i laibu bawlnate khempeuh leh thupi dang tuamtuamte ah zong Zomi mah i zat kul ding hi. Ei mahmah in i zat masak ngam kei leh midangte ong zatsak ding lamet om lo hi. Mi recognized ding leh mi zat ding i ngak leh bel ngaksawt kha thei ding hi hangh. Bangmah amawkna kingah om lo a, Zomi cih zong tuamah bang hiding hi. "Zomi" cih akizat nading leh miten Zomi ong cih na ding i deih leh a Zomi deihteng mah in Zomi i pahtawi masak ding ahihi. Nidang kum 20 malai in Mizoram State cih om ngei lo hi. Ahizong omsak nopna lungsim leh nuntakna piakkhiatnate hangin tun mitmuh in om a, kiphatsakpih mahmah lel uh hi. Aom ngeilo ahih man om lo/omthei lo ding cihna hi lo hi. Zomite pen Zomi cih tawh lungkim zo loden i hihman i gualzawh zah ding zong kigualzo lo den hi. I ngah ding kilawmteng zong kisuplawh hi. Zomi tawh "Full Stop" cithei leng i ngaklahlah hun leh nite ong naizaw ding hi. "Zomi ka hi" na kicihnak leh midangten zong "Zomi na hi" ong cipih lel dinga, Tedim-Chin ka hi nacih leh zong "Tedim-Chin na hi" ong cihpih lel ding hi. Na vawh bang na at ding cih hilel hi. Zomi na vawh leh Zomi i at kik dinga, mindang i vawh leh lah tua mindang gah mah i lo/at kha ding hi. Zomi hoih na ding leh siat na ding ei mimal tung kinga hi lel hi. Asia/Apha khempeuh ah Zomi i cingam diam? Kuakua in bangbang gen ta leh nang deihna leh nang khensatna tawh na nuntakna na nuntak ding hi a, mi deih bang na nuntak leh na nuntakna in man nei lo hi ding hi. Tua ahihman sanggamte aw, bang min zangh ding cihtawh i buai sang in nang leh ke'n bang min buaipih i hiam? cih ngaihsun zaw ni. Tua min ka zatna(promote kabawlna) aom hiam? cih kingaihsun pha ni. Banghang hiam cih leh minam cihpen mimal kigawmna hi a, tua minam sung om mimal khat ciat in tua minam min ong zatciat tak ciang minampi ong suak ding hipan hi. Na minam min nazat kei leh tua min pen minthang ngei lo ding hi. Deihsakna bekbek tawh,
No comments:
Post a Comment