Sun May 27, 2007 10:27 pm (PST)
Zomi te mi thupi i hia, mi zawngkhal: Gamkhat lutang in a kizang Zomi Pu Vum Kho Hau min i zak ciangin Zomi te mi thupi hi hang ciin i lungnuam hi. Ahi zongin gentheih luat manin a innlum, a lo lum ah teeng theilo in nek ding silh ding ten ding zongin vakkhia in, nu leh pa lawm leh gual zong hopih manlo in natna thuak in leitung nusia a, muh bat loh theih batlohna gam ah kivui hi cih i zak ciangin Zomi te mi zawngkhal i hi hiam ciin i ngaihsun hi. A taktak in Zomi te mi hampha i hi hi. Bang hangin maw?A haksa, a nuam ah kikhawl in kiholim in iki huh den pen lungnuam takin leitung nuntak tomcik i zatdan a manpha hi. Tua banga kikhawl leitungah mi nam tampi om a, Zomi te khat i hi hi. Leitungah "mi lungnuam penpen te" ciin kiciamteh hi. India gam zong tua banga mi lungnuam gam hi in UNO in ciamteh hi. Leitung khantohna neucik zong i ciapkhak lohna pan i mit keuhto a, khuavak i muh pan kum 100 sungin leitung khantohna a sangpen pen zong ciamkha thei a, i khantoh pen i ngaihsut ciang Zomi te mi thupi hi i ci lo thei kei hi. Bang hanga hiciang tung to thei i hi tam cih i ngaihsut ciang i biakna leh thu up, thuzuih hang hi kha peuhmah ding hi. A dang tampi om inteh, tuate research hihte leh thu kan mite in hong gen leh. Thupi hi hang, mi nuih hun in kinui thei, mi kah hun in kikap thei, mi kalsuan bangin kikalsuanta icih hangin i zawn luat manin pilna, ciimna, theihna i khol thei na kei hi. Tua in zawngkhal i hihna khat hong lak leuleu hi. Zomi a zawngkhal i hi hiam?: Gilvah taka nisim nekding i neih loh pen thutuam hi, anngawl lo a i om pen a lungdam huai hi. I ngawl hun a om khak leh Topa in hong kem henla. Minam gilkial penpen kihi lo hi. Nisim nek ding zong a neilo Zomi sanga a zawngkhal zaw mi tampi om hi. Zomi te in Pasian i phawk man ahi tam. Zomi sanga gilkial zaw, genthei zaw, haksa thuak zaw, dangkeu zaw tampi om hi. Africa gamah, Asia gam ah, Latin America ah Zomi sanga gilkial zaw tampi i mu hi. Tampi om, genkhin zo kei ni. Zomi aw, lungdam in: I kimuh ciangin maitai tak in khut kilen in i kiho a, i kikhen ciangin nang tawh kimuh ka lungdam ciin thupha i kipia hi. Tua te sanga lungdam huaizaw tampi om hi. 1. Pilna siamna i sin theih man in Zomi aw, lungdam in. 2. Pasian hing bia i hih manin Zomi aw, lungdam in. 3. Mi zawngkhal pente hilo i hih manin Zomi aw, lungdam in. 4. Mi nuamsa pente hilo in Pasian a bel den mite i hih zawk manin Zomi aw, lungdam in. 5. Sia leh pha khentel thei minam ihih manin Zomi aw, lungdam in. 6. ............ ......... ..... Zomi aw, lungdam in. (tampi omlai, behlap theih lai ka cihna hi.... na ut zahzah behlap in)A zawngkhal pen hilo, a nuamsa pen zong ahi lo, A lungdam Zomi, Hau Za CinPhuitong Liim
No comments:
Post a Comment