La sakkik:" Innsung nuam zaw, Vangam nai pen a hi,PA te a di'n, LAL gam a hi,NU te a di'n, THUPI na pen a hi,TATE a di'n, PARADISE " La sa: Zawllian naupang te, a series ( khui) min theilo.Laphuak: Min theilo ( A thei a om leh hong gen un)Lamal : A vek in thei zolo.Hih laphuak mi pen bang ci mi, bang ci bang innkuan sung pan a kipan hiam cih ka theih loh hangin, hih la pen a bat phuak hi lo ding in ka um hi. A ma kipatna innkuan sung leh a ma kim leh pam a om innkuan tampi te ( a hoih leh a hoihlo) etkak a kiphuak la hi ding hi. Innkuan sung pen mihing te a ding in nuntak kipatna mun bulpi pen hi a, lampi hoih leh lampi hoihlo zuihna ding kalsuan masakna mun a hihi. Innsung nuam in cidamna leh khansauna thupha te kipatna mun khat a hi zah in, innsung nuamlo in a theng theilo guah cinn leh a dam theilo guh natna bangin kah leh mau kipatna mun khat mah hi veve hi.Laphuak mi in " Innsung nuam pen vangam" tawh na gen teh hi. Vangam pen " Huatna, ennna, leh lungkhamna mittui" te om lohna mun, lung deih teng tuili bang a cinna mun a hihi.A manpha suang nam (12) tawh kizem in sun nitum leh zan khua mialte om lohna mun hi a, mi khempeuh sun ni tang bangin a tan na mun a hihi. Mi khempeuh in lungnopna, maitaina leh kisapna omlohna mun a hihi. Innsung nuam pen tua bang mun hi a, mun dang lunggulhna ding om lohna mun a hihi. Tua bangin, a lehlam khat pan gen leng, innsung nuamlo pen " gawt mun ( hell) gam tawh kibang ci a, a gen tehna khat a hihi. Hell gam pen " lungkhamna, huatna leh dah leh mauna mun tawh kidimna a hihi.La phuak mi in, " Innsung nuam a om PA pen a dingin a LAL ( kumpi gam)" tawh na gen teh hi. Kumpi gam uk kumpi pa ( Lal pa) pen a gam mite in zahtak in a thu mang uh a, a paina khempeuh a zahtakna kipia hi. Gammi te in kumpi pa a zahtak bangun kumpi pa in zong a gam mite it in, a kisapna te uh, nik ten puan silh, an nek tui dawn kita sam lo dingin pia tawn tung hi. A gammi te a ding thu khualna nei a, lungsim leh pumpi sitlo in na sem a hih manin zahtakna kipia tawntung hi.Inn sung nuam pen, " Nute a dingin THUPINA" ci'n na gen leuleu hi. Hoihna, cihtakna, muanhuaina, thu khualna, nasep hanciamna, gamtat khuahek kikep, kidopna, kam khumna leh a sepna thaman khempeuh thaman kipia a hih manin, a manpha kumpi nu lukhu a hi " Thupina" ki khu sak hi. A mah omna hangin innsung picing in, kilawm a, innsung khempeuh kilawm in thupi sak hi. Vang nei sak hi. La phuak mi in, " Innsung nuam pen Tate a di'n PARADISE" na cih lai hi. Lungkimna , nopna leh kisapna, lunggulhna khempeuh kicinna hi a, mun dang lunggulhna om nawn lo hi.Duh leh deih teng kicing a, bang mah dang kisapna om nawnlo hi.Tua mun ah naupang te nuamsa uh hi. TKSA thupi khat ah, Innsung nuam bawl khiatna ding lampi zuih ding hamsa kisa tek ve'n, mataw!!!!!!! !!!!
A nu ding a hoih mahmah zon ngai cihna ahi ve maw? Koi ah a om tam maw?? He he.... ciamnuihna hi sam e tua bel. Pa Suan te gelgel hong gen bang in kei zong hih la hoihsa mahmah ing. Innsung nuam mahmah khat a khangkhia tano lungsim leh innsung hoih mahmah khata khangkhia tano lungsim kibanglo a, innsunga haksa mahmah khata khangkhia leh innsung suakta hetlo khat pan khangkhia lungsim kibang theilo ding hi.Tua manin mihing khat ama pianpih lungsim tawh a sep theih, a ngaihsut theih a sangpenpen a tun theihna dingin innsung hoih kiphamawh ding hi. Lungsim suakta taka ngaihsutna, itna tawh a kihuai nuntakna, thutak tawh a kikeem tano, thusia a kideihlohna inn sung, ama hihna leh a pianna hang a theician dinga kipattah khat mihing hihna dingin innsung gina kisam hi. Tua bang innsung neih theihna dingin Jesu Christ hong sinsak, hong gen, hong vaikhak thute tawh kituak a i kipattah leh tangtung penpen hi. Tua manin Christian Home, Christian Innkuan cih pen a thupi penpen in a ki ngaihsun ahi hi. Zomi innkuan pawlkhat nidangin Christian Innkuan a suah theihlohna a hang om dingin ka um hi. Gehtehna in Pa pen LAL lua, thu nei lua, Nu te thu Thu in kisim sak lo lua, ta te thu Thu in kisim sak lo lua leh Numei leh Naupang thu ahih naak leh thudik ta teu zongin over rule ding, sikcip ding, pampaih ding, kisanglo ding cih dan a om khak hun om kha ding hi. Tu hun ciangin tua dana kisikcipna, ki pampaihna leh kithusimsak loh luatna te a beibei hi ta ahih manin a lungdam huai hi. Lungsim kithei taka kipattah ta cihna hilo dia. Hau Za CinPhuitong Liim
No comments:
Post a Comment