Friday, November 5, 2010

NUTE NI

Posted by: "hang dal" hangkhen@googlemail.com
Thu Mar 26, 2009 4:38 pm (PDT)

"Jesu in, "Pasian' thu za-a a mangte in KA NU, ka sanggampa, ka
sanggamnu ahi uh hi," a ci hi." (Luke 8:21).

Ka pilna tualniam luat man ciding ka hiam..ka laisim tawm lua ciding
ka hiam.. khat zawzaw hi in cin, ka gen nop in Leitung bup "NUTE NI" a
ki bang gai sa in pulpi tungah tuni "NUTE NI" leitung bup ah ki zang
hi ka cih zaizai,,, ka theilo man nahizaw in ka maizum tha bang hong
suak zawzen hi. UK ah "NUTE NI" pen nungnipi 22.03.2009ni ki zanghi.
Bangni bangkha i zang zong in "NUTE" thupit na kiamlo a hih man in
"Mary' Lungsim Puak Zia,leh Nuntak Zia" tawm kikum leng ut ing.

Abraham' thupha ih cihcih mah bang in Mary' thupha zong eitungah hong
tung thei mahmah ding in upna ka nei hi. Mary pen tuni in nang leh kei
mah bang in leitung mi khat mah ahihi. Ih ki lamdan na omlo napin, a
man Pasian maipha a muh banah, "Thupha la dam / Sandan" na siam mahmah
hi. Hun khatlai in ka ngaihsut na ah.. "Abraham te, Topa Zeisu nungzui
te, Topa Zeisu nu Mary cihte"... mituam dangngiat hi in a mau thupha
ngah bang ei te lellel in ngah thei buanglo ea. ci a, khuttum a zial
ngam liang pa khat ka hihi. A hi ziong in "Pasian itna in deidan tuam
neilo" cih telpi in ka tel teh..aw hithei mah in cian cih upna ka ngah
hi.

"Zeisu NU" cih thupha pen ei mit pan enlo in Zeisu (Pasian) mit muhna
lam pan en leng..Khan vei Zeisu in Pasian gam lungdam na thu tangko in
mi tampi in a nung zui in a thugen nangai demdam uh hi.Tua lai takin
mi khat in.. hey Zeisu!! inn pualam ah na nu leh nasanggam te in hong
kankan uh ei a va cih leh..Lawmpan( Zeisu) a kim a pam hong en pempem
in ka nu ka sanggam te kua a hiam?? Pasian' thu za-a a mangte ka nu ka
sanggam hi ci in mipi hong kawk phei mawk hi..Hallelujah. .Hih thupha
na deih leh kingah thei lua hi ci nuam ing..

Khat vei leuleu Zeisu in Thunget ziading gen in..dawi gilo te howlkhia
ziahziah..banah dawi kihuai te in a omna ding muzo kei leh hong ciah
kik thei cih thu a gen laitak in.. mipi lakpan numei khat in..heyyy..
"Nang hong paii gil leh na teep nawi in thupha a ngah ding hi" ci-in
hong kiko zelzal leuleu hi.. bang ci leuleu ei ta?? "Jesu in, "Pasian
thu za a, a mangte in thupha a ngah zaw ding hi,"(Luke 11:27,28) cih
san leuleu hi..

Hih thu kong genteh Zeisu nu "Mary a hiih na" a kai-niam nuam hipeuh
mah lo zaw in.. Zeisu tungtawn in Pasian hong et na lam pangpan ei leh
lei ki en kik in..Pasian itna,Pasian hoihna,Pasian maipha ngah thei
mahmah dingte hi hang cih in lungsim ngah sut na te Pasiam lamah hong
kaito nuam ka hi zawhi.

Hih thu ih lungngai kawm in thupha ih cih pen hong kipia tawm ding,
hong kibawl sak tawm ding hilo in a omsa, hongkipia sa thupha te ih
san ih lak siam ding thupi hi.(Kha thupha a hi gupkhiat leh leitung
thupha te)

A ETTEH HUAI MARY THUPHA LAKZIA SANZIA KAL "5" TE.

1.Lungsim siangtho nei...Leitung thupai zia leh muhdan te tung tawn in
a ma muhdan lungsim siangtho tak in na pulak hi. Hih pen a nial hilo
in a ma lampan a hitheilo zia te pulak na a hihi. "Mari in, "Hih thu
in bangci pian ding ahi hiam? Pasal ka nei kei hi,"(Luke 1:34) ci in
dong kik hi. Hih cingbang nalianpi sem ding in, thupha lian sang ding
in kei heuh hithei peuh ma ding maw?? cih dot kik na a hihi. (Hih tawh
kibang in Sarah zong nui cihi.)

2. Kinian khiat..Pasian gelna thupha a tangtun nading in a ma muhdan
leh teldan te hemkhia in, kiniam khiatna tawh Pasian sawlna mang hi.
"Mari in, "Pasian' sila numei ka hihi, nangma thu bangin kei tungah
hong piang ta hen,"(Luke 1:38) Khat veivei Pasian deih na thei gega na
pi hang in manding peh haksa mahmah thei mawk hi.(Hih tawh kibang mah
in Zeisu in zong a mi hing hihna tawh a dawnding haipen kita mahmah in
3vei vilvei..thungen in "Keima deihna bang hi kei hen; nangma deihna
bang hi ta hen,")

3. Pasian tung lungdam ko in phatna la sa.. Mary in Pasian phatna la
sa hi. (Luke 1:46 - 55). Pasian thupha ihsan ni in Pasian tung lungdam
kona la sasa ni sa kiki ni.David gual zawhna thu sim zong hi mah a
hihi.(Hih tawh ki zui in dahpen lai tak lungkham hun laitak in zong
Job leh Habakkuk te mah bang in engtat na leh leh tat na tawh hilo,
lungsim siangtho tak tawh Pasian phat veve ding ki sinni)

4. Pasal thu mang..Mary in a lawmpa (Josef) thu kiniam khiat na
taktawh mang den hi. Mawhsak na leh hawmtawh na kam zanglo hi cih ki
muthei hi.. Bangci pasal na zintun na ding zong muzolo.. zite nausuah
na dingtak pi zong ginatak a vai hawm zolo ci hetlo he leh ki lawm.
Naungek tawh khual zinkhia ding in zan kimkim in kithawi khiat pihden
hi. Pasal' thumang zi Pasian in mangngilh ngeilo hi.( Hih tawh kibang
in Sarah bang in a pasal Abraham' thu a mandan lamdang salua ing..ei
hi leng " Milak ah nongdai pih ngamlo ka zi aw ci a nongsap ngamlo
cici ka mai ding hi hang.) Pasal te thu manding ki sin pahpah lai dih
ni.

5. Pasian thu lung ngaingai (meditation) . Tuu cing te gen Pasian na
lamdang leh vantung pi teh phat ziahziah na thu te khem peuh "Mary in
ahih leh, tua thute khempeuh ciamteh a, a lungsim sungah a lungngai
hi."(Luke 2:19) Thu hoilam bek hilo Pasian min tawh thuak na lamding
zong lung ngaih huai hi. Mary in a tapa Zeisu naupangno nithum sung
mansuah hi..a lunggim dan ding kingaih sunthei hi. Nithum khit teh
Biak innpi sungah a muh phet in..Siampi Simeon in.."Ahi hi. Namsau in
nangma lungsim hong sun ding hi."(Luke 2:35) kammal te Mary lungsimah
kilo kik deudeu ding in um mahmah ing. A hi zong in "...A nu in hih
thu khempeuh a lungsim sungah a ciamteh hi."(Luke 2:51b). (Hih thu
mah tawh Moses in Joshua na hantawh hi. Davil gual zawh na thusim khat
zong a hihi..Mi nuamsa ih cih in....sun leh zan in Pasian thu a lung
ngaingai mi a hihi.)

A sim mimal khenpeuh tung lungdam na hong ko phapha ing.

Thungenni:

Ko leitung mi te khat mahmah zong deidan tuam neilo in thupha leh itna
hong lak a hong pia TOPA natung ah lungdam kong ko hi.
Ka sungah siat theina a om hiam hong en in la.. tawntung thuman lampi
ah kei hong kha tawntung in maw. Zeisu, mintawh. AMEN.

Rev. Hang Khen Dal
Jesus Care

No comments: