Posted by: "Hau Za Cin" suante2002@yahoo.com suante2002
Sat Apr 18, 2009 9:49 pm (PDT)
Kennedy Space Center ah - 1:
University of Florida ah Electrical Engineer sangkah laitak Tg. Kai Za Thawng (Thawngpu) s/o Pa Thang Khan Dal tawh March 15, 2009 zingsang nai 5 in ka lupna uh pan zanpuan lum hit-hit leemkhia in tuma kum 40 hunlaia leitung a phawng Khapi tung kahna mun Kennedy Space Center (KSC) en dingin Florida tuisiang tawh ka Zomaitang ka phiatsiang khit uh ciangin 'zing niang' (breakfast) takpi zong ne man nawnlo in Japan Car Honda Accord tawh 'vil' sa in ka tup ka sawmna uh ka delh vingveng uh hi. Japan mawtaw nangawn a taw ah meikhu vitvit lel hi! A sungah Zomi tuang hiven.
"LOST MOON" cih laibu ZONU TONGLUAN thukizakna advisor Sianu Don Ngaih Lian in Zomi World Cup USA 2008 laia hong piak zong kiphawk man nawnlo himai hi. Tua laibu sungah Khapi tung kahsawm Apollo 13 tuahsiatna thu kigelh hi.
KSC pen USA gam Florida State sung, nisuahna lam Atlantic Ocean tunga Cape Canaveral Island ah om hi. Khapi tung kah ding July 16, 1969 ni a kilawnto Rocket Apollo 11 kapkhiatna mun hi. Tua Apollo 11 pen July 20, 1969 niin Khapi tung tu hi ciin kigen hi (Apollo 11 landed on the Moon on July 20, 1969, takpi mah hiam cih pen thu tuam ci phot ni).
Zing nai 9 in a mun ka tung uh a, mawtaw sungah special taka ka bawl uh zing-ann ka ne uh hi. Gil vah phit phet khit ciangin sun thapaia muhnop tuamtuam en dingin ka lungsim uh ka gakcipta uh hi. KSC gate ah "KENNEDY SPACE CENTER Visitor Complex, Proud Partner of History" cih kisuang tawh maan kila in, a sung lutna ding lutman USD 38 ka piak khit uh ciangin Gainesville khua pek pan ka khaih suksuk uh tui niin teng taklam tuibuakna ah bua khia in, "NASA" cih lianpi a kigelh biabua maiah ka suaksuk taktakta uh hi. Veila i hek phei leh Astronaut Encounter Center kici khat na om pah a, Neil Amstrong te a kimu kha diam? kici nuam pah hi, a mun a phual tung ta hive hang...
"Mad Mission To Mars 2025" kici mai ah Rocket Capsule khat kikoih demdam a, tua pen vantunglam khualzin masate tuanna bawmpi hi. Tua bek zong muhnop kisa luata, ahi zongin veilam gal-et phei leng Rocket Garden na om zihziah a, khualzin masak hun pan tuni donga Rocket kizang tuamtuamte a kikoihna mun hi. Gamham lakah dolsing kung dawng hilhhelh kisuan bang hi a, inn khum tantan a sang, a muk zum zeze vive ahi hi. A gei ah naupang kum 6 nuailam te pawl kimawlna ding Childrens Play Drome kici om a, nupi te in a tanote uh tua sungah kimawlsak in rocket tuamtuam tawh kimeltheihsak uh hi [a neu laiin lampi maan tawnsak lecin....].
Taklam hekphei leng Constellation Sphere Plaza kici om leuleu a, leitung vantung aksite omzia lahna ahi hi. Tua gei ah Bus kigual diudeu a, a banban in Khapi tung kahna vante kikoihna mun ah mite nawn ziahziah hi. Ko bel Bus Tour ka pai ma un Space Launch Experience ah ka hawh masa uh hi.
Space Launch Experience ah bel vantunglam khualzin mite Rocket tawh leilak pan vantunglamah a kilottoh uh ciang bangci om uh hiam cih theihna ding ahi hi. Innpi sung khatah Rocket tawh a kibang linlian na om a, tua sung lut dingte hong kigualsak diudeu hi. A banban in ka lut uh a, Rocket sungah mi 44 kituang thei hi. Kongkhak kikhak a, nambat 50 pan 1 dong kisim suksuk in, 20 kiim a tun ciangin a nuai ah meikuang ging ziahziah kiza giapgiap a (gamkang tawh kibang), a gin ngaih deuhdeuh in i tutna hong ling dutdut a, ZERO a tun ciangin kilok nasia semsem in a gin ngaih mahmah hi. A puakdut khat kiza a, thakhat thu in i taw ah hong do khat om tawh kibang a, Rocket kilawnto ta kici hi. Nambat a kisim suksuk pan a kilottoh dong rocket sungah mei, tui, kihona, maanlakna, radio, TV, etc cihte a hoih hiam cih kisittel den a, a vekpi in HOIH HI a kicih khit ciangin ZERO a tungpan ahi hi. A hoihlo omkha hizenzen leh a kilottoh ma in a mei kisumit kik ding
hih tuak hi.
Tun ko pen Rocket sungah a tuang, vantunglam ah khualzin dingin a kilawnto khin, nai khat in 17,000 miles na tung ding uh hi cih khawng, kizopna namkim hoih hi, cih khawng hong kigen den. A meikuang ging lah gamlak bi phual kihal mahmah bangin ging vuvu hi. A gin ngaih bek thutuam, i tutna lah kilok, hong thalsawn tawh, hong sing' gawpgawp tawh... a kisinkhol ki-omlo ahi diam, ki nervous dekdek hi. A sawtlo in Rocket meitui bungpi a meitui kuang khinta ahih manin kia a, "clik" ciin ging hi. Rocket ginzia kilaihpah a, a meitui bawm neuzaw bektawh vantunglam kizuanta hi. Tua tak ciangin Rocket tunglam kihong in, huih lak pan leitung ki-ensuk theita a, USA khawng, South America khawng kigalmuh ziziai hi. Aksi leh vantunglam kimu thei a, tuipi leh mualpite zong kimu thei hi. Dum kiuhkeuh a, etlawm mahmah hi.
Rocket tawh vantunglam khualzin mite in a kihona uh Radio leh telephone te a siat ciangin kihopih neilo in om uh a, leilak pan a seppihte tawh kiho thei kei uh leh second khat sung zong lungsim nop vetlo hi. Tua banga haksatna leh a tuamtuam a tuak khakte uh a theisiam dingin hong 'theisak uh' (experience) hi.
"KSC ah hih mah nopci pen inteh" cih lungsim ah vom tiuteu in ka pusuak uh a, a dangte ka en leuleu uh hi.
(zop lai ding)
Hau Za Cin
Phuitong Liim
http://www.youtube. com/watch? v=Ws4EVg1urB4
No comments:
Post a Comment