Launch Status Center ah kigelh mah bangin tuni (March 15, 2009, Discovery STS-119) zawh cianga kilawnto ding pen Atlantis STS-125 hi a, May 11, 2009 cianga nawngkaina a om kei leh dingkhia thei dingin asungah a tuang ding astronaut te Johnson Space Center, Houston, Texas ah limtakin a kisin saan laitak uh hi. Tuni in a lottohna ding khuampi 'launch pad' khawng a bawl saan laitak uh hi a, lamgei ah kitung viatvuat in, Bus tung pan kigalmuh thei hi. Atlantis STS-125 in vantungah durbin kikoih vantung aksite etna Hubble Space Telescope tungah ni 11 sungin a kisam van nam nih va bulh ding uh a, a siate puahpha ding uh hi. [STS = Space Transportation System cihna hi].
KSC hawh na sawm leh May 11, 2009 ni sawm inla, Atlantis STS-125 a kilottoh zong etsawm teitei ve maw.
Astronaut Memorial kici mun ka en leuleu uh a, suangpek lianpi tungah vantungkahmi (astronaut) hong nusia sate, a tamzaw a tuahsia a si te min kigelh in a gei ah US National Flag lianpi khat leh NASA flag kikhai a, zahtakna lianpi tawh a pai peuhmah in en uh hi. Daihawh tawh kibang hi.
Tua pan khangno leh sangnaupang peuhmah in a lunglutpen ahi IMAX Theaters sungah ka lut uh hi. Hih mun pen Movie Hall, Cinema Hall tawh kibang hi. Milim hong lak uh hipen mai. Tuni International Space Station (ISS) hong lak uh hi. Tuni a kilawnto ding Discovery STS-119 pen ISS ah pai ding ahih man hi in ka um hi.
A sunglutna dingin leitung mun tuamtuam pan paikhawm mihonpi khat ka kigual zihziah uh a, a vom, a kang, a san, a lian a neu, a tom a sang, tua lak pan Zomi te mah melhoih pen hi inteh, mite in hong mu nuam diak uh, hong enen uh hiven!
'A sung luttheihta' cih aw ka zak uh ciangin a lut masa ding kituh cih bang om sese lo in a kizom in ka lut deudeu uh a, kongkhak gei a mitlimlang san (red sunglass) khat ciat ka tawi uh hi. Banga zang ding? 'Made in China' hilailai. US ah 'Made in China' a kicihnaak leh a sia nam, a tolo, a hoihlo nam danin kituat hi.
Tua mitlimlang tawh ka tut hithiat laitak un meivak khempeuh sumit in, vanleng ging ding bang khat nunglam pan hong ging ciaiciai a, ISS phualpi hong lak ding uh na hitazen hi. Ka mitlimlang ka bulh a, ka et leh baangtunga milim pen hong nai phei a, kei zong tua ISS mun ah a om bangin ka mu hi. Hih banga milim ettheihna munte pen 3D Movie kici hi. Ei zong tua milim sungah a kihel bangin hong kimusak se hi. Siam mahmah uh ei. Zingsang lamin Rocket tung tuang bangin ki omzo a, tun huih tungah khualzin bangin ka om leuleu uh hi.
Launch Experience ah ka tuanna uh Rocket kinaksiin lua, kilokgawp ahih manin lawmpa Thawngpu ipsunga Cell phone zong na kisingkhia a, a kiat lam phawklo hi. Vantung kah bel baih kei mawk ei, kisiing keiii hilo maw!
'IMAX Theaters' sungah ISS sung leh a nasemte, a nasemte gamtatdan, a annek dan uh, a tui dawndan uh, a ihmut dan uh, phone kiho dan, etc a tuamtuam hong lak uh a; tuni a pai ding mi 7te a tun uh cianga a tuanna uh Space Shuttle sung pan ISS a lut dan ding uh, a nasep dan ding uh, Solar Panels a bulh uh ciang 'Space Walk' a cih uh 'huihtungah kilaam kawma nasem' a hihdan ding uh, space walk laitak a vante uh kiatsuah kha leh bangcih ding cihte hong lak uh a, ei zong amau tawh omkhawm banga kimu ihih manin a nuai hawmpi (empty space) akimuh tawh i taw zek mawk hi. Ahi zongin lauh ding omlo a, tatkhialhna khat nei le uh zong a kiasuak theilo dingin khau tawh kikhih hi. A khau tat leh zong remote control tawh tua inn sung lutkik theihdan omlai hi. Siamna sang mahmah hi.
Huih tungah bu a kilam himawk a, nasia veve mawk hi.
Tua bangin astronaut te nuntakzia khempeuh hong lak khin uh hi. A tawpna ah, a movie a bei ciangin, astronaut khat in, 'nang zong hih lai ah nasem in hong pai thei hiteh, na up ngam naak leh' (you could be here one day if you think you can)' cih tawh a sungah tuang Astronaut te in khut hong viik ngeingai uh a, mangpha ka kikhak uh hi.
Zomi aw, you could be 'there' one day if you think you can!
(zop lai ding)
Hau Za Cin
Phuitong Liim
http://www.youtube. com/watch? v=Ws4EVg1urB4
No comments:
Post a Comment