Sunday, May 3, 2009

ZOMUS kalsuanna kuppihna

ZOMUS kalsuanna leh maban te nong gen zel ciang tha hong ngahsak mahmah hi. Zomi khempeuh in tumging tum leh lasak nuam kisa hi. A siamlo pen kei na ngawn in Guiter kuah in mipi mai ah ka na solo ngam hun om tazen hi. Lengtong Kam Khen cih bangin tua pen kei adingin Top Ten kalsuanna tawh kibang hi.

ZOMUS, Singapapore Branch te kalsuanna thupi kasa a, phat huai kasa a, zahtakhuai kasa hi. Zomi innkuan Singapore mah thukhual siam masa in hong minthang vangvang zel hi. ZOMUS Branch dangte in zong amau sep theih ciang ah kalsuanna hong neih ding uh lamen leeng.

Lasiam sia Thang Sian Khai (alias TS Khai) pen Taanglungtup VCD ah Mopawi La a kisak ding ciangin tawmkhat hong dawk ziau ka muh cih loh kei bang a takin a mu kha nailo ka hi a, amah ka muh loh, ama mimal thu leh nuntakna thu ka kan ngeiloh hangin a minthang vangvang man in a min bel ka thei mahmah hi.

Sihna Ki Go Zo series sung ah late khempeuh zong Zomi te go manpha, gamh manpha a hi hi. A lasak ka theih pak pawlkhat - Lakik thei leng maw, Zogam Vontawi Taangpal ka hi, Van man tam lua, etc. Tam lua a bul pan dah vet ni. (Ama lasakna leh ama tangthu a gelhna laibu om dingin um ing). Pahtawi taak ahi hi. 'I zawn in hong haisak' cih bangin a theilo kineih in a kipahtawi lo bek hi a, pahtawi piak taak lua hi.

A thu-a kipahtawi bek zong thupi a, a mual a guam kaan a gam thupi, mun thupi mu dinga hanciam theih pen a thupi diak hi. Kipahtawina a neulua om kei, laidal khat kipiak bek ahi a, cikhum 1Kg kipiak bek ahi zong, sialpi sialtal kigawh ahi zongin thupi khin hi. Kipahtawi uang bawl semsem ni. A thu kimangngilh theilo hi.

ZOMUS ah hong kihel nuam om cih pen bel kei ngaihsutna mawlcik ah bel mikangte in 'khut tamlua in ann hiingsak' (too many cooks spoil the broth) na ci hi. Tua man in vaikhat peuh a sai a sem sial ek tam lua leh palaang gawp in thelthaang in buisum thei hilo hiam ci ing e. Kei ngaihsutna bek hi sam. Khangno kum 20 zong a phak ma a minthang lua Britney Spears bang zong a minthang luat a vaang pua zolo hi peen lo dia, a thu i theihsa ciat hi. Tua manin a picing nailo naupangno khat bangin a bul a kipan ZOMUS zong kidawm takin kal a suan a, a picing phot ding thupi zaw lo diam ci ing e.

Gen khialh a om leh hong maisak un.
ZOMUS phuh bang kho taangbang dam hen.

Hau Za Cin
Phuitong Liim

No comments: