Sunday, May 3, 2009

Hauhna zong masa

Minam khempeuh in Hauhna zong masa tua zawh ciang Pilna
Tue May 1, 2007 4:46 am (PST)
Minam khempeuh in Hauhna zong masa tua zawh ciang Pilna:

Tulai Zomi sungah 'pilna zong lo in hauhna kilim zon zaw' cih thu kilim gen mahmah a, kizaza hi. A takpi zong hi ding a, a dik, a maan zong hi ding hi.

Bangalore Zomi te kum 2006 Magazine ah "Pil masa ding maw hau masa ding" cih thulu tawh lai tawmcik ka at hi. Tua sungah ka gen pen pilna nei masa leng hauhna pen kum khat kum nih sungin zong hong tung thei hi. Ahi zongin hau masa leng pilna pen kum nih kum thum in hong tunglo thei hi. Tua manin pilna kisam masa zaw hi ka ci hi. A sim ding leh a thei dinga ka deihte khangno vive hi zaw ahih manin tua ci in ka gelh hi.

Ahi zongin leitung pai dan ah hauhna kidelh masa zaw, pilna kizong kik hi. Minam khempeuh in hauhna, kisap kicinna na hanciam masa uh a, tua zawh ciang pilna na zong uh hi. Hauhna a neilo khat zong pilna a neih na dingin a haute in tawsawn in panpih in mi suaksak thei uh hi. Tua bangin a ki suangsawn toto pen pilna leh hauhna ahi hi.

Nitumna lam pan nisuahna lam ah minam tuamtuam tuipi tungah tembawpi leh gunkuang na tawm tawh hong zin khia uh a, pilna zong hi lo uh hi. Hauhna zong ahi uh hi. Hong Kong tuipinaak ah a khawl dimdem laitak un Sengam ento in 'hih lai ah hauhna om ding hi' ciin ngaihsun uh hi. Luigeia mipi te kiangah thusiam in a gam a lutto uh a, a gamsung hauhna tampi tembaw tawh a pua khia uh hi. India gam pan zong, kawlgam pan zong - tua bangin hauhna zongin hong leng khia uh hi.

Tua hauhna te a koihna ciantak in a neih khit uh ciang pilna sinna ding hong kipan uh a, sanginn hoih pipi hong lamin college, university hong lam uh a, tuni a minthang Oxford University cihte hong piang toto hi. Neih leh lam nek ding a kicin ciangin pilna limtak in sin uh a, hauhna hoih takin kem uh hi.

Tu laitak Zomi te zong tua lampi mah tawn in i gamtang hi. Leitung sumgum leh hauhna zongin i diangkhia a, nikhat ni ciang pilna thupi sinna lianpipi i nei ding hi. Amasa pen ihi kei e, English te, French te, Dutch te, Portuguese te, Spanish te khantoh dan mah a zui i hizaw hi. Tua manin i kalsuan dan sia lo a, hauh neinai ding bek thupi phot hi. I zon tua ahih leh. Tua zawh ciang pilna a sin kha lo te in a tate uh pilna sangah kha in hong pattah ding uh a, Zomi adingin lametna ni hong suak ta hi. Pilna a sinlo hauhna a nei Pa leh Nu in a tate pilna kician tak a neihsak nak leh amau sin, amau neih maha bang hi veve a, a hauhna a zuun ding, a kem ding, a zeek ding khat Topa in a pia mah hi veve hi. Tua pen thupha a tuamtuam i ngah hi in kei ka tuat hi.

Tua manin kei laisim lo, sangkah lo ka hih ciangin sum leh pai limtak zong ning ciin hanciam in zek tantan in, tate in zong kei thagum tawh nasem lo ka hih ciang ka nu leh pa hauhna zahtak sak in hoihtak in zeksak, kepsak zuun sak ning ciin pil gamtat leh i vekpi in i maitai in i lungsim nuam dinga, i ngaihsut tawldam ding hi.

Tua manin hauhna zong te zong hanciam ni. Pilna sin te zong hanciam ni. Kizahtak tuah sak in ki thupi et ciat in, i neih zawkzawk i thupha san pen kiliatsakna leh gual demna in zanglo in Topa hong piak hi ciin ngaihsun siam leng, a tamzaw sem hong pia thuah lai ding hi.

Hauhna a zong masa pilna a nunungsak hi kei hang, anih in a kitonkhawm sak hialhial te hi hang.

Talent i neih kibanglo hi zaw. I neih bang ciat i gam, i nam, i mi leh sa, i inkuan, i tanau leh lawm leh gual (a kisamzaw diak a om leh) tuate adingin zang siam ni. Mi huai siam ni. Ki dom kang tuah siam ni.

Hauhna a piapa in pilna zong nei a, anih in hong pia kop nuam hi.

Hau Za Cin
Phuitong Liim

No comments: