Mihing in i nuntak sungin a tung nailo i mailam thu ding i ngaihsun ciat hi. I lungsim deih dan bang tung tampi om a (a tua dingin hahkat ihih manin), tua banglo a tung zong om veve hi. Kum 200 paisa hunin English laiat siam minthang William Wordsworth in, 'immagination is greater than reality' ciin na at hi. A taka i tuak sangin i ngaihsut tawmna pen thupi zaw thamtham takpi zel hi.
Ka ngaihsun maimai a, mihing mailim ding ki geel khol tek hi (a ki gen khia tawh, a kigenkhia lo lungsim ah). Sunmang kici hi. Ngaihsut tawm cihna hi. Theihpipi mah a lungsim ah i ngaihsutna pen ahi hi. Lusei pau in Duhthusam kici a (duhthu = deih dan a thu ngaihsun, sam = vat, hawl cihna hia), ut ut ngaihsuna lungsim vaksak cihna hi. Day dreaming (english).
Gentehna in 'ka zi ding lasiam hi leh' cih ngaihsun leng tua pen ka sunmang hi pah hi.
Ka kiangah tu sakin lasa, guiter ka saaisak ding a, ama lasak ngai in ka kihuang deudeu ding hi. Ka lungnopna bek hilo in amah zong lungnuam ding hi. A siamna limtak in zangsak ka hih manin a lungdam ding hi. Medical doctor khat hi leh ka kiangah tusak in cidamna ka genpih pih dinga, amah lungnuam ding hi. Sangsia khat hi leh sangkahna thu ka genpih dinga a tha lawp ding hi. Biakna sia khat hi leh biakna vai leh Pasian thu ka theih bangbang ka genpih dinga a lungnuam ding hi. Lawyer hi leh thukhente thu ka genpih dinga a lungnuam ding hi. Sumzong mi ahih leh summet bawldan ka genpih dinga, a nasep thanuam semsem ding hi. Nisim thatang tawh nasem ahih leh a ci dam mahmah ding ahih manin ankam lim in thu khatpeh ka genpih thei ding hi.
Mihing in i lunglut lam, i siam lam, i duh i deih lam hong theihpih mah kingai, kideih, ki it masa; a tua bangte mahmah zong ki it suaksuak hi pen mai hiam ka ci hi.
Tua ahih manin tuhun khangthak hun ah Zomi te zong minam khangto te nuntak dan leh psychology cih khawng pau puak bualbual in i gen ta a, tuate hangin nupa khawng lungsim kibang ding hi, duh leh deih a kibat ding hi ciin misiam i cihte genna bangin i zui panpan ta uh hi. Khanglui lai a - "hua na pute tanu a gamtat hoih in i mo dingin la ni" cih banga mihoih khat peuh lak ziauziau cih hi nawn lo deuhdeuh ta hiam cih ding hi.
(sorry... Australia pan sanggampa khat in (a min mangngilh pak ing) "....vot lua mahmah in nikpheiteeng khat peuh hong vaihawmpih un..." a cih ziau pen a gensia ka hi kei hi)
Mihing lungsim kihual deuhte mah kiteng leh a nuntak uh nuam in khangkhat nuntak ciatciat zong hampha diak, en huai diak tawh kibang hi. Ngaih Anglai te cih bangin "Ei lah kuaman hong englo, en lah kuamah eng lo" ci ding uh hi leltak hi. Pak kilawhsak in, lungdam luatna gen ding dan theilo in uino ham bangin bau bau a ci tateu uh zong kilawm khin hi mawk hi, itna hang hita ahih manin. A lapi uh zong nahtang kimop kawm-a -
"Ei lah nun nuam in i leng a,
Gual i en loh ding aw e,
Nih gel gam mawngsing bang kikawi,
Sen ngaihno sang bang no cim laang e"
cihcih ding hi lel hi. Tua kaan leitung ah a nuam om ding hiam?
Hau Za Cin
Phuitong Liim
No comments:
Post a Comment