Mopawi Lungdampihna

Mopawi Lungdampihna Posted by: "Hau Za Cin" suante2002@yahoo.com suante2002 Fri Jan 8, 2010 4:45 am (PST) Mopawi Lungdampihna: Mang weds Huai! Mopawi a bawl theite lungdampih ding hi. Ka biakinn vua media leh publicity lam a sai Pa Tual Kim @ Suantak Vonkim in a thu pulakna ah, "I sanggampa Mang US citizen maikal ciangin interview ding hi in, thungetna ah phawk ni. Citizen ngah leh 'a dang khat' zong a ngah ding om hi," ciin pawlpite maiah thungetpuih dingin pulaka, pawlpi leh mipite thungetpihna bangin US citizenship zong hong ngah, lungdam kiko khawm (annekna khat zong a pai thei tengin kinei, KFC leh Moh lim nono tawh Pu Vum Son inn ah). Tu'n 'a dang khat' zong hong ngahta ahih manin suahpihpa Tg. Zam Mang (tun Pa Zam Mang hita) i lungdampih hi. Sanggampa Mang pen mi kizen mahmah khat hi a, mi huh thanuam leh mi panpih a hahkat khat hi cih ka mit mahmah in ka mu hi. Beltsville, Maryland ah ka om sung in inn hoih mahmah khat hong lei a, ama inn ah Pa Kam leh Nu Dim te nupa, Sia Piang leh ka biakinn vua la makai Tg. Henbawk (lungzuang a lungzuan la sa ngeungeu thei..he he..) te zong a ompih pah hi. Mite in theihsimna nei hi ding hiam, "inntekpa in Aussie lam ah Vaphual bu hawi ahi tam maw, Hello.... ci thei zel" ci uh hi. Tua Vaphual tuni in a anglum ah sial in, sang bang kino kawmin 'ei lah kuaman hong englo, en lah kuamah englo' ciin nang leh kei hong phawk nawnlo ding uh hi. USA ah Phalbi zansawt zong tomno bangin ngaihsunta ding hi. Lungdampih hang. Ei hong phawk nawnlo bek hilo, a inn ah Voksa duh leh ne, Buhman duh leh ne, Niangtui lim nono dawn, Fruit juice tuamtuam ka dawn lai khawng uh zong i hilh kikkik kei leh mangngilhta ding hi. Tua pen a phamawh hilo a, 'angkawi lianu' lungdamna hi zaw ding hi. New York pan hong zinsuk vengveng a Nekkhawmbawl leh Thuhilhna hun hong zatpih siapa te tawh inn mai ah maan ka kizaih khop ziahziah zawh uh cianga siapa a omna lam zuan, ko ka omna uh zuan..... lasiam TS Khai cih bangin, "La kik thei leng maw." Phualva kop banga etlawm Mang leh Huai te (a mopawi foto pan i et ciang) inn nuai ah music van tuamtuam Drums, Bass Guiter, Lead Guiter, etc. kiphah zihziahte ka utzah vua ka sai ziahziah hunte uh mualkhumta a, KUMLUI hita zawmah lai hi. A Honda Car tawh Obama te lenna tualnuam ka kileh ziahziah hunte khawng uh sulheilo dia, kumlui 2009 hita zawmah lai hi. Ka biakinn vua Bass Guiter tum kawma lusu ngeungeu Tg. Singpi leh la makai mah Tg. Kimpi te zong Phualva kop banga etlawm mopawi ah a ha uh selzolo in maanzaihpa geia ding nungaknote lamah 'smile' phei zihziah lel uh hi. U Paukhek te inn ah upmawh loh leh lamet batloh a Ni Dim (Ni Florence Ciang), Australia pek pan hong zin vangvang tawh ankuang sawk khawma hun nuam ka zatlaite uh hong phawksak dingin a tanu melhoih sitset uh zong a mel mu kha ahih manin lungzuan phawng kikkik hi. Pa Thawng leh Nu Kok te naungek melhoih tawi thu, Lia CiCiin nuihmai leh ka biakinn sunguh ah kikhawmte tut dimdiam dante, leh ka muh laia vuk kialo a tun vukkia thute gelh kim ding hi leng hong sau lua dinga, theihsa tawh theih nailohte tawh mopawi siim khempeuh thu zong i gelhkim hong kul kha ding a, US pan Aussie ah Mopui a paina thu zong kigelh khalo kha ding hi. Tua ahih manin damdam in i hialbawl sawm zaw mai ding hi. [Mopawi bawlte in lah hih tantana sau laigelh sim manlo in nitum ding khuazin ding bekbek khuadakdak kha ding uh ahih manin]. Mopuina thu: A kipulaksa mah bangin citizen ngah zawh ciang 'a dang khat zong omlai ding' cih a tangtunna dingin calendar beihak lua sa a a enen 'melhoih ngaihno' pui dingin US pek pan Zogam tangval hong lengkhia ding cih thu a kizak ciang tua a 'melhoih ngaihno' bangzah in lungdamin bangzahtakin a ngaklah zen tam. Airport ah ka dawn diam, ahih kei leh inn tual pan ka dawn tam ciin ngaihsun kha ngeel inteh, theihpih khang. A kimuh masak ding laitak un bang a ngaihsun tam uh...hm..hm. ... Rose pak a piak ciang bangci'n a sang tam? A khut a ling diam? A aw a lingzaw diam? A nuih ciang a lipstick a sia kha diam?? Hih banga mopui ka theih ngei pawlkhat om. Sweeden pek pan Singapore a om a ngaihno Cingno pui dingin ZONET pu khat ahi Pu Tongseal vabang hong leng vengvengin Singapore nungak melhoih penpen tuahkhia a, tu in tanu melhoih tak nei khin uh hi. Kennedy Space Center ena ka pai lai khawng vua KL a phone phone khat sanggamte zong tu laitak a ngaihno lenpih dingin KL ah a om laitak hi kici hi. Tua hi a, hih bang pen Zomi te Vaphualno lak dan hong hi pianpian ta hi. Tuma in zong Oklahoma Zomi Innkuan makai te khat in Yangoon pek pan va pui vengveng hi cih iza hi. Nuam Sin Teh Maw!! Murlen khua Upa Cin Pau in kei lei zong ka ngaihno tawh vanleng tuangkhawm cih a zak ciang: (a). Tung thangvan ah ngaihsiang kawm ding, Ngaih tawh dawn bang kituak a, Nuam sin teh maw, Nuam sin teh maw lawm. (b). Nuam sin teh maw lawm, Sinthu deih khaubang sut a, Nuam sin teh maw, Nuam sin teh maw lawm. ciin Nuam Sin Teh Maw la hong phuah hi. Tua sangin amau aa pen nuamzaw thamtham lai ding ahih manin 'hampha si uh e maw' ka ci hi. Leitung langkhat pan leitung langkhat dong tung thanvan ah ngaih tong kisang ding cih ka ngaihsut ciang 'hampha' cih loh buang gen ding ka thei kei hi. Nuam sin teh maw cih bek tawh gen zolo kha ding hi. 'U Cin aw, ka mopawi ah hong kihel thei lecin ut sam ing ei' ci ngaungau lianga hong deihsak hang heina khatlo, a mual a guam in hong hal ahih manin, 'ka thungetna leh ka lungsim in hong phawk ding hi ing, a nuam thei pen in na zang un' ciin ka hilh kik a, aman zong nuamsa hi ding hi, khasiat mel maan kimu vetlo in, nuihmai hiuhiau vive kimuzaw hi. Tua hi a, laphuakpa khat in, Zi pipa puan hoihtawh kizem a, Monu kizepna suang manpha Tua bang teek in Topan hong zem a, Ka Pasian hoihna tumdang e a cih mah bangin hih nupa te kizepna hoih a, amau tunga Topa hoihna zong tumdang kasa hi. Inn, mawtaw, nasep kician nei khin in, inn sungah nu ding, pa ding in kigawm uh ahih manin Lai Siangtho sunga Paunak gelhpa cih bang a zui hitakpi a, lungdampih lua ka hi. Tua bek hilo (ci zel lai ni in, cih zel ding om den, bei theilo ahih manin), tu kum Thanksgiving hun sungin pawlpi program Family Retreat zong amau inn ah la in, a inn uh Topa gam nasepna dingin a piakhia ngam khangno, nupa thak ahi uh hi. Honeymoon koi ah pai uh hiam? Letphuai (gift) bangteng, bangzah ngah uh hiam cihte i buaipih kei dinga, Topa in a khan tawntung uh nupa nuam, innkuan nuam hi a, tanu tapa tawi a ki it kitul dingin thupha hong piaksak leh ciin deihsakna i khakzaw ding hi. Mopawi maan te hoih thei mahmah ei. Lungdampihna lianpi tawh, Hau Za Cin Phuitong Liim