Zonet writer of the year—2009

Lungdam Kohna

Posted by: "Gin Khan Nang" nanggk@yahoo.com   nanggk

Sat Jan 16, 2010 3:25 pm (PST)

Lungdam Kohna

          Tu laitakin Lamka lamah sanggamte in Zogam adingin nuntakna pia-in dahna thu a kigen laitakin Lungdam koh ding cih pen a thu hong kilehngat peuhmah hi. Bangbang hi leh a hun hong kituak mawk ahih ciangin Zonet a sim khempeuhte tungah lungdam thu hong ko nuam ing.
          Jan. 15 nitak (Asia-ah Jan.16 hi ta) an nek khit ciangin tawl khat kimawl dingin kimawlna khan(roomah) ka pai hi. Lawmte khat zong hong pai-in Pool (ei lamah om pha kei) ka kimawl uh a, game thum ka kimawl khit uh ciangin ken lelin, ka khawl uh hi. Nitak 7 PM pawl hi ta a, Internet hongin tadensa tuamtuam en dingin ka tu hi. Tadensa tam na lut nai loin 4 na om hi. Spam-ah zong taden pawl khat om  thei ahih teh ci-in Spam ka hong leuleu a, advertisement leh Haiti gam vai mah na tamin a nuai-ah Zonet panin “Zonet official announcement for the winners of “Zonet writer of the year—2009” and  “Zonet news reporter of the year—2009” cih ka mu hi. Kei kilamen lo napi-in kua in ngah hiam cih thei nuamin ka hong hi. Ka hon ciangin ka min a masa penah na omin Reporter sungah Tg. ML Thang min ka mu hi. “Aw, Writer of the Year, 2009” hong ngahsak uh ahi ve maw ci-in ka lungsimah lungdamna hong om hi. Laite ka sim khit ciangin
Shillonga ka lawmnu Ching Za Man (maman) ka hopih a, ka balance pen minit thum bek om lai hi. “Na tho ta uh hiam?” ka cih ciangin, “Tho mah ung ei, dam zel na hia” hong ci hi. “Dam ing ei, ka balance tam kei in sawt kiho man lo ding, “Tuni Zonetah Writer of the Year hong ngahsak uh ei,” ka cih leh “Aw, a lungdam huai ve leh, lungdam hang ei” hong ci hi. “Ka balance bei ta ei, kiho zel ni ei,” ci-in ka koih hi. Tua khit ciangin ka Cell phone tawh Sia JM Paupute ka hopih leuleu a, “An na ne ta uh hia?” ka cih leh “He ne ta ung ei,” hong ci hi. “Zonet na en ta hia?” ka cih leh “En man nai het lo” hong ci hi. Tu ni “Writer of the Year” suaksak uh in, award hong ngahsak uh ei, ka cih leh “Congratulation” hong ci pah hi. “Nang zong a 4-na-ah om ciai ka cih leh "Hi maw, kei bang ei pau-in zong laigelh siam lo, English khawng mah a kitam gelh hi zaw a” hong ci hi. Tua khit ciangin ka phone-ah message hong lutin,
“Pa ong lungdampih mahmah ung ei. Vuvung, Mangte, Kimbawi and Paubawi” kici ka ngah hi. Shillonga ka tate Lia Ching Ngaih Vung (14), Lia Huai  Ngaih Mang (12), a nuno uh Lia Ching Hoih Kim (12), leh a puno uh Tg. Hang Lian Pau (14) in lungdampihna hong khak uh hi. Tua khit ciangin Tulsa khua ka tute Mangnote ka sap leh kila loin, Pa Kham Khan Khual (Pakhual) ka sap leh nasem ding a mun lut lian ekbuk sung pan hong hopih hi. “Tu ni Zonet panin ‘Writer of the Year 2009’ hong ngah sak uh hi,” ka cih leh “Eh bang e, hong genpha sin aw,” hong ci a, Kumsim a kiteel Zonet panin “Writer of the Year 2009” ngah ing ei, ka cih leh “Aw, lungdam taktak hang ei, pa Nang, Topa thupha hi ei,” ci-in amah nasem ding hi ta ahih manin tua teng bek ka kiho man uh hi.
         Hih teng khit ciangin tawlkhat website ka et khit ciang nai ka et leh nitak 10 PM na sat khin hi.  Ka lup hun mawk, “Aw tunitak nai cing baih si e,” ci-in ka lum hi. Ka lup ma-in Zonet pute kiangah lungdam kohna ka khak a, Zonetah hong khah lai ning, hih pen noteng kong khak phot hi ka ci hi. Ka lup ma-in Sia Zam Khat Kham lungdampihna zong ka simpah hi.
            Jan. 16, 2009 Zingsang nai 9 ciangin message khat hong lut kik a, Pa Thang Khen Pau tawh breakfast ka nek khop laitak uh ahi hi. Ka et leh “Congratulation! Writer of the Year: From Mangte”  kici hi. Ka tanu neu pen in lungdampihna hong khak kik ahi hi.
          Hih bangin ka innkuanpihte, ka tate leh lawm leh gual tampi in nong lungdampihna uh email ka muh ciangin tha ka ngah semsem hi. Kei lamet bat loh leh kei cin man hi loin lawmte gen bangin a gelh siam tampi in gelh lo ahih manin leh a gelh sung pan zong a kilawm zaw tampi om tase leh hih pahtawina kei tungah hong tung pen ka nuam mahmah hi. Mi adingin bangmah ahi kei zongin kei adingin “Ka sih khit ciang zong ka mualsuang ding hi lei veh e,” ci-in ka ngaihsun a, hih bang hong pankhia Zonet pute, vote hong piate, lungdampihna lai hong khakte tungah lungdam thu kong puak hi. Bek tham loin “Reporter of the Year-2009” Tg. M.L. Thang (Thangboi) zong nakpi takin ka lungdampih hi. Amah pen a hi ding mahin ka tuat a, kilawm zong ka sa hi.  Zogamnuam.com in hih laikhakte lim takin hong kepsak cih zong ka theih ciangin amau tungah ka lungdam hi. Hih kipahtawinate pen mihing ading hi loin Topa minthanna ding hi zaw hen la, Topa Thupha
note khempeuh tungah hong om zel ta hen. Amen.

Rev. G.K. Nang
Fuller Theological Seminary,
Pasadena, USA. Jan. 16, 2009.