Laizom <actsxk@yahoo. com> wrote:
Thu masa: Pasian cih kammal ei Zo pau sungah a zangh khai masa penpen kua hi ding a, bang hang in nakhempeuh te sungpan in a vanglianpen, a hoihpen, a siampen, a gualzo pen, minpua (nei) ding in Pasian cih hong kizat khiatna a hang leh a ki zatcilna (hun) ka theih nop bulpi pen a hi hi. Pawlpi khat leh khat or doctrine kibanglo tuamtuam te debate na phualpi ding in hong luikhia nuam ka hi kei zaw hi.
Ih Zo kam bulpi te kan khiat na mun hi leh cih ka lunggulhna kong gen masa nuam hi. Kei upmawhna te a nuai a bang in hong gen ning:
1. Pa-hsien Sen (China) gam pan: Sen gam ah Tao cih minam om a (a awgin taktak pen ei Zo tawh kibang phial hiam maw), tua te in a pa-hsien cih kam malnei uh hi (ref. Boo Singkhawkhai, Zomi & Culture, 117). Hih pen a vanglian, itna tawh kidim, nakhempeuh te tung ah thunei pa, dawite tawh a kibang lo, a gen nop uh ciang in pa-hsien (Pa-hsien) cih na zangh uh hi. Hih kammal pan in hong kizom tosuak, ih pu leh pa te in a na zoptoh suak uh hi kha mai thei hi.
2. Pu Sella zatdan(1800s) :
Pu Sella (a mah pen Taithul beh sung pan in Pu Sawmmang suan hi a. Dr. Khamgomang, Rev. Khamliankhup te pu a hi hi), in thu a theihngeiloh khatpeuh a kidot ciang in "Kamhatpa" bek in thei in teh ci in dawng thei zel hi ci hi. Kahatpa cih pen a kamtawh nahempeuh piangsakthei, beisakthei, bawlphathei, siasakzothei, cihna ahi hi.
3. Pu Tualgo zatkhiatna:
Pu Tual Go pen Lomzang khua ah a teng mi khat a hi hi. Zomi te laibu sungah Pasian cih kammal leh a ki theihkhiat masak na penpenna Zolai simbu sung ah Neino leh Nantal tangthu (myth) pan hi ding in ka um mawh hi. Hih Neino leh Nantal tangthu a gelhkhia pen Cope topa (first missionary to Zoland) a hi hi. Cope Topa in ih Zomi sung a tangthu theite leh kammal zatzia te a kan theih tawp in kan a, kammal mawkzat ngei lo hi. Hih Nantal tangthu a genkhia pen, Pu Tual Go, Lomzang te hi ci in, Sia Hangdolian, ThD (candidate) in Sept 6, Sunday, a sermon gen na ah hong helkha hi, amah zongh Lomzang te a hi hi. A genna ah, "Zomi te Pasian theih hun pen sawt mahmah ta ding hi, a man in genni ci leng, Abraham, Isaac, Jacob leh Nantal te Pasian cih ding hi" hong ci liang hi.
4. Pu Ginlian genna (ibid, 118):
Nidang lai in, naupang khat a neulai in Sahang in pet liam gawp hi. pasiante thu kikum uh a, tua naupang khoi uh hi. Naupang nu leh pa te in naupang pen vaksak ngeilo hi, naupang pen hong khangcing to ta in, zi hong nei hi. Nikha apa pen gamsung ah sabeng in hong kuan khia a, Sahang in na pang in kamphatna tawh a Sahang thatzo bilbel hi. Tua Sahang pen naupangpa a petngei khat na hi a, tua naupang in a valawnkhak leh tua Sahang natna gu a matung ah tung in, tua naupang zongh a si hi. Hih tangthu ka deihna bulpi in, Neino leh Nantal te tangthu mah bang in pasiante cihkammal kizangh khia hi.
5. Pi Nuamdim:
Pi Nuamdim in pasian or Pasian cih kammal Pu Paucinhau zatma in na zangh ngei khin hi. Pi Nuamdim pen Pu Paucinhau ma in kamsanna na ngah ngei khin hih tuak hi (personal email from Dr. Gin Khan Nang). Sia Nang in Pasian cih kammal a zangh masa te sung ah Pi Nuamdim kihel ding hi cih ummawh hi. Pu Paucinhau kamsan ding pen Pi Nuamdim in na genkhol ngei hih tuak hi. Pi Nuamdim khanlai in Tedim gam ah missionary hong tung nai lo hi. Ahizong in, Mizogam lam ah gospel tawmtawm kigen ta hih tuak hi.
6. Pu Paucinhau kamsanna:
1888-1902 (kum 10) sung cina gim mahmah in a om lai tak in Pu Paucinhau in maang mu hi. Pasian te a kicici pen Pasian khatbek na hi zaw hi cih hong pulak khia hi (ibid., 118). Hih hun pan kipan in Pasian cih kammal ki tam zat to semsem hi. Pasian cih kammal koi pan in hong theikhia hi ding uh hiam cih ih telzo kei hi. Lusei te in Pathian na ci uh a, saklam eimi te in bel Lusei te ah na zatpih uh hi.
7. Khangsimna te pan en leng:
Ih khangsimna tuamtuam te, ka et et ciang in, Zomi te lak ah Gospel thu hong tunma peuhmah in, nau minphuahna ah "Sian" or "Thian" cih ka mukha ngei kei hi. Ahizong in, 1920 kim pawl pan in "Sian" cih min ki zangh pianpian ta in, 1930 kim pawl pan in hong tam ta hi (eg. Cin Sian Thang, 1931).
8. Lusei te khangsimna ah:
Lusei te khangsutna tuamtuam te ih et ciang in "Lal" cih min pen a zat zawh uh na sawt mahmah khinzo hi. Gtn Lalchera, Lalhluna, Lalruma, Lalsailoa 1725-1775 (Vumson, Zo History, 65). Lusei (Mizo) pau Lal cih a khiat na pen, topa or Topa (Lalpa) a hi hi. Hih lal a zatdan uhpen nidang tualgal hun lai a, mi thahat leh mi minthang nama kizangh hi zaw khathei in ka um mawh hi. A hang pen, a min pai dan te pen Pasian tawh kisai lualohi. Tapidaw suah zawh mizo te min phuah dan te pen, Lalbiaksanga, Lalhmingthanga, Lalngilhlova, cih te hi in Pasian or Topa a tap (vawh) takpi uh a hi hi.
9. Khanglui te zatdan:
Sianmang and Ziinmang cihte pen ih khanglui la te ah om kiukiu a, a hizong in tapidaw hong tun khit leh hongtunma a laphuah dan te zongh ki bangkim lo hi. Emotional Expression ding in Ka Pasian, ka Lungzai cih na zangh ngei uh a, tua teh phuisamna ah a hel kha bawng (beh) honkhat zongh om tuak hi. Lungzai pen well-fed ci in Boo Singkhawkhai in gen hi. Lungzai cih tawh kisai pen ka gen ding tam ka thei kei hi.....
Thukhupna:
Leitung ah a suak mi khat peuhpeuh in ama sangin a lianzaw, a hat zaw, a siazaw leh a phazaw, itna neizaw leh gilozaw om hi cih hilhtawm kul lo in ih pianpih sisan tawh ih thei pah hi. Ganhing, Vasa, Singkung, Lopa te zongh a mau omzia tawh kiho theihina nei uh a, tua te khempeuh deihna a nei khat om hi ding hi, tua pen a patna leh a tawpna dong in a nungta den khatbek a om hi, tua pen Pasian a hi hi. Nakhem peuh tawh a kibanglo, hizawngiat, theipen, siampen, vangneipen, mongneilo, hihtheikhin (excluding sin) khatbek om a, tua pen Pasian ci a, min ih vawh pen thuthuk pi a hi hi.
Kuazat masak hi ding hiam cih ih tel zo kei a, a hi zong in, ih biak Pasian pen vangtung leh leitung bawl, nakhempeuh te tung ah thunei Pa a hi ci in ih tel hi. A mah tawh maitang kimu in ih kituah hunciang in a vek in ih thei ding hi.Notice: Na ngaihsutna te hong hawmsawn in, lungdam
Suanzakhup
No comments:
Post a Comment