Cope 98 Celebration October 31 pan November 2 ni sungteng Tedim, B.A.G Biakinn ah kibawl ding hi. Tua vai tawh kisai Rev. Dr. Khai Khan Suan in Convenor hong sem dinga Rev. En Khan Mang in Secretary panmunte hong sepsak ding uhhi.Tua pawipi pen Cope topate nupa Tedim hong tunzawh kum 98 cinna pawi ahih manin a nopci theithei in kibawl ding hi.Tedim gam sung Pastor khempeuh kisam dinga November 1 ni sunin Bible Study nei khawmin Tedim gam sung biakna tuamtuam a Ordained Pastor khempeuh leh CCJ makaite in nitak ankuang umkhopna nei ding uhhi. November ni 2 ni kikhopna kinei khawm henhan ding hi. Nitak simin khangnote makaihna tawh lim lahna, lam lahna leh laa saknate om ngelhngelh ding hi. Mi tam mahmah ding ahih manin Biakinn pualam ah zong Projector leh TV tawh kilak sawn ding hi. Hih pawi vai tawh kisai in Standing Committee 6 kiseh aa pawlpi tuamtuam pan ahi hi. Tuate in Programe, Media & Information, Sound System & Music, Decoration & Usher, Security, leh Fund Rising Committee-te ahi hi. Sum bei ding vek pi a tawmpen Ks.400,000/- kiim bang bei dingin ki-ummawh hi. Cope topa' tangthu leh ama' hang a i minam buppi i khantoh zia laibuno khat bawl ding kigeel hi. Hih hun sungah Rev. Dr.S. Pau Khan En, Rev. Dr. Felix Lian Khen Thang leh Rev. Dr. Do Suan Mung -te a tuam vilvel in kisam ding hi. Hih hun sung thubulphuh dingin CCJC project masa sunga kigelsa mah bangin 2008 kum thubulphuh ding "Pasian aw; Na' nasepna adingin hong siahsuah in".(God in your grace; Sanctify us for you ministry) cih thubulphuh in kinei ding hi.Hun zatna, Bible study-te ah hih thulu tawh Siapite in hong makaih ngekngek ding uhhi.2010 ciang aa Zomi bup Pawipi malep ahih manin a kua maciat hanciamtek ni.Cope Memorial Hall Ading Huhna NgetnaTedim, Sangmang huang sungah pawlpi kideidan lo-in deihbang a zattheih ding Hall kilam ding hi. Tua Hall-pi lam nadingin Zomite sung panin Ks.100,000/- a pia zo ding muan le suan tampite sungpan mi 1000 kiseh ding hi. Tua mi 1000-te tungah a sawtlo in huhna Ks.100,000/- kingen ding hi. A kigingsa leh a thei kholsa in om tek ni.Tedim ah IP Star & ADSL Om TadingTedim, Lawibual venga Will Computer Service-te in a sawt lo-in IP Star hong thuah tading uhhi. Kumpi lam panin ADSL line kihong laiding aa mun tuamtuam tawh thu kizakna hong nuamzaw tham ding hi. Cope topa hong bawlsak Zolai tawh utbang in email kikhak thei ihih manin Zomite hamphatna leh i khantohna nam khat ahi hi.CCJ- Kalay Committee Pan Pawipi Ading Kiginna Ks. 5,000,000/- Geel KhinCCJ Kalay Committee in June 13 ni leh June 24 ni-in meeting nei uh a Kum 100 cin pawipi adingin a tawmpen Ks. 5,000,000/- (tulza sawmnga) peuhmah hanciam ding geelna nei uhhi. June 13 ni-in KVBC zumah meeting nei uhin June 24 ni Agape Ministries Center ah meeting nei uh a Pawlpi tuamtuam pan Pastor leh Upa 20 meeting kah uhhi. Tua thukikupna pan sum Ks. 5,000,000/- ngah theih nadingin; (1) Kawlpi khua sunga om Tedim kampau Pawlpi tuamtuam panin inn khat Ks. 1000/- tawh mapanna 2008 pan kipan ding. (2) Pawlpi tuamtuam pan mi muan le suan 100 teel in mikhat Ks. 10,000/- tek huhna nget ding. (3) Pawlpi ciat pan nipi ni sumpi don khat (Sunday Collection) tawh zong kihel in November 2, 2008 ni ngah zahzah puakciat ding.(4) T-Shirt, Calendar cihte tawh sum zonna neih ding.(5) CCJC -Kalay Committee tawh kizopna phualpi dingin KVBC zum, Kalaymyo (Ph: 073-21517) zat ding hoihsa cih lungdamhuai thute kiza hi.Hih meeting neihnate ah KVBC leh Agape Ministries Center te-in Breakfast lim mahmah tawh vaak zihziah uhhi. Topa'n a supna leh a beina khempeuhte a zah tampi in hong thukkik sak nadingin thungetna tawh mapang khawm tek ni. Zolai Tawh Tangthu (Novel) Laibu ThakTg. Suan Khen Mung (Zo Moong) ii gelh "Mong Neilo Itna" cih Tangthu (Novel) laibu hoih mahmah khat a sawtlo in kingah tading hi. Ei mite sungah tuadan Novel laibu kician a om masapen ahih manin lungdam huai mahmah hi. A kingah ciangin thapia ciat ni. CCJ-Hakha Committee Kiphuan2010 ciangin Cope topate innkuan hong tunzawh kum 100 cin pawipi khaam nading tawh kisai in Hakha ah zong Committee khat kiphuan thak hi.Tua pawipi khaamna ah innteek dinmun la in mapang khop theih nadingin Cope Centennial Jubilee- Hakha committee panmun lente leh kizopna mun ding anuai abang ahi hi.Patron ----- Pastor Ngem Khawm NiangChairman ----- Upa Thang Do CinSecretary ----- Upa Lam Khan MangMembers ----- Ciimnuai Christian Fellowship, E.C khempeuhKizopna phualpi ding ---- Ciimnuai ChristianFellowship, Hakha.Rev. Pau Suan Kam-te Unau Th. D. Kahta Tedim, Myoma veng a teng (Pa Gin Go Thang) leh Nu Dim Go Lian-te tapa Rev. Pau Suan Kam (General Secretary-CCJC, Academic Dean - TTC, President - Deihsakna Human Resources Center) leh a naupa Sya Nang Sawm Piang (Asst. Secretary- CCJC -Ygn Committee, Vice Principal- TCC) te Th. D kah uhhi. Rev. Pau Suan Kam sangkahna Lutheran Theological Seminary - Hong Kong hi-in Systematic Theology bulhphuh hi. A nau Piang' a pen Trinity Theological College - Singapore hi-in Old Testament la hi. Zomite sung pan unau nih in Doctorate sin khawm thei cih pen CCJ Newsletter pan angtanna leh lungdampihna thu i tangko hi. CCJC General Secretary Dingin Rev . Thang Go Khup (G.S;TBC) KisehA beisa hunin Cope Centennial Jubilee Celebration vai tawh kisai Central Committee ah General Secretary panmun hong sepsak Rev. Pau Suan Kam pen Doctor sinin Hong Kong va pai ahih manin ama' munah Rev. Thang Go Khup in tavuan hong lak nadingin muanna tak tawh kiseh hi.Hall Lam Nading GEC Family In Kamciam Pia Cope Memorial Hall lam nadingin Dr. Gin En Cin-te innkuan in Ks. 100,000/- piak ding Email pan kamciam piapah uhhi. Tua email pen sawtpi in a khak hi aa, Tedim email hoih ciang kimukha panpan hi. Pawlpi, minam kideidan lo-in deihbang a zat theih ding ahi tua Hall-pi lam nading tawh kisai lungdam huai kamciam zak masakpen hi-in tha kingah mahmah hi. Topa'n thupha hong piak sak ta hen! Amen.Cope Centennial Implementation Plan Manta 2010 ciangin Zomi buppi in Kum 100 cin pawipi i khaam zia ding a kicingtak in geelkholhna (Implementation Plan) Rev. Thang Go Khup ii suaih pen manta hi. Tua sungah pawipi khaam zia ding, hun geelna, Thugen dingte, Pahtawina piak dingte, sum zonzia ding, Nasepzia ding cihte a kicing takin kihel hi. A lunglutte in TBC zumah ki-en thei hi. CCJC Sum Lai-at Kilaih Kik Kum 100 cin pawipi ading kiginkholhna sum le paai pawlkhat hong lutta ahih manin Accountant dingin Syama Ciin Ngaih Hau (Office Superintendent, T.B.C) kiseh kik hi. Tutung i thu hong tam ahih manin a beisa hun a sum ngahnate a thei nuamte'n Treasurer or Accountant tungah nong dawp zawk nading un hong kithuum hi.Jubilee Ladingte Ading Lungdamna ThuKum 100 cin pawipi ciangin pawlpi kideidan lo-in Jubilee kila thei ding hi. A kum zong ciangtanna om tuan lo ding hi. 6 November, 2010 ni pen Jubilee hun in kizangh ding hi. Sum le paai ciangtanna om ding aa, sum le paai a haksate adingin gan(Vok, Bawng, Sial, Lawi) kiging khol le'ng tua pawipi sungah Jubilee kila thei veve ding cih lungdamhuai thu kiza hi. Jubilee late laibu a tuamin kibawl ding ahih manin a kigingsa in i om ding Newsletter pan kong theisak kik leuleu uhhi.Mi Thum Nasep a Sem Cope TopaCope topa in Zomite ading Pasian thu a puakpa (Missionary) , Zolai bawlsak in Lai Siangtho leh labu a teisak Lailetpa (Translator) , Sang laisim bu bawlsak in Zomite a pilsakpa (Educator) ahi hi.Rev . Dr. Cope Kivui Ni Kumpite'n Gambup Supna KilanghsakHakha ah Cope topa a kivui ni-in Naylor mangpa in Hakha aa kumpi zum khempeuh khaksak a, kumpi Laante khempeuh zong a laizang ciangah khaisak in (Half mast) supna, dahna lianpite kilangh sak hi. Pasian' nasem khat sihna hangin kumpi ii a laante a laizang ciangah khai-in kumpi zumte kikhak aa, dahna a kilatsak pen khamtung gamah a masapen leh amah bek hiding hi. Central Committee ah Pi Luan Za Cing KibehlapCope Centennial Jubilee Celebration, Central Committee ah Pi Luan Za Cing (Mrs. Rev. Hau Go) pen CCJ- Patron-te sungah kibehlap hi. Tua ban ah Rev. Dr. J. H. Cope' ii pawlpi leh a tu le tate tawh kisai thu le la khat peuhpeuh ah kizopna hong neihsak nadingin Amah tavuan kipia hi. Cope Centennial Jubilee Pawipi Ading ZawtnaZomite' ading Pasian thu hong puak, Zolai hong bawlsak, Lai Siangtho & labu hong teisak, Sang ukpi hong sem, Sang laisim bu hong bawlsak, Nuntak khuasak zia hong lamsang, A nuntakna hong kipia Rev. Dr. J. H. Cope topate nupa hong tun zawh kum 100 cin pawipi a nuai a hun in i bawl ding hi. Tua pawipi pen Zolai a zangh khempeuh, Khristian khempeuh, Zomi a kici khempeuh i khaam ding pawipi ahi hi. Tua ahih manin khual le tual, sim le maal, sak le khang a om Zomi khempeuh in sum le paai, thungetna, advice piaknate tawh i pankhop nadingin Khrih min tawh kong zawn uhhi. Tua pawipi a khaam thei dingin i omna tek pan a nuai a hunin kithawi sawmciat ni. Thu le la khat pepeuh theih nop a om leh a nuai aate ah kidongh thei hi.A Ni - November 4 - 7, 2010A Mun - Mission Compound, MyomaTedim Myo, Chin State, Myanmar.Thu Bulphuh: "Pasian' Zat Minam" (Pai.19:5-6; I Pet.2:9)Kizop nading Munte : (1) TBC office. Ma/ 86, Kam Hau Road, MyomaTedim. Ph: 070 - 50039, 50124, 50418.(2) KVBA office, Pinlong 8, Aungzabu St., Kalay Myo. (Ph: 073 -21517).(3) TBC-Y, Seikkantha Lane, Kyautthada Ts. Yangon (Ph: 01-379539).(4) Ciimnuai Christian Fellowship, Hakha Myo.Hakha (Ph:070 -21749; 21402).Kalay Myo ah Cope 98 Celebration Kinei DingCCJ- Kalay Committee-te makaihna tawh Kalay Myo aa Tedim kampau Pawlpite ah November 2, ni in 'Cope 98 Celebration' Pulpit exchange nei ding uhhi. Tua ni in Cope topa-te nupa hangin i hamphatnate leh 2010 ciangin Zomi bupi in kum 100 cin pawipi i khaam khop zihziah nading thute tangko in Pawlpikiim ah kikhop va siim ding uh aa, tuani Sumpi kingahte Kalay Committee ah ki-ap ding cih thu kiza hi.Editor …..Sya Gin Hau PumJoint EditorSya Pum Suan Mung Circulation managers....
Sya Zam Do NangRev. Vungh Suan Mung
Lawmte aw,     Hih Zolai kum 100 Pawi zatzia ding Sia Lian in hong khahkhiat ka muh ciangin lungsim hong lawng mahmah ahih manin ka laibu neihte ka phen samsam hi. Cope tapa in hong piak Cope topa bawl Labu leh laibu ka neihteng ka sim leh bu 14 na pha hi. Cope Topa zat Thuciam Thak bu 1932  pen innah (Shillongah) ka koih pen nangawn ka mitkha in mu dandan hi. Hih laibu ama khutma ngiatte pen 1989 kumin Valley Forge ka pai lai-in a tapa in New Jearsey pan hong khak hi a, Tedim Thukizakna tadensa copy a kepte tawh hong piakhawm hi. Hih Tedim Thukizakna leh E.H. East laibu Burma MSS pen Xerox bawlin Fuller Theological Seminary-ah Library a kep dingin ka pia hi.       Laibu ka etna sung panin 1975 kumin Lamka-ah Zolai Kum 50 cinna Magazine pen ka mu a, maan (photo te) ka etkik ciangin tua hun laia hong makaihte tu-in a tamzaw in hong nusia zo hi. Cope topa laibute sung panin "Handbook of the Chin Language (Siyin Dialect) kici pen ama gelh ka sak leh L.B. Naylor gelhna hi zaw hi. Naylor pen Tedim ah kum 9 Assistant Commissioner semin om ngei a, 1923 kum a gelh, 1925 kumin kikhen hi. Cope topa in Introduction a gelhna-ah hih bangin gelh hi.   " The Siyin is the official dialect of the Tiddim Subdivision. The Siyins are not the most numerous but their language is the best known of any outside its own country. The Siyin, besides being the most progressive man in the Tiddim Subdivision, is also the most widely travelled and he can be found in the most out-of the way places engaged in trade. Thus he is known and his dialect widely understood." ci hi.      Laimai 122 bek hi napi-in kammal sinna, tangthu pawl khat leh vocabulary tamkhop khat kihel hi. Tangthu sungah "Sizangte pien chilna tanghtu," (ama spelling zat dan hi), A kikenna htu, Pawl ni chimnue a, a kingawm ki na htu, Tuentak khua sat mihing nga a suen htu, Doi beak kipatna htu, Lai mangna htu" ci-in thulu bawl hi. The lost writing -Lai mangna htu cih pen hih bangin gelh hi. English tawh kigelh hi a, English version kong gelh zo kei hi.      "Zangpitam a teangte Kawlpi pan a puak savun laibu hkat a ne hi. Tua savun laibu shia ui-ina a ne kong hi. Tachiangina Kawlpi hkua a, a om a naupa, lai hil tu-ina, a upa-ina a sam hi. Tualaitakina Zangpitam hkhua mihingteina Tavak zo nak lo a hto hi. Tua lo lai-a lo hunna-ina tui bung hkat, kawlhtang hkat, tangtil hkat taw lo a hung hi. Kawl pana lai hil tu hong pai, a naupaina a lo hunna tui bung, kawlhtang, tangtil, a muciangina, 'Hibangte zong a vaw hte ahi ciang, lai am "ngawl tu hi, hong teamna a "hi tu zam' a ciinKawl hkhua a a chia suk hi. Tachiangina Zo mihing a lai mang hi." ci-in Naylor in gelh a, hih in Savun laibu i neihna thu na ciamteh hi. Spelling zat dan a kibat nawn loh hangin tua hunlai adingin hoih mahmah cih ding hi zaw hi.       Kum 100 cinna pawi a zang thei dingin Topa'n damna hong pia ciat hen la, nuam takin kizang thei leh cih i thungetna hi ta hen.
GKNang
No comments:
Post a Comment