Friday, September 3, 2010

Zomi Peemtate Zuau ngen hiam??: Murlen

Posted by: "Zomi Zokhai" zomizokhai@rocketmail.com ciimnuaizogam
Wed Feb 4, 2009 4:24 pm (PST)
ZOMI PEEMTATE MIZUAU-HIAM?
(Are the Zomi Refugees liars?)
Zokhai pan-in

Tununglam-in ZONET laaimaai-ah Peemtate zuaugen cihbangkhat ka-mu ngei-a, ahizong-in keima' kicinlahna hang-in ka-kuppih ngeiloh hang-in kana lungngai theizeel-a, dawnna leh lahcianna kician-khat suahkhiatding ka-sawmsawm tu-in hong suahkhia kahihi.
(Mimal, pawlpi, behlehphung kuamah sukha lo-hi)

Khatna: Banghang- in Zomite-in Zogam Nusia uhhiam? Ahihkeileh Zomi Peemtate-in Zogam Nusia takpi uhhiam?

Dawnna kidang tuamtuam omkha-thei dinghi.Tua hileh ami mahmah donglehang, "Zomi peemtate-aw, Zogam nusia takpi nahi-uhhiam?

Hih nangawn dawnna kidang tampi omlaai khadinghi. Ken hongdawng pakning. "Zogam-aw, ken hong nusia peuhmah lohi'ng. Ka sung-ah na-om den-a, nangma' pualam-ah kei ka-omhi. Ka omnana-ah vangikpi bang-in ka-hongkeng tawntunghi.

Tuahi-a, Zomi peemtate khempeuh' lak-ah Zogam anusia taktak khatlehnih nangawn omding-in Iseh lohding thupi kasa-hi, banghanghiam cihleh nangma' lungsim sung-a athaamden, ateengden sil-khatpen anei gige, akikhenlo, nangma' neihsa ahihi.

Zeisu nei Icihtezong alungsim sung-ah Zeisu' thu alungngai tawntung, Zeisu' deihbang-a nuntaak zawhding ahaanciam niloh, Zeisu' hoihnate asimden mite Zeisu-nei hi-a, tuamahbangkeek- in na lungsim-ah Zomi cihkhat Zogam cihkhat na-vomlingleng, na-puakliklek, na-neihkiukiau- pen Zogam-tawh akikhen na-hihlohna ahihi.

Nihna: UNHCR ahihkeileh PR Ngetna-ah Zuauthu Genmaw?

Zomi Peemtate akuamapeuh zuaugenna lotawh UNHCR ahihkeileh "Kawlgam ciah ngamnawnkeng" ci-a gennading munkhempeuh- ah Kawlgam-a, eima' kumpi-nasepmaw, khualzinmaw, biakna upa sepmaw, sumzonpaaizonna cihlel te-tawh hong kisaangding hi peuhmahlo ahihman-in "Kawlgam Ciahleng hong Kiman dinghi" cih kammal akip theitheiding- in lahsil leh lahthu te-tawh akilawmpen ding-in geel-in na-gen uhhi.

Kaalhelhpak: Sanggamte pawlkhat-in, "Hihbang zuaugente Pasian-in deih kenteh, mizuau" hongcihleh hehna dingleh lungkiat nading omlo-hi, banghanghiam cihleh amaute-tawh akibang I-hihi. Ahizong-in bangbanghileh Zomi Peemtate zuaugen na-hihna-uh amasa-in kiphawkding thupi leh akisam mahmahkhat ahihi, banghanghiam cihleh zuau nagen uhhi.

Zogam ahihkeileh Kawlgam sung-ah eima' anneek tuidawnding, silhleh teending mahtawh abuaibuai leltak kimlaai, gamdang I-pai uh-a, Pasian' Hehpihna kicing ahihman-in I-tunna gam-ah ahihkeileh pan-in gamnuam-a teentheihna lampi hong kihonsak ciang-in Zomi a-awlmawh ngeilo mi-khat inzong hong awlmawhthei, Kawl Gaalkaap kumpi amuang leh a-it mahmahte nangawn-in, "Ciahthei nawnkeng, gaalkaapte-in hong that dinghi" ci theita, nidang-a gensiasia-a alangpanpan Democracy ki-uknabang adeihmahmah bang-in kigenta, banghang? Gamnuam-ah teengnuam! Himahhi, hihbekbek nangawn ameet hikhinzo-hi.

Tuahi-a, gamthumna-a ateeng Zomi Peemtate zuaugen vive na-hihna-uh mangngilhlohding ahihi, ahizong-in tua nagen zuauthu ahihkeileh mite-in zuauthu bang-a hong ciaptehsak thu-pen tuni mahmah-in zuauthu hinawnlo-in ataktak hongsuak-hi. Bangcibang-in?

Zuauthu pan-in Thumaan

Gamthumna ahihkeileh UNHCR te-in hong saan nading-in bangteng gen na-hihiam?
Gentehna-in, "Ka khua-ah Tuiphuum Pawlpi khangno makaai hi'ng. Pawlpi' ading thelnahleeng kagelh-a, itna leh minam itnading thukhahte gelh kahihman-in gaalkaapte-in hongmatsawm" ci-in kapdek liang-in nagen-hi.

Gamthumna ahihkeileh UNHCR te-inzong hong hehpih-a, gamnuam-ah teentheihna hongpia cipakni!

Tu-in gamnuam na-tung khinta-hi.
Tua na-pauhlap na khua-a Tuiphuum Pawlpi' nasepna naakpi-in sumtangtawh huh-inla, itna leh minam itnading thu-te piakkhiatna- tawh lakkhia lecin atung-a "Nagensa zuauthu-pen hong taksuah pah-a, thumaan thamlo-in Pasian' deih nasepna lianpi aseem-mi nasuak dinghi." Telthei ding-in hong um-ing. Akitel keileh adangkhat:

Gamnuam-ah hong kisaan nading-in, "Zomi Nam Ni-ah thugenna ka nei-a, minam itna akhan nading naakpi-in thu kagenpen gaalkaap kumpi-in hong nungdelhpah ahihman-in ka-hong taai-hi, Kawlgam ciahngam nawnkeng" maaimial ngeungau liang-in nacih ciang-in uliante-in hong hehpih-in tu-in gamnuam na-tung khinta-hi.

Tua na-pauhlap thu-pen natunna gamnuam pan-in Zomite' ading cimawh huhna-a kipan, minamvaai mapannate-ah nahihzawh ciangciangtawh sumlehpaai-tawh na-huh takciang-in tua nagensa zuauthu-pen hongtaksuah- a, Pasian' saantheih naseem hoihmi nasuak-hi. Adangkhat enlaaini.

Gamnuam-ah teengnuam nahihman-in Kawlgam sung-ah bangzah-in kumpi-na seem-in lawhcing, biakna-na seem-in lawhcing, gaalkaap ulianpipi nahi-a, gaalkaap ulianpipi te-tawh naseemkhawm ahihkeileh khamtheih zatui-tawh lawhcing-a mihaupi nahiphial zong-in, Democracy ki-ukna cihkhawng theilo ahihkeileh deihvetlo khinsa nahiphial zong-in, "Kei-pen ......' hangtawh gaalkaap kumpi-in hongmatsawm ahihman-in ciahngam nawnkeng" nacih man-in gamnuam-ah hong kiteengsak-hi.

Phawmawh peuhmah lohi! Sanggam-aw, nidang-in bangbangbangbang nahi-a, gaalkaap lianpi nahi-a, numeikizuakte' makaaipipa nahi zong-in abeisate abeisa ahihi. Phawmawh sa-peuhmah kei-in, banghanghiam cihleh athupipenpen tu-hun, tulaaitak ahihi. Tu-in na nusiatna Zogam leh Zomi' ading, nabiakna pawlpi' ading, na khua' ading-in nahihzawhzah- a sumtang nakhaak ciauciaute-in na-zuaugente thumaan suaksak khinzohi.

Abeisa hun-in akihhuaipenpen nuntaakna-tawh akidiahmi nahiphial zong-in Zeisu Pasian-in abeisa a-en-a asuutkiikkiik, siatthuk ding-a honggeengeen Pasian hilo, tu-a nakikheelna, tu-a silhoih nabawlna leh na-hoih nasepnabek hong-en ahihi.

Tuahi-a, alangkhat-ah, gamnuam tungkhinta, minam- meel, unau sanggam-meel, pawlpi leh khualehtui-meel theilo, ciipihsapihzong awlmawhlo-in nangma' aituam nopsakna bektawh gamnuam nazat zenzenleh na-zuaugente zuauthu taktakmah hi-a, tua zuauthu akhan nading-in singno tuibuak bang-a tui abuakbuak suakkhinta nahihman-in nang' sung-ah St. John' cihmahbang-in thumaanthutak omlo-hi.
Azenzen-in "Ko' khua-ah hausa ahihkeileh khangno makaai ahihkeileh biakna makaai kahi-a, itna-tawh ka-nasep' ziak-in gaalkaap kumpi-in hongmatsawm" aci mi-khat atunna gam-ah zukhamden (eimi-bel omsaamkein i) cihpeuh- a hong nuntaak ciang-in akhua atui, apawlpi' dinna Pasian azuakthaang, adaisak hongsuak mawk-hi. Tuabang mite' zuaugenna-pen naakpi-in siahuai-a, amahle-amah hell khuuksung-ah akisawnpaai ahihi.

Hihthu Zomi Peemtate' ading-a aphawk-huai penpente' lak-ah khat ahihi.

Zokhai

No comments: