Friday, September 3, 2010

Sa-aih, Gal-aih leh Ukpi thu

Khuahunte hong kihei hong kikhel denden in huihkhi damsem hong nung hiauhiau ciang, zankhua sawt phalbi daidam tuang hong tung khiankhian zelta hi. Huihkhi seep in singteh pulhte hong ging sialsial a, banglo kal khatin theinosih kha zong ahun avai teng a zo khin ding hong hipak ziau a, a nung amaa a zomto ding Tunkha zong hong kithawi litlit in tunkha huihkhi gimte hong nam hiauhiau hong nam ciaiciai ta a, zo tu zo ta lamlawp zomi nam ni gim zong hong nam veuveu ta hi. Zomi nam ni hong tung zel in hong khangtak semsem keeita aa a hizong in Zogam din munte ki lamdang zuahzuah taktak nai lo hi. Hih pen alungngaih huai mahmah thu khat hiding hi. Tua ahih manin tangtawng akipan tuni tuhun kikal hunsung teng khempeuh a zomite nuntak khuasak kalsuan ziate a banban in ih pheklek dikdek dih ni.



Sa-aih

Ganhing khat peuhpeuh a sisa hi-a a hinglai ahi zongin luang khat kici hi. Milip siamna hatna thazung thatang tungtawn in gawh leh lup, neihsa lamsa kilamdang dimdiam ciat hi. Tua tungtawn in sapi a kici Sai, sahang, kamkei, vom, humpi a-kipan van-a leng vasa, sa nautang tampi a manzote zunungin kipahtawi a tua pen sa-aih kici hi. Mi matsa va laksak va suut va guuksak cihte hilo in mimal siamna hatna ngiat tawh a kimante ahi hi. Vokno khat akno khat bek a hiphial zongin a gawh uh ciang amau guak in nesim lo uh-a beh leh phung, u leh nau tawh ankuang umkhawm ngeingai ngiatzen uh a, tuapen a nopci mahmah tuan pupate nuntak khuasak zia ahi hi. Ki pahtawi a siam ban vuah a ki nekngaih mahmah lam uhzong kilang mahmah hi.


Nasep silbawl lampang ah kuhkal leh cihtak ban ah nasep hahkat mahmah sawnsawn uh a lo zapipi kho deda in khawhsa khawisa kham mahmah pikpek uh hi. Ankhing ansa a giautau ngei lo uh ahihlam zunun' sa-aih te in hong lak sinsen zen hi. Mi khat innnkuan khat bek cihlah himawk lo, beh leh phung u leh nau, veng leh paam tawh kal khat sung dipdep a saun a zan cihmel zong omlo, zu leh sa lak ah kidiap in lasa in lamlam lel uh hi. Tuhun banga khat leh nih in peekzen in dawn keei khaam keei in ah, a innkuanpih ten nna nasem cihlah himawk lo, a bawngbawng a khilkhil in kal khat cip vilvel bang, lu leh taw phawk lo zen in zu dawn an kham hikeei napi nek leh dawn ding ki taasam aa linglawng patau cih omtuan se lo laizen hi. Kua khan' kua nuntak zia a phawk kha hetlo khanglui mite nuntak khuasak zia ahi hi.


Hih bangin gualnuam nunnuam kisa va bang tawn, nga bang lamlam mai in khat leh khat mawng bang kikawi thipthep laitak, va bang len'lai hun nuam in theiloh kalin lenmual ong khupsan khiankhian ahihlam kuamah in phawkkha het lo hi. Koi pan hong leng a zogam tual munnuam ah tuang hong tung dihzen aihtam, Zogam khim bang hong ziing sak, zo ta selung hong mawl sak, holung tuak nuihciam lel in khawlkhop laitak vei leh tak ah sam gi bang hong khen in mulkim na thagui teng asat tat kilkel, nolh lah gal-aih hong op in hong keuh khia laizang hi.


Gal-aih ( Tual gal )

Khang khat leh khang khat bel kibangden cih om het lo sam a a tawm a tam in kilamdnag hamtang hi. Mi ommuang hithiat khat that lum, a ngawng bantan in innlum lolum ah zunung in pawi bawl a tua pen gal-aih kici zen hi. A cihtak het lo thu leh la tuamtuam hangin khat leh khat kikal tawm kilungnopmawhna, ki tot kiselna pan ahizong in, khua phawk het lo mi ommuang mi nungta hithiat khat ahizong in mulkim cikzia cihte om hetlo vapai dildel in va that hiat anuntakna laksak ciang tawh lungkim zo lo lai in ah a luu leh a pumpi khen, angawn bantan kilkel in mihing lutang takpi suang veuvau in thahat ngal hat kisa, gualtung tuang kisalua kisa gal man ingh cizen aa a ki pasal sak mahmah pu pate ki phasak zia hizen hi. Pasal khat in akhan' sungin gal amatleh a khan'gual dep pasal taktak aa a kiseh tangial helzen uh hizen zawzen zen hi. Khawisa gan go cihlah himawk lo, gam vak a sapi salian man a lungdam kiapk cihlah himawk peuhmah lo, mi
leh mi mihing citciat ki that ngiat himawk kikeuh hi.


I nuntakna hong kilaksak cih gengen loh lungmuang tak a i om dide laitak khat peuh in thakhatthu in hei ! hong cihvat vek zong kilau lua ki patau lua kisa ih dip diang pah saisai in kisai pah daidai hi. I ci ii sa zong hek lo, na lo ahih samhang in dip kisai bel dai pak het lo hi. Tua hi-a mi ommuang hithiat kimlai khat va that giap cimawk pen a innkuanpihte ading in thuaknop het lo baih hetlo ding hi, adip uh kisai lua kisa am sesa ding daipak mit pak het lo ding hi. Ih neihsa ii lamsa banglokhat peuh hong kiguuk sak bek zong ki lungso mahmah ki lungham mahmah cileng, ih innkuanpih khat hong ki that sak mawk peuhmahleh lungso lua kisa phul nounou mai ding hi. Pasal khan' khat sung ading in gal leh sa amat ciang pasal takpi a kiciamtehna te hangin nam khat leh nam khat, beh khat leh beh khat, khua khat leh khua khat kiban phial ziahziah kiban vel ziahziah in, a ngah hak mahmah a manpha mahmah mihing nuntakna hun lo phaatlopi in hun tawmno khat
sungin baihno tak in ki beisak zual ziaulel mawk hi. Mihing nuntakna a bei ni, mihing khat that zo kisa zu nung sago lungdam kipak in lamin diangdiang cih tangial bangzah tak in lipkhap huai leh mulkim huai, mi dah kisa kap ziahziah khitui naptui tawi kidiah laitak pasal kisa lua kisa lamlam daingdiang cihzong a ngaihsut hak mahmah khat ahi hi.

Kiim leh paam pan a ih zakkhak thu leh la, i sim khak laibute i ngaihsut ciang pu pate khan'siat zia bel cikzia huai lua mahmah hi. Ngeksen kisa nahtang laingek a bang ngieingeii puan bangin a zaw niknek, pat bang aa a nel niknek naungek in a tunnu anglum nel niknek ah kual ngieungeu a lungmuang takin anu nunkhum a tep ciauciau laitak khat peuh in a nu ngawng bantan, sisan naisan lakah nawi duh aa a kap a kipeipei tua naungek omzia ding leh kahna awging dingte kuan muin kua in za ngam ding hiam ? Innkuankhat nek leh dawn ding zong a vaikuan khia khat, lamkal ah khat peuh in suamlum, a zi a ta ten zua vailo kuan vaitung ding kal ngaklah kisa ni kaai ciang sialkong lam maimit suanin khuadak dimdiam tamahleh lamet bang aa innlum a zuankik theinawn lo thu azakkhak uh ciang bangzah tak in a laitang uh ana zentam tua lungsim dipngek natna tehkak saikak pih ding aom diam ? Bangzah tak in khasiat huai hihbang khasiatna dahna kahna khitui naptui
namkim ih gam ih lei tungah bua in aluang ngei himawk zen hi.


Ukpi hun

1852 kumin ngapik gam vekpi dektak ding khawng ala mangkangte in a dum dideuh den, etlawm mualkuam nunnuam zogam/lei pen janggam pan in hong gal-et teitai, hong t kai etet uh a, linglawng lauthawng pipi mah in hong gem khiankhian in hong sim pongmawk uhleh 1896 ciangin zogam buppi la zo bilbel uh hi. Zogam ah lau pipi mah in hong lut khuankhuan uh a, mipi nget ahi peuhmah lo, ukpi-ukna hong puak uh hi. Ukpi icih a mau thahat ngalhat na tawh tuhzawh man leh pilman siamman a, ukpi za a ngah uh hi lo hi. Leitung mun kici teng ah gam keek kawikawi ahi, mangkangte zinpak, mangkangte guat gamh ahi hi. Hih ukpi ukna hong khan' takciang in khat leh khat cikzia mulkim cihte om peuhmah lo aa, amual aguam a inn a lo ah, leitang tualtang kisatna, ki phialvat ziahizah in pasal khan' kidemna, gualtung tuanna, khangual depna aa a kinei, gal-aih nate guah bang in hong theu hi. Beisiang kikeuh cih ahihpah lian loh hangin khallai tui kiam mah bangin hong kiam
mahmah hi.Hih pasal kisakna gal-aih kidemna te a ukcip, a humcip, a kemcip bikbek zo dingin huusa a khauh ukpi hong khang/piang khiat pen Zomite hamphat mahmahna khat ahi hi.

Tangtawng pekpek akipan kumpi, ukpi a nei ngei ngiatlo, a suak masa sa kumpi ahihzah khatin khat ukcip bikbek cihzong baih kisa lo, nuam kisa peuhmah hetlo aa a beisa hunlui laite mah bangin suakta takin ki khuasa hithiat nuam ciat zel hi. Hihbang kawmkal ah ukpite in tangpi tangta tungah kilawm kituak hetlo-a Siah donna, tha man pia lo a tangtha cialna hong neih uhciang, a daikdiak in mizawng daipam tagah gentheite pawlin haksa hong sa mahmah uh hi. Neihsa lamsa a lim a al, khawhsa khawisa sunsun Siah kaihna leh thu neih nate waung zat luatnate hangin gentheih liangvai aa a om, tangpi tangta in in deihphatak in nial in abul azungin long khia, kalh khiat zawh nading ki hanciam aa a sawt lo in a gah kilo in, tangpi tangta lunggulh mahmah ahi, suakta tak a nuntak khuasak hithiat na ( democracy ) huikhi kidiik hiauhiau hi. Hih ukpi-ukna nolh kik zawh ni pen Zo minam ni ahi hi. Tuani pen leitung pianzawh zomi bup a maitai khop ngeingai ni zong
ahi hi.


A hang tuamtuam hang tawh Sa-aih gal-aih, ukpi hunte abanban in hong beito deudeu in khang hong kilumlet ziazial hi. Ukpi hun abei lianleh a tawntung aa a nungta den tawntung Pasian ih biak nate hong ni khan denden in christian nuntak khuasak kalsuan nate lak ah, khat khit khat abanban in i kidiah deudeu a tuni thuhun ciangin dawi thoih khattasan zong kiom nawn peuhmah het lo hi. Leitung khantoh zia te phamat zo lua kisa khuapi minthang kici teng ah, lungmuang maingal takin sung tum pusuak hiathiat ciatta hi.

I lungsim i ci i sa te kaikhawm ngeingai in a beisa hun paipi thum te i lungngaih dide takciang asuuksan mahmah, a khasiat huai leh a lipkhap huai mahmah ahi, gal-aih hun sungin Zomite nuntak khuasak zai tawknawi pen ban ah mailam nuntak khuasak zai ding maban tampite zong a khaktan pen ahi hi. Pasal khat in a khan sung in gal man in gal a-aih leh, pasal cingtak pasal taktak in a kisehna huuhau in cikzia, mulkimna thagui teng kitat kikeel a, tun sung khat piang u leh nau, ci khat sa khat, minam khat gegu ki banphial ziahziah, amual aguam a inn a lo cih om lo, mel leh puamte khen nawn lo in kisingsat ki suangsat ziahziah lelin sisan naisan kitheh khia kawikawi a, dahna khasiatna khitui naptui in lei maitang zel dikdek ngiat hi. Hih gim khempeuh kisawp siang peuhmah lo, ahicipi in kikoih aa a khang khang in ki nelhsiah den a kidiahcip bikbek den tawntung ahih manin tua guu leh gau, tua gim nam huuhau in Zogam Zomi pen ngum den napi palhkhia
thei mahmah lo hipelmawh ding hi. Ih theih lianloh hangin hih guu leh gau teng lell aa a ki lal khiakhia khawng zong hikha ngelngel ding hi. Khangthakte in khanglo in ih khuadak ding a Zogam Zomi khangto nading a kitangsam pen ahi, Zogam Zo lungtang teng ih hah siang zawh nading ih pil ih siamna, ih tha ih ngal, neisa lamsa sum leh paai te gawm khawm ngeingai in Zogam leitang tung ah, Gam siansuahna pawipi khat ih bawlzawh nading mimal khat ciat hanciam ciat ni. Khangthak langlam Zogam siansuah ni ding kal a lamlawp mahmah zogam leitang in hong ngaklah mahmah gige hi.

Zogam zomi a it a vei ngiat, gam leh minam khangtoh ding a lunggulh mahmah te in vai thupi, nasep lian mahmah khat anei ih hihlam ki phawk ciat ni. Zogam leimaitang a tuamcip sisan naisan, khasiatna lainatna khitui naptui teng khempeuh i hah, i sawp siang silsel ding hi. A beisa hun sung a pupa khut khialh ban khialh nate tungtawn in khua khat leh khua khat, minam khat leh minam khat, beh khat leh beh khat kikal mawhmai sak nate ih kingen ziahizah tek ding a, ih khutte kilen dimdiam in ih Pasian leh ih gam lei tung ah, ih tangko khia ngiat ding hi. Tuani ciangin khang thak langlam, zo ta lungtup zogam zang ni, kuivum dawn pan mel namkim tawh hong suak sihsiah ding hi. Tua lungdam luankhi i nul ding kal i ngaklah mahmah tek hi.


Note itna sungah,

thawthawn
( tawmvei )
Malaysia.

No comments: