Friday, September 3, 2010

LEITUNG BUP ZOMI KIPAWLNA

LEITUNG BUP ZOMI KIPAWLNA

I minam min man taktak "ZOMI" le hun khat lai a hong kipia
tawm "CHIN" cih min nih pen koi hizaw ding ci-in tuni dong a buaipih
pih ki om lai hi. Zomite pen Sengam Mongolia minam pan i hi a, i pupi
Zhou suan le khak "ZO" minam i hihna Zomi tangthu sulkante in Zo
Dynasty pan kiciantak mukhia hi. Tangthu i cih pen a taktak hi in
phuahtawm theih hi lo hi. Midangte piak tawm min tawh buai buai se
loin, i hihna Zomi mah kipsak sak suk thek leng kiselsel kul nawn lo
ding hi. Khatveivei a gam, a mun le a hun zui in Chin i kicih zel sam
hangin ei le ei sung taktak ah Chin a kici nuam kei a, Zomi mah i kici
nuam veve hi. A beisa 1952 ? hun in Rev. ST Hau Go (late) in
thumuhkholhna tawh Zomi Baptist Convention(ZBC) na phuan khia in kua
mahin nial thei lo hi. A sawt lo mahin Zomi Theological College(ZTC)
etc.. hong piangto leuleu in tuni dong mah kuamah in kinial zo tuan lo
hi. I cihnopna ah tuphingphing in i minam min tawh i buaibuai sangin i
hihna taktak mah ahi "ZOMI" mah tawh leitungbup Zomite i kipumkhat
zawhna ding hanciam huai le Pasian deihna khat zong hizaw kha ding
hi.

Tuhun semsem ciangin Zomite leitung kiuli ah i kizel ta a, i
tuntunna munah Chin min sangin "ZOMI" cih vive tawh kipawlna le nasep
khiatna i nei thei zihziah hi. Biakna lam zong ah Zomi Christian
Fellowship cih bangin i nei hi. Gtn: USA leh India a te bangin Zomi
World Cup ci-in kimawlna tawh kilawmtatna nung sungin nei uh a, kawlpi
pan ZOFA te in zongnung kha sung mahin nei khin uh hi. Tua ban ah
ZOMUS,ZCLS;ZYA, Zomi Network International leh Zonet(Internet) lamah
cih bangin Zomite khantohna ding vive tawh "Z" min tawh nasepnate i
nei zihziah lai hi. Hihte khempeuh i et ciangin a khua khua, a munmun
leh a gamgam pan kiphuan khia ciat hi in, a leitungbup Zomi khempeuh
in kitheihpih omin a kitheihpih zo nai lo zong om mawk hi. A hi zongin
i ngimnate pen thupi in lian theithei mahmah hi. I gennopna ah
kipawlna leh nasepna tampi i neih zahin leitungbup Zomite a huam zo
lai ding, kipumkhat theih semsemna ding kisam lai hi hang.

Nung kum sung leh tu sung teng a kipan in, Zomite nisim manlang
thukizakna i ZONET pan leitungbup Zomi Kipawlna (Global Zomi
Association) cih khat neih zawhna ding lunggulhna tawh kamkikup
nawina om den hi. Tua kikupnawina ah a kigen pawl khat; (1)Kipawlna
mi ding kikupna thupi khat om masa leh
(2) Gam sung gam pua a om i mipil misiamte makai in kitel in hong
makaih thei leh,(3) gam tuamtuam leh mun tuamtaum a kipawlna omsate
pan makaite pen Member dan hipahpah leh,(4) Hih leitungbup Zomi
Kipawlna in kumsim (or) kum ? halin kikhoppi nei zo leh,(5) Hih
kipawlna nuai ah i neihsa kipawlna tuamtuamte leh a kisam lai
Department tuamtuam te zong nei zo lai leng, (6) Hunsawt ciangin
minam kician khat hihna dingin UNO nangawn ah pulakna nei zo lai leng
cih bang danin lunggulhna ciat kikupnawina nasia mahmah hi. A ban
tampi Zonet simte in thei ciat ding hi hang.

Khai le!!! Nang bangci ngaihsut na hiam? Muhna gawm tuah ding
kisam mahmah ta hi. I minam khantohna dingin Zomi khempeuh theih
kimpih ding khat tuni dong kinei zo nai lo hi. Tua bang a kipawlna
zaipi le a lianpi i neih zawh loh manin i minam sungah khantoh zah
ding leh i kihuh kipanpih zia ding kisaim loin khat le khat zong
kimeltheihna tam thei lo hi. Tua bang in kipawlna lianpi nei zo leng
Zomite in i neihsa kipawlna te leh i ngim i tupna lianpipite
leitungbup Zomi Kipawlna min tawh manlangtak sem zo mengmeng ding hi
hang. Tua ahih manin i minam min peuh tawh i buai buai sangin,
leitungbup Zomi Kipawlna khat nei mengmeng zo leng Zomi, Zo tate
mainawt semsem zaw ding hang a, Z- Zomite hanlung ciam khangto diam
!!! i cihcih hong taksuak ding hi ci in Minam deihsakna tawh kong
pulak khia hi. Ngaihsutna tawh kituak lo a om te kikum khawm ni.
laisim mimal kim Zomite Pasian in thupha hong pia ciat ta hen..

Minam a ding naseppih,

Tongsan Pu(Sia Khampeek)

No comments: