Zomi Video thak SIAN ANGLAI AH Bel Bang Velna

Posted by: "Hau Za Cin" suante2002@yahoo.com   suante2002

Thu Dec 23, 2010 7:26 am (PST)

Zomi Video thak SIAN ANGLAI AH Bel Bang Velna

 
Video Min : SIAN ANGLAI AH Dr. J.H.Cope
Director : Evan. Langh Do Khup, Founder, Tears Gospel Ministry

A hawmkhia : Tears Gospel Video Ministry (TVM)Bawl Kum : 2010 November 
Video Clip : http://www.youtube. com/watch? v=XACO9HwcpU0& feature=related
 
Ciamteh masak ding: Khitui Gospel pan ahih manin hih video na et ciang na khitui a luan leh kisuanna ding omlo a, a lamdang zong hilo hi. A kul leh mei sumit zaw  inla, suakta takin lungsim thungetna tawh na khitui luangsakzaw in, tua hileh a muhnopna na telsemsem ding hi. No holding back please, suakta takin aw...  
 
Mite tuipi tung, huihlak ah leng in, mualdung kenlak pen nangawn ah khe tawh pai nawnlo in mawtaw tawh a kileh ziahziah khit uh ciang Zomi te silh leh teen nangawn zang thei nailo in om uh hi cih teltak in hong lak masa hi. Tua zawh ciangin 'pilna' i ngahna ding, mite i phakna dingin LAI hong bawlsak a, a tawpna ah nang leh kei leh leitungin zong hong piak theihloh KHA SIANGTHO hong neisakin dawi leh kaute hong hawlkhiatsak in pumpi cidamna bek hilo tangtawn nuntakna zong hong puak hi. Tua hong piak khempeuh lak pan a thupi pen LUNGDAMNA THU GOSPEL ahi hi. 
 
Jesu hong gup Lungdamna Thu Gospel hong piaknop manin i buaina, i haina, i namneu lungsim (enthnocentrism) khempeuh hong paihkhiatsak in, a kilawm, a pilvai, a khantoh huaizaw nuntakzia tawh hong laihsak a, dawi leh kaute hanga damlohna, zi leh ta in kineih theihlohnate khempeuh hong phiatsiang sak in a siangtho a limci in hong kalsuansak hi. Tuate khempeuh ni khat thu hilo, zan khat thu a khuttung lumleh banga a laih ziau hilo in a zi Elizabeth tawh amau nuntakna nangawn pia a hong sepna hang uh ahi hi. 
 
Tua Lungdamna Thu hong puak John Herbert Cope, Zomi te in it leh ngai taka Cope Topa ciin a sap pen uh ahi hi. Aman bang gen hiam cih leh,"Lai pil mahmah le uh cin kilemna piang ding hi, lai hahkat mahmah un.." ci hi. Tuni in ama gen a tangtun nai kei leh ama gen a kihih nailo cihna hi kha ding hi. Lai thei un cilo a, lai panin pilna nei un, lai sim unla pil un ci hi. A sim thei ciang hong deihlo a, pilna ciang dong a ngah dingin Cope Topa in hong deih hi. Lai hong bawlsak zawh kum 97 a cin laitak in ama hong ngimsakna tan i tungta hiam, tu zawh kum 3 ciang Zolai kum 100 cing ding hi... i tup khuamual i suah diam? 
 
Awle, thu thum ngaihsun pak leng:
 
1. V-A-S-A = Sava ci den keei leng bang i suak tam?
2. Na it mahmah na lawmngaihnu, na lawmngaihpa tung sunni tawh tum khawm ding hileh bang na cih tam? 
3. Mihing pilna leh siamna khempeuh a bei ciang na it penpen na ngaihno a nuntakna hu nuam lecin bang na cih tam?
 
Tuate khempeuh hih SIAN ANGLAI AH video sungah kikhum khin hi. Na et kawmkawmin na lungsim ah dipkuatna, dahna, hehpihna, lungkiat dimdemna tampi hong om ding hi. Tuate khempeuh zawh ciang Gospel hanga Lungdamna Khitui luang ngelhngelh hangin hih video a hoih mahmah na leh, a bawlpa Sia Do Khup a siam mahmahna hong kilang ding hi. Tam genlua kei ni. 
 
Thangno (Mang) leh Cingno (Nuam) te lah siam, a ki itna uh lah khauh, neih leh lam in buaisaklo, Zomi te'n thupi i sak penpen ITNA bek mah masuan uh, bangmah in khenzolo, Kau neih hangin a nu leh pa in khen in Ni nungzui in zawhthawh thu tawh kizawng mah leh Cingno lungsim kikhel tuanlo, Thangno itna lah bei tuanlo, ITNA bek masuan itna pen a lamdang penpente himawk ei. La 1na, a nuai lamah na en lecin!
 
Thangno leh Cingno te video masa te mah bangin tutungin zong a hoihtuam mahmah na pen Thangno leh Cingno a lungdam ciang puan vaak lam vive silh uh a, lungkham hun ciang puan mial lam vive silh uh hi. Tua pen a hun amun ah kizep siam, fashionable, hita hi hang. A gel, director te siamna hong kilangsak hi. Mual tungah Thangno leh Cingno te kihelna (dating) ah akizepna te uh na en lecin.... 
 
"... i kingaih a sawt hang tun hong kawi ngam pan ing ei Cingno..."
 
"...u Thang na khut a bangci a hia?"
"Tuzan ka ci hong na gawp mawk, si bup keei, ka khanlawh ciang ka khut ka khe khau a gak gawp tawh kibang, hong san gawp kei..."
"[...lah na hi takpi zen a maw u Thang, hong ngai ngel hi veng maw u Thang...].."
 
"Tuni hun nuam i zat masak ni pen hi inteh mate Cingno?"
"[A patna leh a tawpna hingel ven cin maw ... bangdia a 'sianglo' hi sese na hia u Thang..]"
 
"Bangdia kap mawk na hia Cingno?..... "
"[Ken hong ngai lua hi veng maw u Thang, pammaih zen si cia maw...!!]"
...........
...........
 "... u Thang, mangpha"
 
Cingno in a theih Thangno in thei hizen leh Cingno khitui luanna hang thei ding hi-a maw! Cikciang a thei tam maw? Thei hileh bang acih tam? Bang hanga Cingno in a theih thu Thangno kiangah genlo ahi tam? A lungsim ah om thute amah bek in gen a, amah bek in za in, Thangno in a cihna ding theilo in om hi... ki itna i cih zong a baihlo hi mawk ei... Thangno leh Cingno te aw....
 
Lungnopna tomno: Cingno in a samzang Gal Ngam dawi-ai tawh kiciamin luipi tui sungah a phum pen a omloh ciang a u Thangno tawh zongin a lungkiat dikdek khit uh ciang Cingno in a tuamna puannel mu a, lungdam lawplua in a u Thang a ko hi.. :
 
"U Thang ken hiah mu..... "
"Aw himaw, lungdam si hang e Cingno..."
".... ka lungdam lua... 
"Awi...! om nawnlopi... ken hong paisan taktak ding kaive maw"
"... Cingno, a bangci mawkna hia..."
 
...ahi zongin a puannel bek om a, a samzang ana omnawn kei hi. A samzang a muh nawnkei leh tung sunni tawh tumkhawm dingin kiciam ahih manin lamet na khempeuh bei a, sunni lah tum dingin mualdawn ah kisuangta hi. Aw, tua tung sunni tum ngei kei leh utsing maw! Sunni khawlsak thei a om tam maw... Cingno bangci ta ding?http://www.youtube. com/watch? v=mTAsas10l6E 

 
La 3na:
Tuun leh zua'n lungdeih sinthu'n,
Gual ang zal mah zong leng
Sen ngaihno haithei bang hong ngak ing e
Vangsel lianu hitang e na siangah kong leng zong
Naubang pom ding lailung na sit na'm maw?
 
Neusen lungdeih ngaih zozam, 
Taang lungtup lia palno
Gual duang bangsa na hizong lung ka sitlo
Gual in nuihciam hong lel zong nang tawh kholh ka cimlo
Sangbang noh pakbang tawi ka cim theilo. 
 
Tung sunni mual ah liam ding ka phallo, sen ngaihno;
Nang tawh umbang kholh ka cim theilo,
Zingciang singdang anglai ah na zal ding lunglau veng,
Sunni aw lenmual ah na khawl lai aw.
 
Taang zatam a pal zong maw  
Lia lungzuan nemzo omlo
Sen ngaihno damtui bang na sianglo zong 
Anglai naubang kong pom ding lianu lung ka sitlo
Zatam lai deih ci bang teel ka sen ngaihno. 
 
I nuntakna ah i ni tawp ni hi cih thei leng bangzahta in lungkhamna, dahna tawh i kidim tam? Cingno lungsim ding ngaihsutpih leng dah-a kah ding bekmah hi... a it tawh lah kitenglo, a nuntakna lah a hun zo nawnlo ding hita....
 
Si dingin lupna tungah luma, a nu leh a u Thang in a hih theih bangin a khoi hi. Ni tum leh si ding cih thei gige a kikep zong nuam mahmah kenteh maw. Cingno lungkim bangbanga a kep uh a sihma in ahih theih uh a lungnopna ding ahi hi... Cingno in kahtam sial a, a u Thang tawh a kallak ah a kiho zel uh hi... lungnopna taktak Cingno in a nei ding hiam?
 
"... u Thang..... nanga taktak bangin kingaihsun ing..."
"....Cingno, bang hong hihsak lai ding ka hia?"
"... u Thang... ka nuntakna a bei dong hong pom mai ve...."
 
".... nangkia lungzuanga ma ma na pat ciangin, na tungah muvanlai in hong laam ding kai maw u Thang.. tua lo ngal nanga ding kong hihsak theih ding omnawn kei ei u aw.."
".... ka laitah sian dong hong en gige in aw...."
"...hong en ning ei Cingno..."
"... u Thang, Cingno in a nuntakna a beilawh dongin hong ngai hi cih na mangngilh kei in maw..."
"... u Thang,  misi te khua ah zong na vang na tangh lai ding kai maw..."
 
"nu aw, na tanu sunni tawh a tum khawm ding hita ing... sunni tum ngei kei leh ut sing maw, nu.."
 
Cingno nu in a tanu Gal Ngam dawi-ai tawh kiciam ahi cih lah theilo, bang hanga sihsual hiam ciin a lungkham hi.... Cingno gei ah a om khempeuh in a khitui uh kidek zolo... ahi ding mah hi... sunni a kho thei a om diam... a om kei leh bangcih ding......  a ban video na et ciang aw.... 
 

Thukhupna: Director Sia Do Khup in Cope Topa in Zomi khempeuh ading na hoih hong sepsak bek hilo in, dawi leh kau te sangin a tungnungzaw Kha Siangtho om hi cih hong lak a, i nuntakna ah zong hong musak teekteek hi. Nu leh pa phal a kingaihna leh amau phalloh a kingaih a kilamdanzia ciantak in hong lak a, zawhthawh leh sawlzawh thu tawh a kigawm Cingno leh Khualpu te nuntakna ah nopsakna omlo ban ah ki itna zong piang peuhmahlo hi cih hong lak hi. A ki itte adingin ni khat zong manpha a, sunni tum ngei kei leh a ci hi. Khatvei nuntak sunsun leitungah deihna lunggulh 'senngaihno' tawh khatvei zong zanpuan zawng khawmlo a leitung nusiat kik ding a haksat dan Cingno in Gal Ngam dawi-ai tawh a kiciamna, si dinga lupna tungah a kahtam lawhna pan hong theisak hi. Lungkiatna, lungdamna, dahna, kahna, tua te khempeuh ban ah lungnopna taktak pen Jesu Christ bek ah om hi cih hong lak ahih manin Lungdamna Thu Gospel hanga i hamphatna hong phawksak kikkik hi. 
 
Lungnopna bek hilo in leitung nuntak sung zong ahoih, a kilawma gamtat nuntak theihna dingin lai hong bawlsak a, tua tungtawn in mite gamtat luhek thei a, a sia a pha khentel a, a hoih a pha teng thei dingin hong pattah hi. Tua manin V-A-S-A = Sava, (Sava cilo in Vasa ci ve) ..... inn ka len ciang Sava vi veve ning..... cih lungsimte pai a, a huamkim, a lianzaw, a hoihzaw ding ngaihsun tawntunga kalsuan dingin hong sinsak hi. Kei thuneihna ah kei cih bangbang cih hilo in mipi ading ahoih pen ngaihsut siam ding hong sinsak hi. Hong hilh, hong lak bek hilo in hong 'sinsak' hi cih hong lak hi. 
 
Lai hong bawlsak ban ah phuisam tawh sunni kikhawlsak theilo, hun leh ni kikho theilo, ahi zongin mihing theihna siamna khen lam ah Pasian thu leh Kha Siangtho nasepna in lametna, lungnopna hong pia thei lai veve hi cih hong lak hi. 
 
Khitui tampi tawh lungdamna tampi hong ngahsak Sia Khup Topa in a tamzaw sem video a bawl thei dingin  thupha hong piaksak henla, Khitui Gospel leh Video ministry (Tear Gospel Video Ministry, TVM) zong Topa gam adingin kalsang suanin hong lamzang zelta hen. 
 
Thungetna ah phawk in i hihtheih zah in phungvuh zel ni.  
 
Lungdampihna  lianpi tawh, 
 
 
Hau Za Cin
Phuitong Liim
www.hauzacin. blogspot. com
 
He Knows How You Feel 
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
 
He is able to run to the cry of those who are being tempted and tested and tried. 
Hebrews 2:18 (AMP)
 
Whatever you are facing, He knows how you feel. 
 
La 1na:
Theibang sen lencil tongsan liapal ngaihno
Na pal lai tumbang ka vuai lawh ding bang e
Tawpta ning na min lawh bangta ning ka ci zongin
Bang thei mawng e ka sinlai vabang hong phawng den cia.
 
Lung kituak a tuibang i luankhawm laiin
Gi bang i khen ding lungah gel mawng e
Tun lah i kal mual zatam in tui bang hong halta
Kholhlai nuamno ni te'n mual ah hong liamsan zota.
 
(a). Ngaih tawh ka ton nop manin ka tunnu aw ,

Tuanglam nihka luitui bang gawmnuam ing e.
(b). Tuanglam nihka luitui bang gawmnuam ing a, 
Khawhlo vah lah gi kizawngsak nuam ing e. 
 
Simlei tungah gam gua bang i hin lai teng
Vangngaihna sinthu khaubang i suut sa'ng
Zuan mel a theilo Zolei damtui in hong luang aw
Na li lai ah liimnga bangin kei hong bual le'ng e.
 
Singdang tawh vondeih zatam i tawi zongin
Theisen lungtuak ngaih aw kici dinga,
Zuan mel a theilo gamlai tulsing in hong po aw
Na hiang lel ah Zoheisa in kei hong pal leng e. 
 
Simleitung albang dahna kahna gam ah, 
Albang dah lungzuan ngaihtam i sial sa'ng
Zuan mel a theilo mualdawn tulsing in hong po aw
Na lel dawn ah gam guikhau bang kei hong zam le'ng e.
 
Nang lah gamlai tulsing in hong po theilo
Na duangah gamgui khaubang zam maw'ng e
Sian hawm sinthu'n simlei gamgua bang i hinlai teng
Heina peuh ah ngaih aw  lunglai ah kingilh kei ni. 
=====
 

La 2na: 
Na vang mu bang ken kon ngaihluat man maw
Zehzumlo na siang ah kong leng a
Lal hang nawh bang liang na tawi kawlciang tawh
Ziin bang ling lianu naubang kap veng
 
Lal bang kong nawh hang na nua cianga maw
Taang lungzuang lakmai luankhi'n zel e
Nang lah singdang anglai hong zalsan ta
Na nua ciang lungzuan lai ah na e
 
Sen ngaihno ka duang hong kuai gual zozam aw
Ka kungtung ngaih na gimsi lah thengmawh e
Singdang anglai ah zalin von nih thum na tawi zong maw 
Sen ngaihno lunglai ah kong ngilhzo diam?
 
Anglai naubang kei nong pom loh man maw
Nihgel kal sinthu mei bang mit ta
Ka tong ciamsa bang singdang ang zal ding
Na lua e ngaihno zalmangpha maw
 
Vangsel kei pian aw lai ah na lua e
Ka pianphung damtui bang siamlo a
Na tun leh zuan maw nen bang hong nil a
Na pallai kong lo lah hitang e
- - - -
(a). Vangsel mimbang kei ka pian aw, 
Zodamtui bang siang mawh e,
Ka ngaih pallai lo lah hitang e.
(b). Na zua lungdeih na ngaihno tawh, 
Nang lah nunnuam leng ding a,
Kei ka lungzuan mualsing bang sang e.
 =====
 

La 3na:
Tuun leh zua'n lungdeih sinthu'n,
Gual ang zal mah zong leng
Sen ngaihno haithei bang hong ngak ing e
Vangsel lianu hitang e na siangah kong leng zong
Naubang pom ding lailung na sit na'm maw?
 
Neusen lungdeih ngaih zozam, 
Taang lungtup lia palno
Gual duang bangsa na hizong lung ka sitlo
Gual in nuihciam hong lel zong nang tawh kholh ka cimlo
Sangbang noh pakbang tawi ka cim theilo. 
 
Tung sunni mual ah liam ding ka phallo, sen ngaihno;
Nang tawh umbang kholh ka cim theilo,
Zingciang singdang anglai ah na zal ding lunglau veng,
Sunni aw lenmual ah na khawl lai aw.
 
Taang zatam a pal zong maw  
Lia lungzuan nemzo omlo
Sen ngaihno damtui bang na sianglo zong 
Anglai naubang kong pom ding lianu lung ka sitlo
Zatam lai deih ci bang teel ka sen ngaihno.
====
 

La 4na: 
Tung sunni mualliam a ngaih tawh khen ding lunglau veng
Sunni aw  lenmual ah kei ding na khawl aw
Ngaih ang sambang zalin, tumbang ka vuai ni mateng
Sunni aw  lenmual liamlo aw
 
Aw! Pham ding lai ah na e
Tuun leh zua ka senngaihno hong kheng lang e
Tung sunni mual hong liam dia lianu kha phamta ding aw
Lunglau veng ka sen tuunnu aw
 
Ngaih tawh dawnbang tuah nang lunglai ka gelvang in maw
Nang vang ngaih man laukha pham ding hitang e,
Gibang hong khen lang e, lambang hong kheng lah sing maw
Zotang bang damlai ngai sing maw.
 

Aw! Pham ding lai ah na e
Tuun leh zua ka senngaihno hong kheng lang e
Tung sunni mual hong liam dia lianu kha phamta ding aw
Lunglau veng ka senngaihno aw
 
Ngaih aw na sial zatam lungzuan hong nem nuam zong leng
Nunnuam nga bang len hun kei din' a tawm ngei
Phamna ciau gal lam ah haibang hong ngakta ning maw
Senngaihno ken hong kheng la'ng e. 
 
======= THE END======