8. A ni khat ni kizo ta: Innkuan 12 te in 2vei ciat a suih khit ciang a ni khatna kizo a, tua ni a suihsiamte leh a ente lak pan lungsim hong lawng deuh leh ciamteh huai kasakte pawlkhat kong gen nuam hi.
Â
Chicago No. 3 pa in a vei leh taka bawhlung a vat ziahziah pen mipi in muhnop a sak khat hi a, Tulsa United Zomi te No. 2 pa in zong tua mah banga bawhlung a vei leh tak tawh a vat ziahziah pen siam a kisa mahmah hi. Tulsa United Zomi te No. 11 pa bawhlung tungah a lam zialzial pen 'siam neel' upate in a cihte uh hi kici hi. Zidane in zong mu leh a style copy dingin ki um ngiat hi. Palm Beach Veng No. 7 pa free kick pen Sakhituihup banga kual ngeungeu in kung sungah lut pahpah ahih manin dead ball specialist Beckham tawh kilawmta hiam cih huai hi.
Â
Zomi Innkuan Columbus, Ohio te No. 4 leh Captain Sia Pau Khan Khai in goal out a suih ciangin gamla tuk lua ahih manin a gei pan a en nupi khat in a tapa kiangah, "Bawi, na let ciang hia bangin sui in aw.." ciin na hilh hi. Tulsa United Zomi te kungpangpa in bawhlung a mat ciang a khe a khai pahpah pen Zozum u liante in Pele te hun lai a kungpan dan hi ciin na ciamteh uh hih tuak. Vengpi Veng Ft. Lauderdale te in Chicago te 7-0 in a lelh ma un, a Veng Hausapa uh Pa Khaipi in Zozum pan paungaihna tawh, "Goal 10 nong khum zawh kei uh leh hong zo lo ci leeng e....." ciin na awng kei a, goal 2 bek in samlai... ciin na tangko hi (goal 8 khum napi uh goal khat kisim khalo hih tuak hi, zan hita ahih man bel hi tuan kenteh). Â
Â
Ka paima pek pan a zia a tong uh a theisa khat in, "Mimawkmawk ahilo Anlang te pen amau sitai (style a cihna hi inteh) pan na theipah lel ding hi.." ci a hong hilhsa hi. A banban in suihsiamte kisui toto a, kuate kuate hiam cih ka kan tuan kei hi. Tu'n inn ka tun kik ciang tuate kimawl dan nopci sa pen ing, a thapiate zong nasia sa pen ing ka cih leh .... kong gensa pen na thei hiam..... hong ci a, ka telsiam pah hi. Hih banga kithutuak leh pangkhawm a tha kipia pen amau bekbek bek ahih loh hang amau-a zaha hanciam kuamah omlo hi. Zomi Paunak ah, "Khua khat kilungtuak khua kua in zolo" na ci uh a, dik peuhmah kasa hi. Khua inn bangzah pha, mihing bangzah teeng cih ka theihloh hangin ka zak kiaukiauna pan US ah mi tampi tungzo a, a tung ding zong tampi kigualzo a, kihuhngiat, kipanpih ngiat uh hi cihte ka zak ciang, amau kicih bek hi kei, ken zong, "mi mawkmawk hi kei" ka ci hi.
Â
Zomi khempeuh in i etteh ding om sa ing.
Â
Tu kum tan 10 result sung pan zong All Distinction (above 75%) a ngah Tg. Tuangpi pen Anlang khua pan hi a, a khua uh zahtakhuaisak in, a khua tawisang a, a nu a pa a sanggamte a tawisang bek hilo in ei Zomi bup zong hong tawisang a zahtakhuai Zotaang hi. Zomite khang kikhek ah pilna siamna 'Sapi sa neih' banga a neituam i om nawnloh hun, a zongzo, a kanzo peuhmah a kah tohtoh hun sungah i makai ding amah banga laisiamte hita hi. A khuapihte bek hilo, Zomi khempeuh "mi mawkmawk hilo" a suaksak ding Tg. Tuangpi banga laisiamte ahi hi.
Â
9. A ni nihna leh a tawpna: A 2na pen zing nai 11 in kipan a, nitak nai 9:30 in kizo hi. A ni 1na sangin nupi te zong awng zo nawnlo ding i sak leh a aw uh huut nai peuhmah lo in ging semsem a, Palm Beach Veng suih laitak, Miami Vengte suih laitak, Atlanta te suih laitak, Chicago te suih laitak cihte khawngah Tulsa te suih laitak mah bangin nungak leh nupi te awng ziahziah uh hi.
Â
A liam a bai nasia lua omlo in Topa in hong zosak a, Champions trophy piak khiatna leh Medal hawmna bek omta hi.
Â
Nupi leh naupang kidemna pan medal ngahte hawmkhiatna Sianu Don Ngaih Lian mah in hong neihsak pah a, mipi in khut kibeng ziahziah hi. Medal hawm sung khempeuh medal khat zong a ngahlo Zovontawi Team (Zomi Innkuan Washington DC) te kilawp pen tawh kibang a, a flag uh zong kisang lap penpen hi... amau bel a zawh loh uh hang nuam a sa ngiat pawl hih tuak....
Â
10. Medal hawmna: Khatna leh nihna ngahte mipi leh Zozum lam nga in kigual diudeu a, amau flag tuak tawi in medal pia ding Zolia melhoih te zong nungak siangtho 5te bangin kigingsa in om uh hi. A 2na ngahte medal sang dingin kisam a, Zozum mai ah Zolia te in a ngawng vuah awksak in maan kizaih ziahziah uh a, a sang kha lo suihsiamte in a gei pan ciltui kaai liang in na en uh hi. Gualzote mah hampha zaw mawk ei.....
Â
A siam tuam 3 kitelte - best player Thang Khan Khai, best goal keeper Thang Min Lian leh top scorer Tun Khan Mang te medal kipiak zawh ciang Champion teamte medal kipia kik leuleu a, a banban in hong pai in Zolia maitai siuseu te in medal na awksak leuleu uh hi. Amau bek nungakte tawh maan kizaih kha in inn ciah uh a.... mai kum ciang bel....
Â
A tawpna ah Vice Captain in cash prize USD 700 FZI President Pa Hangpi (Pa Thang Do Hang) tung pan sanga, Captain in Champions Trophy Dr. Hau Za Cin tung pan a san khit ciang Sia Mengpu (Rev. Thawng Lian Khup) in .....Topa aw ZOMI WORLD CUP USA 2008 nong zawhpih lungdam ung, cidam in maikum ciang.... a cih khit ciang i ngaklah mahmah ZOMI WORLD CUP USA 2008 hong beita hi.
Â
Music hong ging ciaiciai a Champions team te celebrations hun hi in, maan kizaih leh mangpha kikhakna hun in kizang hi. Khut kilen in lungsim lungzuang giugiau in 'mai kum ciang kimu kik ni' ciin Florida tuipi gei a nitum didiai nuai ah khitui luanglo in ka kikhenta uh hi.
Â
Ngai mah leng kimu kik lo dia, sam ta leng sulkik lello ding...aw, ZOMIÂ WORLD CUP USA 2008!!
Â
(zop lai ding)
Â
Â
Hau Za Cin
Phuitong Liim
No comments:
Post a Comment