Christmas Thupha!:
Pu L.T. Ngaihte laibu LEEL SIMTHU ka simsim leh "Tangsam A Pakta Hiam?" cih ka tungvat hi. Ka laibu khup in ka ngaihsun a, ka khuadak leh kongmai ah Lailen nupa hong vak kiaukiau a Phalbi hong tungta, Christmas hong naita hi maw ka ci hi. Amah banga Tangsam pak tawh Christmas hun a bulhkhawm thei eite adingin tu in etlawm takin Tangsam pak ziziai ta hi.
Christmas hun pen Zomite Christian i suah zawh kumkhat sunga i hunzat lak pan a nuam penpen hun ahi hi. Kingaklah ciat, kilungdam ciat, nuam kisa ciat hi. Ahi zongin "Christmas Thupha" i saanna dingin Christmas i zatna ahang zong i mangngilhloh ding thupi hi.
Tu kum i Siate, Upate in bang thu hong gen uh hiam en pak ni:
1. Pu Tuankhankhup, Gurgaon, Haryana, India in December 7th, 2008 niin "Khualbuk ah Mun awng omlo" (Luka 2:4-7) cih thulu zangin Pasian tapa tanghial in a Kumpi Tokhom nusia a leitung ah hong piang a ahi zongin pianna ding giahbuk zong tang zolo, ngah zolo; nang inn ah, nang lungsim sungah hong suak nuam hi leh mun awng na pia thei diam? ciin siamtak in hong taihilh a, Christ pianna ding 'mun awng' i neih ding hong deih ciat hi.
2. Rev. Dr. Pum Za Thang Tombing, President, GETS. Bangalore-43 in December 20, 2008 niin "J E S U: KUMPITE KUMPI, TOUPATE TOUPA" (Matthai 1:18-25, I Tim. 6: 16) cih thulu zangin Jesuh pen mihingte Kumpi, mangthangte zong ding, mizawng daipamte tungah lungdamna leh suahtakna thupha puak dinga hong pai hi cih thu hong pulak hi.
A tunga nihte in "na lungsim sungah mun awng na nei hiam, na lungsim kongbiang ah ding hi, kong kiu hi, na hon diam?" ciin hong dong hi.
3. Rev. Dr. JM Ngul Khan Pau, General Secretary, CBCNEI, India in "WE HAVE COME TO WORSHIP HIM" (Matthew 2:1-12) cih thulu tawh December 20, 2008 niin Amah (Jesu) a bia dinga pai mipilte kipulakna, "Amah a bia ngiat dinga hong pai hi ung" cih thu hong gen hi.
Jesu pen Kumpi ahih manin lungsim kiniamkhiat in na bia hiam. Lungdam maitai takin na bia hiam. Lungnuam sinnuam in na bia hiam. Pasian bia a kun nuam na sa ngaungau takpi hiam. Pasian bia a kun pen lawp mello, lunghiang pian (lah kisam sa si, a thupha deih i hih manin) cih bang i hi kha hiam?
Lungdam tak, maitai tak, nuamsa mahmah, lawp ngiat a Pasian biak ding hi cih thu hong vaikhak hi.
Pasian lim leh mel i muh ciang zong nakpi taka lungdamna i neih ding hong vaikhak hi (rejoiced exceedingly with great joy).
A tunga thu thum, leitungbup Zomite sim theih dinga i Siate leh Upate in internet pan hong khahte uh limtak ngaihsun in zui pah leng tu kum Christmas pen Zomi bup adingin THUPHA hi takpi dingin ka lamen hi.
Christmas Thupha!
Hau Za Cin
Phuitong Liim
No comments:
Post a Comment