Cidam lung nuam takin Bangkok ka zing tun kik ta uh hi. Mawtaw khawl na
pan ka zintun na ding uh Taxi lak kul hi.
Taxi pa in Bh.350 hong ngen hi. Ahi zong ko Meter bek tawh pai nuam ka
cih leh highway fees nang pia in hong ci hi. Kei zong kapai na ding uh
bang tan gam la a koi ci pai ding cih ka theih loh pi mah in OK ka ci hi.
Ka tuan khit uh a sawt lo in ka zintun na ding lam uh a tung Bus khat ka mu
uh hi. Ka nupa un kikum in hih bus tuang le hang Bh.16 tawh tung ding,
tun Taxi pa in koi teng ah hong pai pih ding thei lo meter cih zenzen hang a
ut na gam hong pai pih leh Bh 500 zong tung thei tuak ni ci in ka tuak uh
hi.
Zin te puak ding van tawm lei in bus ka tuang pah uh hi. Bus tung ka tun
uh ciang, ka lawm in *Na bag ea? *ci in hong dong hi.
Oh! ka bag? Koi ah mang ngilh kha???? Taxi tung ah!!!!!!!
Ling bambam sa in bus khawl na ding beel mek in ka nupa un ka tuak uh hi.
Ka bag sung ah ka passport te gel uh, ka innkuanpihte ka sap na ding laidal
aki sam khem peuh original copy teng. Ka vanleng ticket teng uh. Mikang
sum tawm om sawn sawn.
Taxi number gen loh a colour na ngawn thei nawn lo. Taxi pa in hong pai
kik ding cih lah ko lamkim a a tuak bang ci hong zong peuh mah ding?
Lam etna khem peuh bei. Tu ma kal thum sung ka hah kat sa khem peuh uh
sehnel sung tui sun bang ta. Ka inn kuan pih teng tawh UK ah om khawm
ding ka hah kat na lam a kei na ngawn a tung kik zo nawn lo ding hi ta.
Ka zi a ding kawlgam passport ngen kik ding cih zong, gamdang ah kawlgam
passport tam man lua atawm pen $1000-2000 hong ngen ham tang ding. Kei a
ding ea? British embassy in single affirmation laidal neu khat zong hong
pia nuam lo, bang ci bang a passport hong vai hawm sak ding?
Mihing ngaihsutna, septheih na leh hahkat zawh na tawh piang thei ngei nawn
lo thu hi ta.
Lametna khem peuh tui sauk ta. Lungsim ah meipi kai in zing cip ta. Lungsim
sa biaibuai ta. Topa nang bek in sem thei nai maw, Topa!!
Ka zin pa Kham bawi phone tawh hopih, aman zong cih nading thei tuan lo. Lawm
Paupu (Tedimte Thai a aom a sawt khin Thai pau bel Thai te a bang lian khat)
na hopih sin dih ve hong ci.
Paupu sam; Paupu in "lung kham kei vo Topa om ei, mang lo ding hi, ngah kik
ding" cih tha ong pia, aman zong ka lung nop na ding a hong cih bek ahih tei
hang tua kam mal in minute khat sung khawng lung nopna hong ngah sak sam ahi
zong lung kham kik veve.
Paupu in Radio station te ah na gen sak ning ei ong ci. Tua bek mihing
sep theih lametna om lai. Ngaih sun kik, Radio ah i gen zenzen hang, taxi
hawl pa in a zak leh hi pan, zamah hen o, hong piak kik nop leh hi pan lai.
Aw Topa nang ma khut sung lian ah om ei maw Topa!
Hi mun ah Topa ki sam tatak ta.
Kiptak in ding un, Amah in note a ding in tuni a hong sep ding Topa
hotkhiatna mu un. Pai.14:13 (Stand still and see the salvation of the Lord.
Exo.14:13)
Ka nu pa un khat leh khat tha nei lo tuak ki thei na pi kikhem in tha ka ki
pia tuak uh hi. Ahi zong tha zaw dikdek veve, hi cih pi mah in ka zin uh
ka tung ta uh hi.
An ne dinghongki sawl, an zong lim mahmah hi na pi awm sung pan a dal khat
om keei. Ka tha hat na khem peuh bei ta. Thu kanget hang sau ngen thei
nawn lo.
"Topa hong huh in Amen!" "Topa nang mah bek in sem thei nai maw, hong huh o
maw Amen!" cih teng bek ka lung sim ah lumlet tha pai! Mit si zel mit hak
zel ahi zong ka lung sim a ka gen ki bang.
Nitak Khambawi te unau leh lawm Paupu mah in hong tut pih in a vot khawng
ka dawn uh a la sa, Laisiangtho sim in thu deih tak pi ka ngen. Zan zong
hong sawt to ta lup hun ta hi ta leh lup nop na lung sim om lo, tut lai ding
zong aki ut hi sam lo hi.
Pumpi tha zawm a hih man in mit si in lungsim ah Topa ci kawmkawm sa in
mengme, dipkuat patauh na in hong phawng ahih man in khanglo vat zel. Hih
bang a ka khanlawh hun ciang Topa hoih tak ka hopih thei hi.
Zing khau hong vak ta, bangmah thu lamdang om lo. Lawmte Phone khat ging
leh Radio pan i gen ahih ciang hong ki sam ahih tam maw cih lametna tawh,
tha khauh vat zel ahi zong na hi tuan sam lo. An nek hun leuleu an kuang
um sam ahi zong lut suk thei mahmah lo.
Nitak lam ciang phone khat hong ging leuleu.
Hello! Mr. Hau na haim? Hi mah ing
Na bag ka office ah om! hong cih lian leh ka mai suah hong ki laih lian
in kamai ah bang ma lo pi khat ka nuih san kha hi. A ma office address
teng ka dot khit ciang in ka gei a om ka zi leh Ngangaih tung ka gen leh
ama zongnuam lua ahih manin deih tak pi in hong awng kha uh hi.
Ka vek un kuama sawl loh pi in khuk din suk diamdiam in Topa tung lung dam
ka ko uh a lung dam na khitui hong tak ngelhngelh ta hi. Thunget khit
phet in ka zi tawh pai in ka va la uh hi. A sung a om laidal te leh
passport te sum te bang mah pelem lo, kim tak in Topa in hong kep sak ahih
man in Topa min ka phat phapha hi.
"Thahat na tawh hi lo, vangliat na tawh zong hi lo Kei ma tha bek tawh na
zo ding hi."Zech.(4: 6)
Hih a tung a Topa kammal khat vei ka at pha nuam hi.
"Sum tha tawh hi lo, a mun khel ziau na tawh zong hi nawn lo, tu taktak
ciang Topa bek in sem thei hi." Topa in min than na tang tawn tung ta
hen!
*Bang hang hiam cih leh amasa in ka zi single certificate ding Sum tawh ka
ngah uh hi, anih na ah kei a ding sum zong ki zang thei lo, ahi zong a mun
khel ziau in ka ngah uh hi, tun ahih leh Topa bek in sem thei taktak ta hi
ka cih nuam hi.*
Hih in tuatung kakhual zin na Bangkok ah Topa kiang pan Final test ahihi.
Asim mimal in a thak in Topa in thupha hong pia ta hen!
Itna tawh
Dongbawi
No comments:
Post a Comment