Dr.Cinpu,Hih nong laigelh tawh a kisai lian lo khatin 1983 kuma Lamka pan Mizogamah gospel ka paina thu "Lungdamna Aw" (Oct.-Nov.1983) editorial a ka gelh ka muh kik ciangin kei zong ka lung hong leeng pian ahih ciangin hong gelh ing. Na tampi kikheel khin ta."Mizogam eimi kim khat in a sapna uh bangin Sept.14 pan Oct.5,1983 sung Sia G.K.Nang, Pastor Lang Gin, Upa H.K. Tawtak leh Upa Thawng Kap va zin uh hi. Guite Khawk Numei Khoppi Sept.16-18, sung Tuimui khua-ah zang kawmin tua panin Mizogam paisuak uh hi."Hnahlan, Vapar, Ngur, Champhai, Murlen, Vaikhawtlang, Hiangmun a phak khit uh ciangin Oct.5,1983 ni-in cidamin Lamka tung kik uh hi. Hnahlan khua pen khua lian khat hi a, inn 300 val omin, Administrative Officer (AO) omna hi. Eimi inn 50 val om hi. Eimite Presbyterian leh Roman Catholic-in kikhen a, Biakinn nei tuak uh hi. Presbyterian a omte in Lusei pau zangin, Lai Siangtho leh labu zong amau aa zang hi. Vapar khua-ah inn 40 phial omin, eimi bek omna khua hi. Presbyterian leh United Penticostal Church ah kikhen uh a, Biakinn zong neituak uh hi. Lai Siangtho leh Labu Lusei aa mah zangin kikhopna sungah Lusei pau mah zang uh hi. Ngur khua-ah inn 120 lakah eimi 50 val om a, Presbyterian Pawlpi sungah omin Biakinn zong a tuamin nei uh hi. Murlen khua-ah inn 30 val lakah eimi inn 10 val om a, Presbyterian mahah om khawm uh hi. Vapar khua-ah inn nih leh Ngur khua-ah inn 6, mimal gawm 30 in CBA zom uh hi. Tu-in Mizogam khua thumah CBA Pawlpi om ta hi. "Siate om sungin Ngur khua-ah nithum sung kikhopna nei uh a, mi 7 in tuiphumna ngah hi. Tuate lakah Upa Vial Khai' nu Pi Dim Khaw Zen kum 80 mi in zong tuiphumna ngah hi. "Tuiphumna mun ka tun' zawh kei leh zong hong pua un' ci napi-in Pasian in thaguanin ama khe tawh tung zo a, let zong kul loin inn tungkik zo hi. 1984 February kha ciangin Vapar khua-ah Khoppi neih kik dingin vaihawm uh hi."Murlen khua pen Editorpa pian'na khua hi a, Mizogam eimi omna khua-ah Pasian thu a tun' masakna khua khat ahi hi. 1942-1967 Silver Jubilee Pawi January 20-23, 1967 sungin zang uh a, phawk tawntungna mual zong phut uh hi. Tua mual suang a va muh uh cianign Sia G.K.Nang in Pasian kiangah lungdam kohna nei hi. Hih khua pana piang tu-in B.D. zo 4 om a, pastor sem 6 om zo hi. Hih khua pana tai Manipur lam zuante hi taleh Kawl gam lam zuante hi taleh Pasian in a khuavak a tangsak dingin zang hi ci-in kiphawk hi. Tua mual suang tungah hih bangin kigelh hi."1942-1967 PRESBYTERIAN CHURCH SILVER JUBILEE MURLEN C.C." Lawmna Lawi 1 Sial 1Bawng 1Keel 1Vok 1Ui 1Ar 1Lawm ni 20-23, Jan.1967."Hih Pawi bawlna-in gan namkim khat ciat kigo cihna hi. Tu-in hih munah mi a teen' not loh hangin a pai peuhmah in hah zel ahih manin tudongin muh theih dingin siang lai hi." Hiangmun khua pen eimi bek omna hi a, Presbyterian, Evangelical Convention Church leh CBA pawlpi om hi. CBA Pawlpi pen tukum a om pan ahih manin amau sim loh biakinn nei vive hi. Thugen lasakna ei pau mah zang lai uh hi. CBA a kipat tungin mi 40 hi a, tu-in 60 pha ta uh ahih manin lungdam huai hi. Pasian in a tangzai zaw-a nasem dingin hong deih hi ci-in kimu ahih manin thungetna-ah Miozgam ei mite phawk ciat ni."Tu-in Mizogam Pawlpite ZBC kici a, Pawlpi 17 pha ta hi. December, 2007 ciangin Silver Jubilee zang ding uh hi. Hun luite sutna hi e.
GKNang USA
No comments:
Post a Comment