"ZOMUS KONSERT 2008, Malaysia" in leitungbup hong phawng! - II I gensa maban zom kik leng. World class DVD thu gen ding i hih manin kammal zat zong kisiam zolo kha ding hi. Hong theisiam un. Ngaih Anglai Ah video sung pan lasiam Nu San Lun leh Tg. Lianpi te min Zomi lasiam min gualhna ah kiptak in a kibehlap mah bangin, hih ZOMUS KONSERT 2008 ah lasiam Lia Taapi (Lia mah hi lai dingin na tuat ing, ahih kei leh hong maisak henla) lasiam taktak ahihna leh Zomi lasiam min gualhna ah a kihel zawh mahmahna i mu thei hi. Mihing khat peuh in minthan kipatna 'hun khat' kinei ciat a, hih lasakna ah zong tua mah i mu hi. "ZOMUS KONSERT 2008" i et tak ciangin tumging tumte zong 'world class' mahmah ta cih kithei hi; a hun khop mah in samsau neita uh ahih manin. Tua pen leitung dan ahi phial tam maw ka ci a, tumging tum siam peuhmah in, pawlkhat in, sam hawi se uh hi. Stage a din uh ciang etlawm diak a, a mel uh kiciamteh baih deuh tawh kibang hi. Kei bel sam hawi kisam lo pawl ka hi hi...he he..!! VANGLIAN SISAN cih CD a bawl khit pan kipan i theihsa, kei bang tua pan a min ka theih hi, Sia TL Mungbawi pen laphuak siam tak khat hi cih i theihsa, ZOMUS DVD i et ciang kitel sem hi. Ama laphuak "Mapang Khawm Ni" cih lasa lasiam Nu San Lun leh lasiam Pa Suan Lian in awthuap (second voice) kilaih letlet a a sak uh hih DVD sung pan (kei bang) siam kasak penpen khat hipah hi. California ah om Rev. G.K. Nang, PhD in zong "Lungnopna", "Tua Sisan" cih late (Sia TL Mungbawi laphuah mah) hoih a sak thu ZONET ah tuma lamin hong gelh ngei zo hi. Sia TL Mungbawi laphuak siam ahihna kitel semsem a, Zomi te in ama talent hangin Zomi hih nuam isa semsem hi. Topa in thupha hong piaksak zel hen la. "Zomi thupha Sianmang banzal hi" a ci ziau lasiam Tg. JK Kam in gensiam kasa pen hi. Limtak ngaihsun in suut kikkik leng zong Zomi thupha pen Pasian hong piakkhong (God's gift) takpi hi, tua manin kammal gual khat tawh Zomi thupha siamtaka hong pulak khia ziau lasiam JK Kam laphuak siam ahihna, lasiam ahihna kitel kasa hi. Hih ZOMUS lasak hun ah a lapi uh CANAAN ZOGAM zong ama' phuah mah hi a, sau gen siam khang, amah tungah lungdam hang. Thank you Mr. Kam. God bless you, Topa thupha! Hih la thumal (lyrics) leh a la hoihna thu Pa Hang Khan Lian in Singapore pan tuma lamin hong gelh ngei zo hi. Hi takpi a, nikhat ni ciang Zomi khempeuh Canaan Zogam ah kiciah ding hi. Mundang pen i gam hilo a, i tenna bek hi. Lasiam Zolia khat in a hona lasakna khat ah mipi lama om kua hiam khat a mitsuan hiau thute i gen khin man kei ding a, lasiam Zolia te melhoih dan leh maitai dante, a mit hah siang sitset uh i etkhak ciang i lungtang kisai satsat a Zotaangte hong omsak thute, a khepek uh leh a tan kizum zitzette uh a etlawm dante i suut khin man kei ding hi. Zopuan tawh kizem in, mikang Jeans tawh kizem taleh a hoihna uh a kiam tuanloh thu leh a lasiam awnem uh Zotaang ten i zakzak nop ahih dan zong i gencim lah ding uh hi. Hih zaha Zomi hih hong angtang sak Zolia te it huaina, a ngaihbanna uh, a deih huaina uh thute i et kawmkawm in eima lungsim ciat ah i ngaihsun zaw dinga hih laiah i gen sawm vet dah ding hi. Zolia lasiam te aw, lungdam ngiat ung. Na zaila awih uh zaza nuam ung, ko lam zong khatveivei beek hong en zel sam un maw.... itna mit tawh...please. .. Zopuan nam tuamtuam tawh na kizem uh ciang hoihsa diak ung..... Inn a ngai ngaungau lasiam Pa Zam Dal mah bangin Malaysia ah om Zomite bek hilo i suah i khanna Zogam a nusia khempeuh in itna kicing a kicinna Inn kingai takpi hi. A gen bangin i nop i dah kua'n hong theihpih lo takpi a, a lim a al ciamkha ta le'ng i deihsakte tawh ankuang kisawk khawm lo hi. Nuntakna bukimlo tawh kibanga, lungkim piikpeek a omkhop theihna inn leh i gam kingai takpi mah ciat hi. Canaan Zogam i lunggulhna lian ciat hi. Phuitong liim ah khawlkhop kik ding kilunggulh tek hi. La 21 kikhum lak pan i etkak kawikawi ciang Zomite dinmun, tu laitak a thuak thute, a dahna, a lungdamna, a lungzuanna, sepkhop a kisap dan, i khua leh tui phawk ding ahih dan, Pasian hong angvanna hanga hih bang tung thei i hih dan cih bangin la namkim akihel hi. La masa pen ah i pianna guipi "Tuun sung khat pan" (Lapawl) tawh kipan a, Zogam mangngilh lo dinga mangpha khakna Lengtong Kam Khen lasakna tawh kikhup hi. Lengtong Pauno thungetna la (Zomi thungetna la) "Zomi thupha hong pia in" cih i tun ciangin i dip bingin i awm bing a, i khasia in i nehno phial hi. Zomi te in Pasian ngai mahmah hi. Amah bek mah i lametna ahih manin. Pasian in zong hong huh, hong gum, hong honkhia, thupha hong pia takpi lai ding hi. Muang ni. Um ni. Ki ap ni. Hong paikik ding thu leh Saikel dam hawl ding thute khempeuh pen i lametna leh i thupha san hanga lungdam maitai a thupha zeeksiam i hih ding kisin a kisapna thu vive hi. Nu leh pa banga kamhoih, gamtat hoih hong hilh ZOMUS tung ah lungdam hang. "Takkheh Pasal" ciin Sakhi banga i gial i mansuah loh ding a thupi mahmah khat hi. I omna gam hong tuam in, i tenna khua kidanga, i kiim i kiangah i veng i pam kidanga, i Zokawlpau zong kawlte in hong zatpihpih ta uh hi (i mansuah kha de...he he..)! Tua bang i om ciang i sisan kikhek theilo a, i minam kikhek theilo ahih mah bangin i hihna i kep cing ding, i sisan i gup ding, Vaphual tangsa Vaak i suah loh ding i sep pelmawh ding hi. Sahang in a gial khek ngeilo a, Sakhi zong a pi san a no san hi cih i Zomi pupa Paunak hi. Leitung sum leh pai nei in cidamna thahatna a kisam khempeuh nei ta leng Honpa Topa phawk ta leng Kha sungah i bual mateng "Na khat na kisam lai hi." Mihoih khempeuh nuntakna nuam khin lo a, misia khempeuh nuntakna sia kimlo hi. Kha sungah a bual mite (lam ziahziah ding ka cihna hi pah lo) Zeisu nung zuihna ah mi hampha penpen te hi ding cih ka um hi. "Pang khawm hatna" hi takpi hi. Zomite i pankhop loh hun a om ciangin i galte in hong neh ding hi. I pankhop sim in i galte i zo hi. Zogam leh Zomi i hutna dingin i galte i zawh kisam hi. Tua pankhom hun ding tu hun hi pah hi. Pang khawm hang bekbek tawh hih DVD zong Zomi bawlsa DVD lak pan a hoihpenpen hong suak pah hi in ka thei hi. "Dimtui Vangkhua" zuan a a lenna, heina singta gam pan a tai-a tai, pai bek hawmthawh a deel lianga a tai Lengtong Kam Khen in, "Thei bang sen a zu bang ka mom laiin,Ka nun luai sung hong vei diaidiai na tual, Ka vangkhua tual hong zuan kik ing..... Mimbang pianna Dimtui vangkhua, Kil bang khanna lenna singta gamlei, Ka vangkhua tual hong zuankik ing" cih la a sak khit ciang a lungzuang lua mahmah in, "Zal Mangpha" cih la tawh mipi khempeuh mangpha khak a, "Zal mangpha hong khak ing,Ciin leh tuai aw, Vangkhua zuan in kei va ciah ning, Mel mu kik dong Sian in siam hen, Tang bang dam ni. Na ei ka sinlai,Zuang si ning e, Ngai si ning e, Zolei gam nuamHong ngilh ken aw, Heina peuh ah, Zal manpha maw... la la lala la la lala..." khut vik diamdiam in mipi in mangpha khak a, cikmah ciang a kila kik thei nawnlo dingin kikhenta uh hi. Ngaita leng kisam kik thei nawnlo, utta leng kihel thei nawnlo, kap ta leng kikho zolo..... ZOMUS KONSERT 2008 in ei ngailo in mual hong khupsan kik hi. A ban.... cik ciang? Koi ah? ...... Kuppihna leh Thukhupna: Koi gam koi mun peuh ah i hei zongin i gam i minam it a, i ngeina mansuah lo a zuun ding leh, i sep khempeuh Pasian muang a hangsan taka sem ding ihih lam hih late i zak ciang i phawk kik hi. I nusiat i Zogam, i khua leh tui, i nu leh pa, u leh naute mangngilh lo a phawk ding leh nikhat ni ciang hun hoih Pasian in hong pia dinga Canaan Zogam ah ciah kik ding i hih thute i phawk hi. Lametna, lungdamna leh Zomi ihih hanga angtanna lianpi lasiamte tung pan i ngah a, manpha i sa a, ciin loh zuih loh dingin pammaih i sa hi. A la mah bangun ZOMUS makaite Zogam lam zuanin Malaysia pan Singapore tawn in hong ciahsak kik uh a, ei zong i lungzuang a i phawk mahmah hi. Zogam pen i ngai a, i phawk ciat hi. I ciah kik ding kaal i ngaklah hi. ZOMUS makaite leh lasiam, tumging siam khempeuh zahtakna ka pia a, amaute siamna hangin Zomi a ka pian ka angtang semsem hi. Topa in amaute thupha hong piaksak hen la, a za a ngai mi khempeuh tungah lungnopna hong tungta hen. Ka lungdam, Hau Za Cin Phuitong Liim