Awnghawh, Daihawh, Ekbuk, Restroom..: :Murlen

'Ekbuk tui dawn' cih thu ka gen sawm kei hi. Zomi te khantohna i sut kik sawm leh a tunga hun tuamtuamte i nawk toh giapgiap hun om hi cih i thei ding hi.
1. Awnghawh:
Inn sung sutpi gei ah sual mun khat kivangsak in 'awng' kici a, tua pen zu leh ek nawnna in kinei hi. Inn nuai ah suangtum khat kikoih a, tua tungah tu in, inn nuai vokpi leh a note in noptuampih uh hi. Tua hun pen a theikha tampi omlai kha dingin ka um a, khangno tamzaw in kithei banlo, i nu leh pa, pi leh pute gen khawng i theih hita hi.
2. Daihawh: Mikangte hong tun ma leh hong tun zawh lam ciangin inn nuai ah vok leh gan koih pen "tuuk ciang thosi thovai tam" ciin kideih nawnlo a, khua nawl, daipam ah singmam nih kidawh in kitu hi. Vokpi kikhum nawnlo ahih manin ama hun neih bangbangin na vil lel a, tua banga daipam ek awng zat pen daihawh kici leuleu hi.
3. Ekbuk:
A tunga nihte a kizat laiin Vokpi in mit neilo kisa hilo napi phamawh kisa lo a, them khat a kikhantoh a, nop mawh leh zumhuai cihte i behlap tak ciang' nuam kisa nawnlo in bukno khat sungah kuamah muh loh in kitu hithiat nuamta hi. Tua manin a kilemna bangbangin dai ah, inn gei ah, huan sungah cih bangin bukno kilam a, ekbuk kici hi. Guahzu meikai nuai ah zong noptuam a, Khuado Vok gawh dingte zong siangtho sitset ta hi. 4. Restroom: Bukno khat hiam, inndeino khat hiam bek kicing sa nawnlo in, a tawldam zaw, a nopzaw leh a cidam huai sitset dingin mun lianpi khat kipia a, tui siangtho deihzah zat ding kikoih in, kinulpuan deih bangbang zatding kikoih a, a gim a hu bangmah kiza lo dingin kinamtuisak sitset hi. Tua banga tawldamna buk, ahih kei leh tawldamna inndei pen mikangte in rest room ci uh hi. A tunga khempeuh sangin kisuakta zaw, kicingzaw, nopzaw thamtham ahih manin tawldamna inndei cih zong a kilawm hi takpi hi. 2005 kum US gambup restroom hoihpen pen Forth Smith Airport, Arkansas ahi hi.
Mimal khatciat koi pen hun ah piang ihiam cih kidong hi leng, pawlkhat a masa hun ah suak dinga, pawlkhat a nihna hun ah suak dinga, pawlkhat in a masate mu manlo, thei manlo, laplo in a nunung lamte hun bek theikha dingin ka um hi. Tu hun a gamdang a tungte, khuapi zaw deuh ah a piang tu leh tate bang a nunung pen hun ah a suak hita ding uh hi. Hampha mahmah uh hi kici thei ding hi. Haksatna tampi tawh kipelh uh ahih manin. Zogam ah Zomi khempeuh in restroom i neih theihna dingin mimal kimin mawhpuak, sep ding, tavuan i nei hi. Leitung pilna siamna leh nuntak nekzonna ah i kilapsang zawh mahmah ding thupi peuhmah a, ahi peelmawh khat hi ding hi.
Tua ahih manin i sanggam, i u leh i naute, i meltheih tanaute koi pen hun ah om a, a maban koi hi hiam cih theihsak in; khaito, domto, ban kaih in i khangkhan ding a mitkeuh masate sep ding mawhpuak tavuan hilo ding hiam? I kim i pam ciat domsang le'ng i minam bup hong kidomsang pah ding hi. Zomite hanlung ciam khangto diam?
Hau Za CinPhuitong Liim