Presbyterian Theological College ah sangkah hi a, a mai zawl pian, ngo siksek, a nak zum, a mitkho kum khikhiai, a kha' zum pian hiuhiau, a nuih ciang a hani kidawklo, a hapak silsial khutsiam (carpenter, lettamah, mistiri) te in a gualh dimdiam uh saihapak leisek bangin kikim dimdiam a, ka din khop uh ciang ka bil ciang pha a, a pumpi lah thaulo, gawnglo, model figure acih te uh hi a, 'hoihbektak' hi.
Mel lah hoih, lai lah siam, Pasian lah zahtak, a gamtat hoih zaw lai... khatvei piang ciatciat hampha si e. Ngaih et ta leng hong maitai, huatbawl sawm ta leng hong maitai.... laphuak siam MV Pauno in,
Lawm aw i nu muhdah te hi,
Ei deihte hi mate...
a cih te hi lo a,
Lawm aw i nu deihte hi,
Ei deihte zong hi mate...
cih ding hi. I nu in zong deih in teh, en zong lah deihsem hang mate! Amu peuhmah in maitai sa a, a hopih peuhmah in kamsiam sa in, a kikholhpih peuhmah in khialah uh hi. A sam a sau loh hang a mel kilawm tak a kidawk dingin samkilh nih tawh a biltungah kilhcip a, a biang san hilhial leh a bil siang sitset kidawk a, a bilbah te setset leh a ngawng ngo siksek kidawk thei hi. A ngawng kimvial a kikhai silver ngawngawh Khi zong a tuallua lo in a awm ah kibaatsuk a, a khi tunga kibang Singlamteh in a biakna leh a upna lim hong lak pah hi.
A puanak silh a vom leh a kang akihelh a gial bilbial in paa ta leh etlawm veve a, amah thazen leh sakhital banga kidok zitzet ahihna zeem hi. A ban bul ciang apha a a puansilh in a ban ngo leh hoih a kidawk dingteng liah lo a, a khutbom leh a khutme siangsitset te, a khutme kizum zitzet leh siangsitset tunga a kizepna zungbulh pen 'wedding ring' hi nailo hi cih kithei a, tua in lametna lianpi hong neisak lai hi (amah a mu peuhmah). A kiu vomlo a, a ban kawilo in tang zit zet a, a cin zong a vom a san nuh sese loin a pianpih mel mah tawh siangtakin kem zaw hi.
Ka khut hong let kawm a mikang pau gial bualbual a, "My name is L...." hong cih ciangin ka lungsim ah English siam kisam masa kei, kei zong no kiangah kum khat val omta ing Sen pau siam nai tuan keng ka ci ut hi. A khut neel dan! Lokho ngeilo hi inteh. "Lawm aw, i nu muhdah te hi, Ei deihte hi..... mah hi kik zel.... Aw! tunitak a i khutlet pen Pawlpi mite mai ah hi henla, ka biakinn sunguh hi leh maw, ut sing e, lungsim in kici nuam phial hi... khatveina leh a tawpna dingin... so soft, so tender...
Can we take a picture together? hong cih kiau ciangin 'Nu ei' ka lungsim thei na hiam ka ci nuam phial hi. Amah zong a zingciang a sangkahna lamah pai kik ding a, kei zong ka nasepna ah ciah kik ding ka hih manin tua zan bek mah hi ka hun neih uh cih aman zong tel lua hi. Theilua. Am lua. Ka maitai siam tawp vua maitai in ka dingkhawm vua zan electric meivak nuai ah Canon camera a suakthak penpente ka leithak pen zong hong taang zaihzaih zel sam a, lungsim in, 'a hoih diam maw'.... ci den a, a hoih pen kideih ahih manin ONCE MORE kici kha den deep hi.
Closer, stand closer... ci kawmkawm in a kinai deuh, a kigamla deuh, mel bek, khemong ciang kidawk, awmciang kidawk, cih bangin a tuamtuam ka lak ziahziah khit uh ciang... she smiles... a maitai mel hong lak a, tua zan bek mah kikhawl thei ding cih aman zong tel ahih manin haksa asa hi, amit ah kilang hi ven. Ahi zongin zan nai 11 a cin ciang numei omna kongkhak kikhak dinga, kuamah kilutsak nawnlo ding cih ka theih manin kei zong nai 10:55PM a pelh to diaidiai ciangin khialah takin ka en a, ka en kik a, aman zong hong en a, hong lehhek kik zel a, thu a genman hi nawn kei, mit a gen in zong kigen khin man nawn kei, a zawh lamcianga lungsima zop kik ding hita inteh.... oh! minute 5 bek zong leitungah a it huai hun tam hetlo hi ven maw!!
Nai 10:58, 10:59 hi sukta, aw zan khasiat huai... Gethsemani Huan lah hisam lo a.... second khat a pai kik ding pen kikho thei hi leh maw... Ting... nai 11:00 PM dak hong ging tengteng a... kongkhak cingpa hong lut a, kongkhak a khaksawm thu hong gen ciangin... Sia TS Khai lasak, LA KIK THEI LENG MAW.... aw, minute khat bek kho thei leng maw...
See you soon... someday... Taipei nong zin kik ciangin hong theisak in maw ci kawmkawm in zan khuamial kei bek a zawt kik dingin ka paikhia a, ka lungsim bel L.... kiangah nusia ka hiam ka ci hi. Cikciang iki mu kik tam?
Khangno khoppi omlo in, cultural night omlo hi leh tuani in L.... tawh ka kimu diam. Kei Baptist ka hih hang lungsimah biakna gamgi omlo a, maitaina in gamgi a neih loh bangin itna in zong gamgi neilo hi. Lungsim nih kituaktak a kikhawl hi lel a, biakna leh pau, ngeina leh minam khenlo hi. ITNA etlawm a, itna hoih hi.
Tu in kha khat a pha ding hi kik man zel a, Km 280 banga gamla ah LS sangkah in a om hang lungsim gam ah bel centimeter khat zong kigamla lo hi. Cikciang hih ka maan lak te uh enkhawm in, a maitai leh smiling face te ka mu kik tam cih ka theih loh hang, ama'n zong hong phawk hun omveve ding a, "tua zan" a ngaihsut hun om veve ding hi.
"Love at first sight" hi cih aman zong nial thei tuan kenteh. Zolia maw, Senlia maw... kilamdang kei, itna a kibang hilo hiam, ngaihna a kibang hilo hiam...
A mel hoih dan melhoih dan....
(tua zah ci phot ni)
Hau Za Cin
Phuitong Liim
No comments:
Post a Comment