US sangin Canada hoih zaw

Gamdang paithei ding te theih ding a ka deih Canada thu pawlkhat ong gelh ingh.
A subject (US sang'n Canada hoih zaw hi !!!) pen thuman hi pah sam lo in, na lungsim kong laak nop mana ka tua ci gelh hizaw hi.

US ah bang dan in hamphatna teng om hiam cih theilo kahih manin, Canada tawh kisai
theih pak ding a kilawm teng ong gelh suk ning.

Gamdang khat a Refugee ngah khin a Canada ah resettlement tawh ong paite
Canada kumpi in hih anuai a bangteng in kem hi.

1. Kum khat sung khatsum mawkpiak hi. Canada sum in $600 or 580 ?
2. Kum khat khit teh nang leh nang nasem in na ki todelh kul hi.
3. Tua kum khat sung in, mangpau theilo te free english class khah thei hi. High school(class 9 -12) na qualify leh high school ah zong free in kikah thei hi. Province(state) khat leh khat kibang lo hi. eg. Alberta province bangah high school kah te a free lian loh hang kumpi in sponsor in sum pia uh hi.
tua pen kumkhat na cin khit ciang zong hi thei hi.

4.College leh university pen free lo ahih manin, student loan kumpi tung ah ka ngah thei hi. Living cost tawh ong pia ding ahih manin kicing mahmah hi. Kum khat ah college bang ah tution fee bek 1000 pan 3000 kikal a tangpi hi ding hi. A course tawh zong kisai hi.

5. Na sep kipan nuam pahte atawmpen 8.50 dollar(nai khat ah) tawh ki pan hi. Province khat leh khat kibang lo hi. Hih pen Ontario rate hi. a tawm na pen te ah zong 7.50 nuai om nonlo ding hi. Mangpau na pau theih naak leh $ 10 pan a tung lam ngah haklo ding hi. tu lai tak ka omna kitchener ah eimi ten nai khat in dollar 8.50 leh 20 kikal lawh uh hi. Pau siam lo ten zong nasep mulah sam lo uh hi.

6. Tu lai takin Canada pai nuam te a dingin, Alberta province ah pai leh hoih pen ding in ka um hi.
Canada a dingin, economic hoih na pen ahihi. Khasum zong tamdeuh se hi. Nasep zong tam zaw ahih manin, canada province tuamtuam eg. east canada lamte bang lal cih tak in lal ngeingai uh hi.

6. Pilna tawh kawlgam leh india pan khawng in embassy pan landing doc. tawh ong pai zong tampi om hi. A qualify...degree sang nei te a dingin haksa lo hi. Test na passed nak leh haksa lo hi. Ahi zongin a qualification tawh kituak ding nasep muh hak mahmah hi. canada experience neilo te company te in deih masa lo hi. Mipil pipi India te bang tawh na sep hoih khollo khawng kisem khom hi. A lungkia, ciah kiknuam zong om veve uh hi.

7. Khasum nai khat ah 12 ciang na lawh nak leh mawtaw leh Inn bat lei cih khawng haksa lo hi. Sum na bat nuam nak leh. Tua dan zong Eimi mawtaw nei leh Inn nei tampi om ta hi.

8. Company khat ah kalkhat in 40 hours kisem thei hi. Overtime aom leh 60 hours max. kisem thei hi. Overtime na sep leh 50 percent extra ong ki pia ding hi. eg. nai khat ah 20 na lawh leh 30 rate tawh ong ki pia ding hi. Company dang ah part time or full time na sep beh leh tua pen phamawh lo hi. 40 hours leh 60 hours overtime mah hi kik hi. Tua bel semzo veih maw...!! haksa ding hi. Part time bel sem zo ni teh.

9. Health care tawh kisai pen public ahih manin free hi. Doctor te ki ensak leng sum kisam lo hi. Zatui pen prescription ahih leh na company ten ong piaksak ding hi. Prescription ahih kei leh nang na piak kul hi. Tua pen serious lo cihna hi. tam zong beilo cihna hi. Free ahih hangin, natna pawlkhat, operation ding cihdan pawlkhat te emergency ahih kei nak leh a kha a sim ngak kul thei hi. Tua dante ah khat veivei sum neite bang heh thei mahmah uh hi. "na natna tawl khat na thuakthuak lai o" ki cihna tawh kibang sa uh hi. A hang bel doctor kicing zo vetlo hi mawk hi.

10. Nasem zolo or nasep mu zolo te leh nasep ki tawpsak te
Canada ah nasem nuamlo, mi ginalo leh mi palang tam mahmah veve hi. Nasep ngah zolo or nasem nuamlo a nasep zonglo ten zuau gen in, welfare ngen in, welfare te in innsap mah leh nek leh dawn ding pia uh hi. Tua bang tawh a khantawn a om zong tampi om veve uh hi. kawlgammi zong tua dan khawng na om veve vial hi.. Zumhuai mahmah hi. Company ah business hoihloh hang tawh sepna ki tawpsak te Employment insuarance te kha 9 sum khawng sum pia uh hi. Tua dan pen kua peuh tung ah a tung thei thu hi. Nasep na muh kik leh tua ong pia nonlo pah uh hi. Zuau kigen theilo hi. Kawlgam hilo hi.

11. Pi tek, putek te (over 65)
Nasemsem te a sepnana panin, kumpi retirement plan neisak in i khasum panin ong khawlsak hi.. Nasem manlo pu/pi tekte bel Old age pension ki pia hi. na pension pen gam khat peuhpeuh na utut na ah om in sum ki ngah thei hi. Canada mi na hih lai sung ten..

A tawpna...

Resettlement tawh Canada ong pai te dingin, Vancouver ah pai leh ka deihsak hi.
Tuateng ah Kumpi khasum na ngah ban ah Cash(sumtang) tawh Construction ah sem kawm theihna baih mahmah hi. Mun dang ah cash tawh sepna om mello hi. Farm(zanglo) khawng ah summer teh a om hangin, nai khat ah dollar 7 khawng bek pia uh hi. Vancouver ah construction a sem ten cash tawh 10 kimmim or more...ngah uh hi.

Ki ging khawl lo a kong gelhsuk biatbuat ahih man in ki cinlohna tampi om ding hi.
Ki theisiam tek ni.

US ahoih zawtna ahi zongin, ahoih loh zawtna ahi zongin a thei ten ong behlap le uh mi tampi
in phattuam pih ding in um ing.

canada ah Zomi hing a cilo te, ei sang thuthei masa zaw leh gamdang pai masa zaw te a tamzaw canada ong pai zaw uh ahih manin, ka lung himawh pong mawk hi.

Mite a melhoih tawh, a melsia tawh, a pil leh hai bulom te innkuankuan in ong paipai ahih man un,
Zomi te zong tua dan veve bang hang Zogam kumtawn a luah tuan sese ding cih huai hi.

canada 1000 teh US 856 cih bangin ki khai hi.

Ngaih Lian
canada

Sia Hang Khan lian kup pih na ka thukim ppih ban ah kei zong tawm khat hong pu lak nuam ing.
Norway gam pen a bei sa kum li a ki pan in UN te in ten na ding a, a hoih pen pen in hong ciap teh sak hi. Norway gam sung ah zong tu laitak a kei ten na Stavanger pen a hoih pen in ki gen hi. Gam Kumpi hau a hih man in tangmi tangta te a ding in nuam tuam hi.Pilna lam pen College kum thum sung pen stipen ngah uh a kha khat in US? 550. ngah uh hi. English pen second language hi a, mangpau leh manglai siam loh ding patauh om sa keng. Norway te in a mau pau a thupi sak te hi a, english thei lo siamlo om tuan lo hi.Cidam na lam bel a vek pi in free ci ziau ni.Khasum leh income pen a tam na gam ahih ban ah van man zong tam man pah hi. USA a om te in na tel cian nop uh leh Sia. Suan Za Lian in hong pha khin a hih man in na dong un. Ki huh ki pan pih na ah percentage in a tam pen gam hi.
Gal deih lo lua ki sa ki lem ding bek mah lung gulh uh a, UN ah zong Secretary general sem masa pn Norwegian te hi. Namgim tam na, CO2 pian na, Ngasa tam na gam hi.Mi pi a hih zah khat un a mau pau bel thupi sak pah a, kumthum ciang dong khasum tawh pausin na ki nei hi. mi dang te a zong respect ve ve in ei ma pau tawh ih ta te lai hilh ding sia hong pia lai hi.Gamdang mi te deidan lua cih om tuan lo in Norway Kumpi leh Gamdang mi te ki pawl na a tuam in ki nei hi. Kawl gam mi te hong vei mah mah hi. June 21-22, 2007 in Kawlgam thu kamkum na om a,Karen pan in David TawThailand, Shan pan in Sai Aung Mat USA, biakna pan in Ben RogerUK leh Free Burma Ranger, Khin Ohnmar ,Dr. Win Min, Partners leh Norway te i Priminister lui pa Bonevik te in thu gen hi. Ei E N C (Mualtung mi te ki pawl na)te ki bulphuh pha diak hi.
Lawm te cih dan in hoih zaw leh hoih pen cih ka thei kei a, nong pai theih uh leh ki sik lo ding hi uh teh. Kua mah a ki sik om nai lo hi. Welfare pen hoih mah mah cih ding hi in, kei bang Norway ka tun khak pen hampha ka ki sa mah mah hi.
A zen zen in ei mi sung pan in, gamdang pai theih na ding a nei sa te a lunglut na om uh leh hong contact un. Ih ki huh theih na ding a om leh ki pan pih ding hi hang.

Deihsak na leh kuppih na,
Pum Za Chin
Skipsbggergt 17
4085,Hundvåg stavanger
Mob.- 0047 928 82 868


Taiwan hoihzaw thamtham hi! ei omna gam tek nuam pen ci ding i hih leh .... he he..... Ciamnuihna hi sam e. Kei omna bel - gambeel kisaanglo, pemna dingin zong nasep kician mahmah nei hiam, amau nungakte zi in nei hiam, pasal in nei hiam ahih kei leh a hamsa mahmah ding hi (tu laitak in), ahi zongin leitung pen a thudik hiam (is the world fair?) ci leng leitung pen thudik omlo hi. Thudik a kici khat zong omlo hi mawk hi. A tehna a kibanglo hi a, a tehna ciangkang tawite khut ah thudik a om hi lel hi. (Tua thudang hi e).

Norway pen US, Canada, etc sang hoih zaw ciin UN in gen ahih leh UN i cih pen USA te in amau deihdan in a paisak uh hiphial hi a, a tamzaw, tua manin US te in, "US ah hong pai nawn kei unla, Norway lam ah na pai phot un" a cihna ahi tam maw? ..... he he.....

A hoihna tampi tak mah om tek mah ding hi. Bang bang hi leh Pu Hang Khan Lian hong thukupna pen thupi sa ing. Mailam khualna a cih pen diksa ing. Mailam khual pen Zomi bek hilo, leitung minam khempeuh hi a, mailam khual mana gamdang zin, gamdang pai cih pen kisuanglahna ding om zenzen lo hi. A tunga i gen mah bangin "Leitung thumaan lo hi, The world is not fair", leitung pen ahihna bang takin pai ding hi leh leitungah kitot, kisel om lo dinga, kumpi kisam lo dinga, kiukna kisam lo dinga, no gam, ko gam cih omlo ding hi.

Tua manin Zomi aw, gamdang na pai sawm tantan pen kisungsia het ken. A lampi maan bek na tot sawm leh lampi maan om tuanlo hi. A lampi maan a kici pen a bawlte mihing mah hi lel a, a kikhel khel thu hi lel hi. Mailam khualna in a nuamzaw gam i delh ding ahi hi. Tua cih ciang kumpi te deihloh bangin gamta ding cih hilo hi. Zomi bek gambeel hi lo a, Zomi te bek nuntak nuam a zong hi lo hi.

India gam Zomi te zong khuapi zuan in kidem uh a, tenna Mizogam leh Manipur te nusia in Delhi, Kolkatta, Banglore, Bombay, etc ah pem ziahziah uh hi. A pem masasa mailam khual kici a, thumu, mipil, mihau, mi hampha kici ta hi. Tua manin Sengam pan nuntak nopzaw zonga dingkhia te i khualzinna lamtawp a tung nailo i hi hi.

A taktak in Zogam i cih zong leitung bup pen Zogam hong himai ta hi. I tenna ciangciang i gam hi a, i tenna khua khua i khua hong hita mai hi. Tua ahih manin "Zomi diaspora" cih khat pen a piangpiang hi gige hi.

Khuata pan khuapi ah, khuapi khat pan a khuapi zaw sem ah mihing kitai ciat a, a sau tung, a gamla tungte a hampha in kituat hi. Tua banga mailam i khualna ciat ah Topa Pasian in Zomi te thupha hong pia henla, lamzangna, tuahphatna, lawhcinna te hong ngahsak ta hen.

Lai Siangtho sungah Abraham zong Ur khua nusia a, Lot te innkuan in zong Sodom khua nusia uh hi. Mailam khualna vive hi. India mi tampi in India nusia in US, UK, Canada, etc zuan uh a, tua bang mah in leitung minam khempeuh in a nuamzaw gam na zuan tek uh hi. Zomi te amasa pen hilo a, a nunung pen zong hi lo hi. Leitung pai dan hi lel a, leitung mi diktak Zomi te hi hang cih hong theisak zaw hi.

US in Iraq a do zong mailam khualna mah hi.

Tate khual ciatciat.

Heina peuhah Zomi,

Hau Za Cin
Phuitong Liim