Taiwan ah Church member hi ing: Dr Chin

Welcome New Members:
Sept.17, 2006: Grace Baptist Church, 90, Sec 3, Hsin Sheng Road, Taipei City, Taiwan (www.gbc.org. tw) in tuni kei zong pawlpi mi in hong sang a, official in pawlpi laibupi ah ka min kikhumta cihna hi. Ka lungdam mahmah hi. May 28, 2006 ni pan ka kikhopna hi a National Taiwan University kong maisan takah om hi. English service leh Chinese service om a, English service ka zom hi.
Taipei ka tun tungin ka nasepna ding University ah ka pai ciangin a gal ah singlamteh kisuang khat ka mu pah a ka lungsim ah christian zong om hi maw ka ci hi. Tua bek hilo in kikhopna dingin ka naih thei tam maw ka ci a, ka khamuang pah hi. Nungak pasal nei tuung bangin theih ngei lohna mun ka tun vat ciangin ka lungsim ah lungnopna hong pia in hong khamuan masa hih singlamteh kisuang pen hi. Zan ka lup ding ciang tohlet pan ka khuadak leh tua singlamteh pen ka galmuh thei a, lungnuam tak in ka ih mu hi.
Tua pan ni gukni, nipini masa pen ah ka va kikhawm a, maithak, khatvei kikhawmte hong dingsak uh a, ka vei leh taka mite in hong cibai in, hong khutlet in hong maitai uh a, ka lungsim khat hong nuam heha hi. Ka lungsim ah inteek suak gawp ka hih manin nipini kik ding ka ngaklah pah hi.
Ka min atna ding laidalno khat leh laikung hong pia uh a, ka at khit ciangin sumpi donna bawmsung ah ka khia a, tua pan amau ka min na ciamteh uh hi. Tua zawh, May-June-July- August-Sept, kha nga ciangin member khat in hong sang pan uh hi. Praise be to God.
Kei ka hun tamzaw inn nusia in zin khia ka hih manin inn banga ka lunggulh den khat pen Biakin hi. Sangkahna ah zong nipini kikhop loh ding ka ngaihsun ngei kei hi. Vaigam ah zong kikhop loh ding ka ngaihsun ngam kei a, Kanpur ka omlai in ka lamet loh in kikhop makai in ka pang kha mawk hi. Pasian hong zatnopna ka lungdam hi. Ka lungdam mahmahna khat pen tuni dong ka siate Pasian thu um vive hi. Tua manin nipini kikhop ding leh biakna pen suakta takin ka zui thei hi. Tua pen ka thungetna ah ka hel ngeiloh ahih hangin vantung leitung a bawlpa leh keima nuntakna mahmah a bawlpa in hong sehsak hi ding hi.
Ka lungdamna thu hong pulak ka hi hi.
Mailam ah Zomite zong hih lai mun, hih khuapi ah zin in teeng in nasem in hong pai lai ding a tuani ciangin hih biakinn, hih kikhopna a beel nuamte adingin belhtak, kikhopna taak hi cih kong pulak nuam hi. Tu laitak Pastor sem pen Rev. David Brown, US pan hi. A innkuan un Pasian nasem in hong pai ahi uh hi.
Praise, Glory and Honour be to God,

Hau Za Cin
Phuitong Liim