Asian Baptist Congress ah Tuailaiten phatna la sa

Upa L Vungzamuan
Youth Coordinator, EBC
Director of Missions Rev S Vungminthang makaihna in Tuailai Lapawl leh mimal bangzah hiam kigawm ten April 28 in Thailand Khawpi nihna Chiang Mai zuanin ka kuankhia ua May 8, 2007 in damtak in ka hong tung kikta uhi. EBC khangthu a dia chiamteh tham hiding in BOT in tuailaite gam hiaitan a hon sawl khiak ziakun kipak petmah in Pathian min ka phat uhi. Hiai khual zinna a ka kizatdan uh leh thil tuahte tamlou ka hon taklang nuam hi.
Khawmpi thupi: Khawmpi nih kigawm “Living Water Conference” BWA saina leh “Asian Baptist Congress” ABF saina a kinei a vatel ka hi ua, phatna lasakna hun ka nei kha tuak uhi. Khawmpi thupi “Asia Jesus Cares” akichi a Asia gam teng mite Jesu’n hon kema hon khawtauh petmah ahihdan uangtak a genkhiak in om hi. Asia gam in a thiltuahte Ziinling, Tsunami, Kialletak, Salegal leh haksatna chiteng mabana kuatung hong tulai ding chih kitheilou himahleh Jesu’n hon kem gige chih leh khawvel pumpi sehthum suah sehnih Asia mite i hihman in Pathian mittuknate i hi.
Khawmpi palai: Khawmpi palai gam 25 vel a kipan paikhawm 1552 pha a; khuallian dangte, Volunteers leh COLA (Committee On Local Arrangement) kichi tengteng gawmkhawm in 1700 vel hihtuak hi. EBC akipan in palai 21 kipha a Northeast apan in tamzawsem, India apan in 616 ka pha uhi. Living Water Conference penah Rev S Vungminthang DMs in sharing saulou a neikha a Tuailaiten phatna la nih sakha uhi. AB Congress pen ahihleh Lam lahna leh Lapawl sakna hun ka vazang kha uhi. I tuailaite milakah a suanhuai uh a eilak sangmah a siamzaw uh zeizaw uh ahi chih ka muhdan ahia, kidemna om hileh khatna a pang ngeingei ding uh ahi. Phatna la tawh thuah a hong lam taktak bang uh chu aw, mit tawh kam tawh tang ngam lou zen in mipi’n en heuhou mai ua, a hon zawh takun kikhopna insung thawn zuazua zen in khutbet thawm ging husa hong kipan ngal hi. Tuailai talent nei leh creative taktak hon pia i Pathian in thupina tengteng tang hen aw.
Vaihawmna: Vaihawmna ah kei lenh heutute deihsakna ziakin ka vatel sam a thupi leh ka hinkhua adia chiamteh tham ka sa hi. Thupukna khenkhatte: Asian Baptist Federation (ABF) kichisek pen Asia-Pacific Baptist Federation (APBF) chih a khek ahita. APBF President thak dingin Rev Dr Chu Wood Ping kichi Hong Kong Baptist Convention a General Secretary leh APBF General Secretary thak dingin Rev P Bonny Resu Sillong a om mah telchingin om nawn hi. APBF khawmpi nawn 2012 chiangin Malaysia ah om ding hi. Huai hun chiangin tuailai tamsem awle, mi’n hon phawk dek pan uh ahi!!
APBF Vaipawthakte (2007-2012): 1. President: Rev Dr Chu Wood Ping, Hong Kong. 2. Vice President 3te: (a) Rev John Kock, Malaysia (b) Mrs Precy Caronongan, Philippines (c) Rev Dr K Thanzaua, India. 3. General Secretary: Rev P Bonny Resu, India. 4. Treasurer: Ms Surang Kinghiranwatana, Thailand. Committee Chairpersons: 5. Asia Baptist Aid: Dr Less Fussell, Australia. 6. Education: Dr Lilian Lim, Singapore. 7. Communication: Mr Bijoy A Sangma India. 8. Asian Baptist Peace Network: Rev Alan Mar, Australia. 9. Evangelism and Missions: Rev Brain Winslade New Zealand. 10 Co-opted: (a) Rev David Kwok, Hong Kong (b) Rev Ronny Welong , Indonesia. Auxiliaries: Asian Baptist Women Union: Ms Chiyo Murakami, President. South West Pacific Baptist Women Union: Ms Lorrainne Walker President. Youth: Mr Jesse Ray Porras President.
Dr Lotz khakna: Rev Dr Denton Lotz nasepna apan pension ta khakna hun zat ahia, vaihawmna a telpha chiang tengin hun tuambik zat ahi. EBC apan in Rev S Vungminthang Director of Missions zui in kei le ka vatel kha hi. EBC apan itna leh deihsakna genna in van hoihtak leh manphatak siamnel taka kibawl ka present ua, kou theihdan in convention dangte thilpiak tengteng sangin eipawl hihmah hoih pen hiin ka thei uhi. Khakna ann limchi mahmah zaat tuam tuam ngen, khat khit khat in table tengah kilui a nasemtuten hong khek ziahziah uhi, tuate lakah voknou pumkan khupboh hehhah in table tungah hong kilui kha a nekma in leng ki en vung vung zawzen hi.
Tuailai tawh kisai: Asia Baptist Youth Fellowship te vaisaina in November 2007 chiangin Leadership Training Singapore ah om ding. Asia Baptist Youth Conference 2009 chiangin in Japan ah om ding a, ahun ding kibikhiah chiah nai lou hi. 15th Baptist Youth World Conference kichih Leipzig Germany ah July 30 – Aug. 3, 2008 sung neih hiding. Hiai tawh kisai highlight Rev Emmet Dunn Director of Youth Department BWA in nei a nop chipetmah hi. Thupi “Dive Deeper” chih ahih banah tuailaite a dingin mission opportunities tamtak om ding ahih dan hong kigen chiangin tuailai talent hoih taktak neite lungsim ah a dimlet uhi.
Workshop leh Stream: Mahni lunglutna lamlam a teltheihna ding kisinsakna hun a om a tuate workshop leh stream a kichi hi. Missions lam bang, Tuailai lam bang, Music lam bang leh Naupang lam khawng a telin ka kikhen dalh singseng zel uhi. Ka telna lamchiat uh nuamsa leh phattuampih chiat hiin ka thei hi. Adiak in tuailai lungsim hat leh thilthakte theisiam a akul leh behlap thei zel mifel taktak ngen ahihman un mitangpi phattuampih theih tampi a zilkhiak uh ka lamen.
Kipahthu genna: Gam hia tan a tuailaite khawmpi hawhna dia hon khawtuahtute amalmal a ginseng lou a kihihmanin a lompi in kipahthu genna kahon taklang nuam hi. (a) Executive Officer ten a bul hon patsak masapen uh, (b) BOT in lemsakpihna pia in a thu hong kipan petmah hi. (c) BYF Central Sub-committee in a poimawh bangkim plan hon bawl khia uh, (d) Sumlepai zonna ah MLA candidate khenkhatte fellowship neihpihna tungtawn in huhna tampi tak hong lut hi (e) Music Festival Lamka leh Imphal kineihna a ticket hon leisaktu tengteng (f) Radio recording hon ngaihtuahsaktute, (g) Passport saina a honbuaipihtute tengteng leh deihsaktu mimal minloh senglouh ten ka kuan ua kipan ka tunkik dong un huhna leh thumsakna tampi ka dong uhi. “Ngai un unaute kituak diamdiam a omkhawm nak hoih in nak nop hina tel e” (Sam 133:1).
Atuam tuam: Nek ding leh dawn ding bangkim siangthou leh kiching mahmah in a hunhun in hon pia uh a, himahleh a hun lou a nek theih louh leh dawn theih mawk louh ahi. COLA kichi khawmpi vai a na hon sepsaktu tampite a kipezou mahmah ua, buaina i neih leh hon panpih pah dia mansa hi gige uh. Hiai khawmpi hun kallak in Rev Dr Ginneithang te nupa in hongpha uh a EBC tuailaite phatna lasa dia gam hiai tan ahong kuan thei hon kipahpih lua ahihdan uh hong langsak uhi. Khawlak a siangthou a thil bangkim damtheih huai takin a om a enhuai sim, Zomite hiai tan i tun hun ding ngaklah huai mahmah chih chih in om hi.
(Courtesy: Khristian Thukizakna, June 2007 issue)