"ZOMUS KONSERT 2008, Malaysia" in leitungbup hong phawng

! Hih "ZOMUS KONSERT 2008, Malaysia" DVD i et ciangin Zomi ihih ki angtang semsem hi. Khanglui, i pu i pate in Zu leh Sa tawh nuamsa in khawh leh vulh, khawi leh tuk a kicingin a neih uh hangin a sepnop, a bawlnop, a hihnop uh kicing sa nailo uh ahih manin, "Ka zawn in hong haisak" na ci uh hi. Na lianpipi, na hoih tampi sem nuam lai uh ahih manin hau zo, nei zo kisa hetlo uh hi. A lungsim uh lian a, a tup uh lian in, a sawm uh gil hi. A pil man uh hi a, a ciim man uh hi. Amau tu leh ta, a tu sawn uh, a suan a khakte uh i hih manin pupa sisan i pumpi ah luangin, kizel a, a mel a sa uh i tungah banglai a, dau tuanlo in tak sitset, ciim kilkel lai hi. Tua i phawk tawntung ding hoih kasa hi. Zomi. Zogam ah om ta leng Zomi, Malaysia ah om ta leng Zomi, koi mun peuhah om leng Zomi ihi cih a kilatna hih ZOMUS KONSERT 2008, Malaysia DVD i et ciangin kitel sitset hi. Bang hang in maw? Leitung khantohna khat ahi, Tumging leh Lasakna te ah Zomite zong a hunhun in leitung kalsuan tawh kiton in kalsuan sawm in i lasiam, i thusiam leh tumging siamte in na hanciam uh a, a nung pan sum leh pai neite in tawsawn in "Takkheh pasal!" ciin minam bup in i hanciam khawm liailiai hi. Tua khempeuh a bul pan suut ding ci leeng 1980's pan a Sihna Kigo Zo, Lengtong, Agape Itna Late, etc leh Tui buasa kiluak kik theilo, Thuam mual pan itna, Ngaih Anglai/Ah/Mah, etc thu a kicingin i suut toh dimdem hong kisam ding hi. Tuate suut khin manlo ding i hih manin honpi khat nusia phot in i gennop pawlkhat bek kawn kawikawi in i malawk phot ding hi. Amasa pen in, hih ZOMUS KONSERT 2008, Malaysia lasakna in hong muhsak, limlang a ki-en bang kician hong muhsak pen, 'a van om peuh leh Zomi pil hi' cih hi. A kiphat hi kei hang, Zomite kihailo hi. Gual kiban hi. A kisam neih leh lam om peuh leh Zomi te in kisem thei hi, we can deliver it. Sum leh pai neih leh lam a hau neinai minam pawlkhat in hibangin sem theilo, leitung minam khangto te tawh a kikim in sem zolo, gual banlo uh hi. Zomite in pen sem thei, gual ban hi hang. Sia Job Thawngno kammal kawm leng, "Sem theilua hi hang." Sem theilua cih kitel hi. A DVD na en phapha lecin na tel semsem ding hi. Hih pen a DVD ka muh masak ni October 16, 2008 a ka lungsim ah hong suak masa pen thu kong at hi. US gam nuam penpen pan zong Zomi hih ka angtang mahmah hi. Zomi hih nuam kasa hi. Zomi a hong bawl Pasian min ka phat hi. Zomi khempeuh hong bawlpa hangin Zomite hampha kasa hi. Lasiam JK Kam in tua khempeuh la tawh na phuak a, "Zomi thupha Sianmang banzal hi" na ci hi, dik, maan kasa mahmah hi. Zomi te hizah a thupha leh khantohna i neih pen Pasian hong angvan man hi takpi hi ciin ka um hi. "Leitungbup a thawn Malaysia ah om Zomite" in Zomi khempeuh omna leitung kiuli hong thawn kik zuaizuai uh hi. Lasakna leh tumging tawh gen ding hi leng, tu kum in zong DVD thum tawh Zomi te hong phawng khin zo uh hi. A khatna ah: "KA ZUA NGAIH" cih hi a, Lengtong Pauno in la hoih nono sa in, Malaysia Zomi pawlkhat nuntakzia hong pulak a, haksatna, gimna, tawlna sung pan zong Pasian a phat veve Zomi i hihna hong lak hi. "So na vinghvengh" in hong thangzaw pen a thulu "Nim na dildial" hizaw hi ciin amah Lengtong Pauno teekteek in hong gen a, semsum laitual lenna gamla a sakzia leh, "Tongkup pih theihloh Siksem" tawh sun nisa nuai ah kawi leh von tawh gibang khen a nuntakna zon a haksat dan hong phuangkhia hi. Mitkha tawh hong mu sak hi. Hih DVD pen USA ah om Pa Aimung in sum leh pai tawh a tawsawnna pan hong piang hi a, a pa phawkna ahih manin hih dahna tungah i dahpih hi. [Tawm behlap leng: Pa Ai Mung pen "Thuammual pan Itna" cih video a bawlte hi a, Hawaii a om Pa Thang Lian Pau tawh hanciam in Cowboy style a Sakol tung tuanga nungak melhoih Zolia te Thuammual ah a kidelhsak ziahziah amau ahi hi. Ka muh nai loh hangin a muhnop dan Lamka ka zin khat in ka naute inhong gen ngei hi. Amah a bawlpa tawh Miami Beach ah ka kimuh laiin, "Tua hun laiin nasep a haksat dan, a Zolia leh Zotaang ding zong a baih loh dan leh vanzat a kaihkhop a haksat dan hong gen a," "Zomi te history ah na min uh lianpi a gelh, a bei ngei nawnlo dinga at hizaw uh teh" ciin ka dawng thei bek hi.] A nihna, "STEVEN BAND" kici DVD hi. (a min ka khial tam aw). Amau lasak lak pan a hoih mahmah kasak diak om a, "Missionary hong puakte khe bangzah in etlawm hiam" cih la khawng, "Na khempeuh hoih, Na khempeuh kilawm..." cihte, "Nong lamto hi (You raise me up to more than I can be)" cih late hi. Hih CD/DVD pen May kha pawl in US ka tun tung in Malaysia pan hong tungte tawh Washington DC khuapi sunga President Bush inn kong mai khawng ka vak kawmkawm un ka ngai uh hi. President Bush tenna huang khawngah zong Zola a kingai ziahziah hita mawk ei Zomite'n, missionary hong puak 'khe' te hanga i thupha saan hi. A thumna ah tu a i ngah lian ZOMUS KONSERT 2008, MALAYSIA pen hi. Hih DVD i et tak ciangin Zomite pen a van kicing nei peuh leng gual kiban hi cih hong mu sak, hong lak sitset hi. Hih thu a kicingzaw a i gen zom ma in thunengkai khat leh nih tawh zom pak leng: Youtube pan in "Zomi" cih zongsak leng Malaysia ah om Zomi te nasepna, matutna leh Zomi a minthansakna uh tampi hong kilang ziahziah hi. Tuate lak ah mit hong la mahmah, a ki encim theilo khat pen Zomi Fashion Show cih hiam khat ah numeino naupang khat Fashion Show kipatna dinga hong kilat masak na mun hi. Mipi khempeuh in pakta in siam sa uh a, khut beng ziahziah in tua Fashion Show ah Zopuan tuamtuam lahna picing sak mahmah hi. Zolam leh Zongeina lahna tuamtuam kimu thei hi. Gam dang mun dang a tungte in tua bang Zolam lahna youtube ah koih mello uh hi. Malaysia Zomi te lamna leh late tungpan mun dang ah Zola leh Zolam khawng kisin hita hi. Biakna leh piakna, phatna leh pahtawina hunte, lasakna leh kipawlna hun tampi a kizatna Malaysia Zomi te hi cih kimu thei hi. ZAM THUPUAK bang i sim ciang, ahih kei leh AKM AWGING, ahih kei leh ZOMI TIMES cih bang i sim ciangin Pu Lang Kap laphuak tuamtuam i simkha a, Zomi te in Malaysia ah i tuak thute leh inn lum, lo lum nusia a gamdang ah haksa tak nuntakna kipan kik i hihdan khawng ZOLA tawh a phuahte i sim ciangin i dipkua a, i awm bingin i nehno tanghial hi. Ahih hangin tua laphuahte in i Zomi tangthu a ciamteh toto ahih manin mailam ah Zomi thu a kante in hong kankhia dinga, a laibu vuah hong gelh dinga, amah laphuakpa min mang nawnlo ding hi. Zomi tangthu a gelhgelh ahih lam a kithei kei phial zongin "Nung ciang i min bangci than ding tu'n kithei nailo hi" cih la bangin a kithei nailo thu bek hi a, a kisuut kik ding tangthu ahi hi. Lasiam pawlkhat, gentehna in Sia David Kham cihte in Zomi kikhopna te ah lasakna leh video khumna tawh hun a zatte uh i muh ciangin Zomi omna khempeuh a thawn Malaysia Zomite ahihna uh hong kilang semsem hi. Biakna sia a semte vehna leh hunzatna te khempeuh zong suut tham cing ding a, ZAM mapanna leh Zomi ading a septe uh zong (a theite in hong gen leh) ciamteh tham om ding hi. Zomi makaite thusiamna tawh Zomi Education Council (ZEC) cih hong phuan uh a, laipilna leh siamna sinna tuamtuam ah kipattah dingin hong thawi tak uh ciangin hong picingtoto in kalsuan kisina, tangtak in lam a pai ding hi ta hi. Muizang tak, hat tak, khawllo in hih pilna set (education program) apai ding i deihsak hi. Leitung bup hong thawn ziahziah Malaysia ah om Zomi te thu pen hih lai ah gen khin pak theilo ding i hih manin laphuaksiam Sia TL Mungbawi (Mapang khawm ni), lasiam thak Taapi, "Inn ngai ing" a ci ngaungau lasiam Sia Zam Dal te thu leh ZOMUS KOSERT 2008 DVD ka etna pan ka phawk thute a zom ah i genta ding hi. (zop lai ding) Hau Za Cin Phuitong Liim