Tawmvei Hong Kong ah:

Zomi lasiam sia Lianpi (Taang Lungtup) room, Hong Kong panin hih lai ka gelh laitak in ka lungsim ah tu ni sun nai 10:30AM a Hong Kong Airport ka tuk laitak khawng ah hong kilang naunau hi. Tuipi tunga vanleng niamcik a lenga tuipi tunga gunkuang hat tak a taite leh HK inn khan sang pipi te kigalmuh na te ka mitkha ah a bei thei kei hi.

Tu laitak ka omna uh Lutheran Theological Seminary pen mualtungah a om hi a, HK khuasung mun bangzah hiamkimu thei hi. A gam huih a siangtho mahmah loh hangin a niinlua hi lo a, lampi siangtho in kawi mahmah a, inn bel khuaipheeng (hive) tawh a kibang himai e! Gam palak singkung po zawhlohna guam leh singkungte, etc. aw....... mual a kolh kiukeu te ka muh ciang Taipei sangin khuapi kiim ah singkung tawmzaw a huih siangtho a tawmzawk ding, huih a siangtho loh zawk ding (more hazy) hi mah e ka ci hi.

Minute 105 sung khawng a kileeng suk, Taipei pan a kisuk bawh hih HK khuapi pen British khut ma om hi cih a kitheihna tampi om a - moto right hand drive, left side zui cih khawng hipah a, a discipline leh a ki uk dan uh mikang influence om hi cih kithei hi.

Vanlengtual ah Sia Lianpi leh Rev. Dal Khan Mang in hong dawn a, Bus ah tuangin amau omna student guest house ka tung hi. Table Tennis ka kimawl pah ziahziah uh a, TAIWAN vs HONG KONG.... the winner is...... who else..he he!

Ann duh bangbang huan in, duh zahzah kine thei a, amau international students ahih manun siate in it mahmah uh hi. Gampalak tawh kizom pah ahih manin amau compound ah Zawng hon a tam mahmah thu gen uh a, ken bel Thokang a tam thu hong gen loh uh hangin ka thei hi!!

Siamah Man Hau Cing, Zomi numei lak pan Doctorate a sin ding kipan khat om a, a melhoih bek hilo in maitai in kamsiang setset hi. (Hih pen ka kimuhcilna uh ka first impression hi phot hi).

Sia Lianpi, (a ginglo in) Zolia a hoih mahmah khat hopih ahitam - pau susu, phun susu in, sau gelh ding zong kisuanlah huai e.... hih zahin hunsak phot ni.. he he...