"A bul hoih leh a lang kizo khin hi"

Zogam pen, kei muhna ah, a phaan siam masa sa, a meetdok siam masa sa, a exploit thei masa sa in phaan, meetdok, exploit uh a, tua a meet teng tawh gamdang pai, khuapi zuan, mun dang pai in inn, lo, moto cih bang a deihdeih uh lei in, a tu a tate uh sangkahsak, a deih uh leisak in a nusiat Zogam uh it takpi bangin a gen kik kik uh hi. Tua pen tuma hun sawt pek pan hi a, tuma deuh in zong hi lai a, tu in zong a hi toto lai hi kha thei hi.
Tua manin a hampha khin om dinga, a hampha laitak zong om kha dinga, a hampha lai ding zong om kha ding hi. Tua man in hihte a hun zui a thu piang hi lel dingin ka tuat hi. Director tuam tuam kikhek toto hi lel lo ding hiam ka ci hi. Tu ma kum 10, kum 50, kum 100 hun pan Director a semte nasep pan suut kik kik kullo ding hiam ka ci hi. Tu hun bek en lo in Zogam ah bang thu teng na piang khin a, bang hanga Zomi leh Zogam hih zah a gim thuak i hiam cih i suut kik kul ding hi. Tua ahih manin a bul lam pek pan nasep dan, ngimna, policy tuam tuam leh mipite tungah nekzonna lamah pattahna, sum zonna lamah pattahna, pilna sinna lamah pattahna cihte pek pan i suutkik kisam ding hi. "A bul hoih leh a lang kizo khin hi" (Well begin is half done) a kicih mah bangin. Tua manin a bul a kipan hoih hiam, a laizangah a kisem hoih hiam, tun a kizuun hoih hiam, mailam ading a kigelkhol hoih hiam cihte i suut taktak ding kisam takpi ding hi. Tua manin mun khat bek enlo in a vekpi in i et-kaak kisam dingin ka um hi. Hau Za Cin