Kumlui in Sente Khuado i cih Mid-autumn Festival (or simply Moon Festival) pen October kha hi a, tukum in September kha ahi hi. Ani ding pen Sept 25, 2007 hi.
1. Moon Festival bang hiam?: Sente upna ah a pasian uh khat, amin Chang Er kici vantungah lengto in khapi sungah lut a, khapi sungah teeng hi. Sente nisimna Kha 8na, Ni 15 niin tua Chang Er in a thupha leilak ah a om amite kiangah thupha khia in, tua thupha ah amite in nuamsa uh hi. Naupangte lam in, Moon Cake acih uh nek ding a tuamvilvel in bawl uh a, tuate ne in innkuan in kikhawl uh hi.
Naupang khat in tuabanga Moon Festival a zatlai in, a lungsim ah a innkuanpihte a ngaihthu leh hihbang hun ciang innkuan kim thei leeng cih a utthu gen kha a, tua hangin hih pawi hun pen Sente in Innkuan kimuhkhop hun, FAMILY RE-UNION hun thupi penpen in ngaihsun uh hi. [Christian te in Christmas i zat dan hi]. Lawm kingai te in zong hih hun pen akimuh khop ni uh hi, mun tuam ah omte. A kituah theilo te in zong tua khaliik zan Khapi en in 'maimit gawm' uh hi, kici hi.
................ (mangngilh pak).....
I tung solkha na en dih ve,
Nih gel maimit kaitui bang gawmna hi,
Luankhi tawh maimit hong suan ing.
-by H. L. Vum Nang, ("Tun sung khat pan" cassette, 1988?)
2. Khaliik zan zat dan tuamtuam: Kumlui khaliik (Full moon) pen tuma kum 10 pan simtoh-a a taang hoih penpen zan hi kici a, tukha 25/9 zana khaliik pen kumlui zah in tang hoih lo ding hi. Khaliik zan pen koi mun peuh ah hun nuam penpen khat hi a, minam tuamtuam in zatdan kibang lo hi. Zomi te in,
Khapi aw hong kia, hong kia,
Na koilai na tat, na tat?
Ka khuk buk ka tat, ka tat.
Zingsang an in bang na huan?
Khuangbai anteh ka huan a,
A tui ka hawp ka hawp a,
A ha ka bak ka bak a,
Ka gil a puak kiukeu,
Buhteiin ka sat kham phek.
- Khup Za Go (LEIVUI PANIN, 2004, pp.172).
Zomi te mah bangin namdang Hindu, Hebrew, Thai, Islam, Chinese, etc te in zong Khaliik zan pen hun tuamtuam, vai tuamtuam tawh na zang uh a, thupina khat na neisak tek uh hi. A vek in gen man kei ni.
3. Chinese Moon Festival leh Zomi Khuado a kibang hiam?: Kibang lo deuh hi. Zomi Khuado leh Chinese New Year pen kibang zaw hi. Hih Moon Festival hun leh Zomi te Khuado pen a 'hun' a kibat hangin (September - November kikal sung), a thu kibang lo hi.
Zomi Khuado Pawi pen Zomi Kumthak zong hi a, anlak pawi zong kici hi (Harvest Festival, or Zomi New Year). Kumkhat anlak khit lungdamna leh nopsak hun hi a, muk nel lianga sa nek hun hi in, gilvah hun ahi hi.
Chinese Moon Festival pen bel Khapi sungah a teeng a pasian neu khat in Khaliik zan a thupha a lot khiat, ahih kei leh leilak ah a omlaite adingin hong khiat suk khuavak leh lungdamna nuaiah kikhawlhna, holim hun hi. Nitak khuazin bektak leh khapi hong taangpah a, nitum mu manphial in khapi hong suak hi. [Lusei pau in 'arkai den zan' kici a, nitak ak giak ding khapi in hong lap cihna hi. Ak giak khin manlo in khapi hong suak, hong taang cihna hi (khaliik zan in)].
Sente in tua khapi hong suak ma in innpua ah, park ah, kong tual ah (innkuan kim a tu khawm in) nek ding huantawm uh a, Barbque (sa hang min) leh a tuamtuam nek ding khaliik nuai ah bawl uh hi. Ahang pen innsungah bawl le uh khaliik hong suak laitak mu manlo ding ahih manin! Khapi mual hong suak ding en in, ngaklah tak in na galdon uh a, lungdam takin na muak in, naupangte lungdam in lamin, piteek puteek in a hatok uh zahpihlo in hong nui sisiau lel uh hi. Khut bengin mi khempeuh lungdam hi. Tua nitaak in zan khataang ah a hih loh theihloh uh khat om a, MOON CAKE nek ahi hi. Moon cake ne in nuamsa uh hi.
Lawm kingaite zong khataang nuai ah sa hang min khawm, an huan khawm, Moon Cake ne khawm cih bangin nuamsa in kikawi uh a, khia lah mahmah, aam mahmah uh hi. Ahi zongin 'heina khatlo a mual in hal' a 'vangngaihno' neite adingin.... lawm leh gual enga, khitui naptui luanga lunglen hun ahi hi.........
4. Bruce Lee lenna gam lam ah: Kumlui a ka zat ngei zel bang un tuni in ka sepna Institute of Atomic and Molecular Sciences (IAMS), Academia Sinica, Taipei, building ah "Moon Festival Lunch" ka ne khawm uh a, Pizza, cakes, Moon cakes, sweets, drinks, bread, etc..... gilvah hi. A hun taktak pen 25/9/2007 zan hi a, ahi zongin office kikhak ding ahih manin gamdang pan hong pai scholars te annekpihna leh IAMS family kimuhkhop hun ahi hi. Lasiam Nu Gin Ngaih Ciin, Shillong in, "Hih bang hunte ngilh ni om kenteh mataw?"...... ciin mihingin hun nuam hun paisa i khiatlah dan hong phawksak hi.
Ka dam a Pasian in pha hong sakpih leh Zomi te bek hilo minam dangte in zong thupi a sak, leitunga gam khangto penpen te na ngawn in a thupi sim mahmah Kungfu Master Bruce Lee lenna gam Hong Kong ah kei zong Moon Festival zat ding ka geel hi. Hong Kong pen i theihsa ciat mah bangin 'Shopping Center' a kici mun hi a, vanman tawm in, inn sangpipi omna khua hi.
5. Hong Kong ah Zomi kuateng om?: Hong Kong ka tun ciangin Zomi kuateng om hiam ciin ka theih kisam tuanlo a, ahi zongin a om pawlkhat ka thei hi. Ahi zongin July kha a US zin, August a hong ciahkik ciang a lungsim khempeuh US ah a nusia Zomi lasiam Taang Lungtup Sia Lianpi lungzuan va neem dinga pai ka hi kei hi. He he.... A vaphualno khawi va matsak a, ama kiangah puak ding zong ka sawm ahi masa kei hi. A vaphualno khawi maan (foto) hong lak nuamloh mana tua munuam a zin ding zong ka hi tuan kei a, ama 'lawhcinna thuguk' (secrets of success) va dong ding leh va kisin dinga zin sawm zong ka hi tuan kei hi. US a zin ma a nitak, zingsang, sun, zan a hong hopih den pen hong tunkik zawh ciang HELLO cih bek zong hong gelh man nawnlohna ahang va theihsawm zong ka hi tuan kei hi. Ei lasiam hilo hi ve hang! he he....
A hand phone or mobile phone or cell phone i ci ziau ta zongin 'kua hong leisak hiam?' ciin a gen nop loh thu va dong tentan zong ka sawm kei hi. Ahang pen nidanga zan kim tan a tu zo ngeilo pa tun zankim ciang coffe cup khawng ging kekkek pan se hi, a ihmut cimloh behlap question haksa pipi ka dong nuam kei hi.
Kumpi minthang Bush te, Prince Chales te nopsak mahmah na gam khat ahih manin a zinsawm zong ka hi tuan kei a, Jackie Chan leh Su Qi te tuallenna gam ahih man zong ahi masa tuan kei hi. Indian Passport Holder te adingin ni 14 sung VISA lo in lut theih cih man bek a zin sawm ka hi kei a, Moon Festival holidays ni 5 ka neih mana time pass sawm zong ka hi tuan kei hi.
Khangkhat nuntak ciatciat mi'n gam tuamtuam ah na zin in khua tuamtuam ah na hawh uh a, minam tuamtuam tawh kikhawl in gamtat luheek na mu kawikawi uh hi. 'Leitungah i muh teng i hamphatna hi a, vantungah i khol sum teng i tangtawn go ding hi' cih amau na tel mahmah uh hi. Tua ahih manin mi muh bang mu in, mi theih bang thei kei ta leeng phakna ciangciang ah khualzin ding, gamvak ding, nek leh dawn ciam ding cih ngaihsutna tawh a zin sawm ka hi hi.
Ahi zongin, AHI ZONGIN, khattang ......
(hih teng awngsak mai ni)
I tung solkha na en dih ve,
Nih gel maimit kaitui bang gawmna hi,
Luankhi tawh maimit hong suan ing.... (nang zong hong suan in aw)...
A kici ngei zel mah bangin, wishing you a happy Chinese Moon Festival.
Hau Za Cin
Phuitong Liim
No comments:
Post a Comment