2004 kumin Munlai Tuiphum Biakinn, Kawlpi ah ZCLS Consultation leh Seminar kibawl a, kei zong observer khatin ka kihel kha hi. Kam kum thei ding leh an le tui zong amau bang a ne thei dawn thei dingin hong sang uh hi. Tua hun lai a ES pu Rev. Suan Khen Mung' thusiamna tawh ahih manin ka nuam mahmah hi. Rev. Dr. Pau Khan En leh Prof. C. Thng Za Tuan-te in hong makaih uh hi.
Tua Consultation leh Seminar tung a Siapite' sunmang leh hong makaih nop dan uh pen tu a i gen kipawlna dan hi dingin ngaihsunin tha ngah mahmah ing. Tua hunin kamkupna ah "ZCLS" pen khanto lai-in "Zomi Christian Misssion" hiam khat ci leng...
Tua nuai ah department/branch/ unit tuamtuam koihin hunbit nasem zong nei thuah mai leng; nakpi-in kipantahin voice (Hih voice cih pen a deihna thuk sa mahmah ing!!!) neih zawh sawm mahmah leng... cih zong makaiten hong kuppih uh hi. Tampi kisem khin leh phattuamna zong a om khin a om sam hangin tua hun a makaipite' sunmang taktak pen tangtung nai lo hi, ci-in mu ing.
Ka cihnopna ah net sung pan thu hong kikuppih kim theih loh hangin hih Global Zomite' kipawlna tawh kisai thu ah inn ngak i nu i pa leh i sanggamten zong hong thukimpih ding bek tham lo tun zong hong ngak lah mahmah ding uh hi. Inn lam pen na theihsa tek bang uh hi a, internet nangawn kizang zo lo hi.
Hih Global Zomi kipawlna vai pen thuthak lua danin ngaihsut ding leh kihtak bawl ding zong hi lo hi. A mun mun a phualphual ah koi gam koi mun tung ta leng Zomi khat sangin i tamzawk nak leh Zomi mah ci tantan a, akipawlte hi lo i hi hiam? Tua akipawl teng pen luan khatin luang leng.. cih thu ahih manin guai aw tun kipanin sunmangte kikumkum lai ni.
Hih kipawlna pen khangthak Zogam phuhna khat zong suak ding hi. I sanggam Hmar-te sung pan a laigelh siam mipil L.Keivom in Mizo lai tawh "Zoram Khawvel" ci-in Vol khat pan 8 dong suaksak khin a, zak nopin thupi mahmah hi. Ama gen nopna ah Zomite i tuntunna pen i gam hi... cih dan khatin deihkaih sak pong ing!
Zogam pen leitang tungah kigi suang phut a ciapteh theih hun hong tun ding thupi na ven tu hun pen leitang tung ahi nawn lo lamah gam phut a, cyberspace/ electronics media/information age/pikhau kaih theih lohna(no thei zaw ni uh cia!)... lamah gam i keek loh phamawh zaw ta hi.
Ciau luitui, beh le phung, denomination, mual le guam zui a awkaih tawmtawm kibanglo bulphuhna gamgi tuamtuamte balkhamin kuaman thau tawh hong ukcip theihlohna mun khangthak Zomite' lung kihualna cyberspace ah "Zogam thak" a phut phut hi ta hang.
Zomite' adingin i sunmangte sel cip loin pulak ciat dih ni. Bangci USA leh Europe lam pawl? World Cup tawh buai lua lai na vua leh?
Hanciam lai dih ni guai aw...
Topa' thupha,
Rev. Thang Van Lian
Korea
No comments:
Post a Comment