Dr. Cinpu leh Cingpi te'n Singapore ah Inn nei

Posted by: "pau khat suan" pksuan@yahoo.com   pksuan

Mon Feb 7, 2011 7:41 am (PST)

Dear, Zomi U le Nau

Zomite i-paipai na, i-tuntun na ah Pasian in Thupha ong pia a, tu-in zong Singapore ah Zomi Innpi khat ong ki behlap hi.  Tu-ma a sawtlua nailo lai in Dr. Cin ( Hau Za Cin ) te'n Singapore khua laizang, mun hoih penpen na, inn man a tam penpen na Toa Payoh veng ah Inn hoih mahmah khat ong lei uh hi. Tu-in, inn lei vai transaction khem peuh man siang khin a, inn puahphatna a zo pianta ahi hi. 

$ tul tampi bei a apuah kik uh hi a, open concept hi in, taangzai mahmah a, lupna khan zong khan 3 bang on ahih man in kicing mahmah hi. Lengla khan sual pen first class 18" x 18" ceramic tile, gloss finish hi-a vot lua lo in nuam mahmah hi. Anbuk lam pen rustic finish pian ciding ihiam, a ham zaw deuh hi in, tuibang buasak kha phial le'ng zong tuuk a kitawtah ding lung patauh omlo hi. Lumna khan 2te parquet floor, Burmese teak tawh kibawl hi a, limtak mah dolza kizut ahih man in te-kelhkelh a siksik nop huai liang hi. Lupna khante ah solid plywood ( Indonesia ) tawh, formica hoihtak tawh finishing  kibawl wardrobe zong innsun ban in ki tung zihziah a, zat cing mahmah ding khop in om hi.

A beisa 05 Feb 2011 ni zingsang a kipan zankim dektak dong mah Inn thak lawm/ Lungdam kohna .... House Warming leh nupate kiten kum 3 cin' lungdam kohna gawmkhawm in hun nuam kizang a, Innteekte'n meh lim mahmah namkim ( Sea Food tuamtuam, voksa, aksa, bawngsa,.... tampi ) tawh gilvah tak in lengla ong do uh a, avot nam tuamtuam leh niangtui lim mahmah ( kawlgam niangtui - shee...special ) tawh ong vak uh hi. A thu lah lim, an le tui nek le dawn khempeuh lim in, a pai khem peuh lung sim pumpi kitai mahmah hi.

Sun lam in Pawlpi pan Siate, Nasepna pan lawm le gual tampi tawh hun ki-zangkhawm hi. Nitak ciang, sanggam u le nau tawh hun zangkhawm leuleu in, lengla pen khuai vaitung mah bang ziahziah hi.

Innthak hoih mahmah a, a nei nupate' hoihna leh etlawmna, itna leh piakkhiatna, lungdam kohna te in kilawm beh sak mahmah hi. Hici bang in melmate gam, lengla/ pemta i-hihna mun nangawn ah Zomite innthak lothak leh mun le mual ong pia ibiak a nungta Pasian in min phatna ngah hen la, ong piak thupha khempeuh asang kha Dr. Cinte nupa tung ah zong thupha om paisuak ta hen ci'n deihsak thupha i ngetsak hi. 

Lungdam pihna tawh,

pksuan
singapore