Zomi u leh nau,
Dec 28, 2008, Nipini in Zomi Innkuan (Singapore) kumkhat sung nasepnate
kihial bawl in, 2009 kum ading nasep mabante leh asem khiading makaite
ki-apna zong kinei thei pah ahihman in kum khat tawntung ong kalsuanpih
Topa min ihphat hi.
Kumcin Khawmpi ah 2008 sung nasep sa te etkikna leh 2009 sung nasep ding
maban tampi mah sepkhiat ding khensatna kinei aa, mihing in agel si-in
ataangtung sakding Topa ahihi.
2009 sung sepding athupi zawdeuh pawlkhat kong pulaak nuamhi. ZIS pen
minam leh Topa ading nasepna ah thatawh kituaklo zah in ahuaiham
kipawlna ahihi. Hihtawh kizui-in, Zomi Innkuan (Singapore)te Thungetna
in, "Topa aw na minamte tung aa nalah nop, napulaaknop, nasep nop
thuthuukte Zomi Innkuan (Singapore) onglak in" cih hi aa, Topa' ong lak
takpihi.
Mission - Gammial nasepna
Zanggam Kawlte lak Gammial nasep 2007 in mun nih ah ma kipang aa, 2008
in mun 4 ciang kibehlap to in 2009 ah mun 1 behlap zawh nading khensatna
kinei hi. "Khantawn ihsepna ah, Kha mangthang khat ihmat zawh naakleh
alungdam mahmah ding hihang" cihtawh kihanthawn aa kikalsuan hi aa, khat
bek hilo Topa in tampi ong puak ahihman in, naakpi lungdamna kong
pulaakhi. Eite in atuh ding nasep semding hang aa, apo sak, akhangsak
ding ahihleh Topa ahihi.
Tutak Kawlte lak Gammial nasepna teng in Yangon Khuapi gei ah mun 4,
(Hlaing-thayar ah mun thum leh Pattamya ah mun khat) hi-in Monywa aa
Hallelujah Pawlpite' Sunday School Mission ah munkhat ahihi. Tukum aa
kibehlap thakpen Rev Khoi Lam Thang ong muhkhiat hi-in, Yangon khuakiim
mah hi aa, Siapa mah bulphuhding ong hidinghi.
Huhna leh panpihna
Ong nuntaakpih lai Biakna Sia masate leh Siamasate nusiat Sianute huhna
leh panpihna ahihi. Hih huhna leh panpihna ii tup bulpi in, "Nuntaakna
hamsat mahmah hunsia sung ah ih Sia masate leh a nusiat a innkuanpihte
uhtawh ZIS in zinghuan nitaakhuan umkhawm nuamhang" cih hi aa, hih Zogam
pantah Siamasate agil uh avah masiah, Zomite ih gilvah loding, ih Zogam,
Zomite nosuah ngeiloding cih ahihi. Thungetna in khantawn anuntakna uh
akipia ihSiate leh ah innkuanpihte uh lungleengsak loding, gilkial sak
loding, zinghuan nitaakhuan tawh lung khamsak loding, meikuang
paisuaksak loding, a pasal nasep aneipa in anungta Pasian ahihlam mu
semsem sakding cih ahihi.
Hihnasepna tawh kisai kumkhat khit kumkhat tha kingah semsem in apia
nuam kibehlap semsem hi. Siate khat kha khat S$20 petmah tawh huhna
akipiazo hibek ahihhang, apiasa te lah sumh kisalo, apia nailo te'n lah
lunglut semsem ahihna tawh kizui in tukum Siamasa leh Sianute kigawm 5
behlapding kikhensat na omhi. Khasiangtho in alamdangpi in na ongsem aa,
"Mimal 5 khanto ni" akicih phetin abuplaak aa pianuam ompah mawk ahihman
in adangte kihel nading mun angah zolo zah ong suakhi. Tuabek hilo in
mimal 10 ciang abup, alomlom aa lanuam kituhteh ahihman in, makai
vaihawmte kicinlahna ongsuah phial uh aa, tua ahihleh mimal khan nawnlo
in khakhat S$20 tawh ankuang umkhopna pan, ci al meh zo zawdeuhding,
ci-in khakhat S$30 aa khattohding khensatna omhi. Tukum sung aa
piakthakding khensat Siate leh Sianute in
Rev Kam Khua Thang (Ygn)
Rev Lian Khup(Leilum)
Sia Sai Lum (Kawlpi - RC Pawlpipan)
Rev Tun Za Langh' Zi (Mualpi)
Rev Dam Nang' Zi (Mandalay) cihte ahi uhhi.
Rev Kam Khua Thang pen nuntaakna hamsa lualo ahihna tawh tuni ciang
akipialo hizaw aa, bangbang ahizongin ih minambup leh ih Zogam ading
ihneih Pa khat bekmah ong nuntaakpihlai ahihman in, anuntaaksung
zinghuan nitaakhuan a umkhawm ihihding lunggulh huai cihna tawh akipia
ahihi.
Tuni tuhun ciangdong Zogam Siamasate leh Siate nusiat Sianute kigawm 33
tawh ZIS in zinghuan nitaakhuan ankuang ki umkhawm ahihi.
Kawlgam Laisiangtho Kipawlna ah
Abeisa 2007 kum in Kawlgam Bible Society ah huhna tulza 6 (sang 6) ciang
kipuak zo aa, 2008 ciang in Topa in alamdangin Thupha ong pia ahihman in
Tulza 21(sang 21) ciang, azah li dektak huhna kipuakzo hi. ZIS ah
makaite in mipi tung pulaakna khat kinei ngei aa, tua in, "ZIS ihcihpen
Pawlpi hilo ihihman in na sehsuah sumpi peuhmah uh ong khia kei un" cih
ahihi. "Azenzen in ong kikhiat teitei leh Laisiangtho Kipawlna ah
paisakni" cih khensatna zong kinei veve hi. Ong khia kei un kicih
kawmkal ah ong kikhia veve in khasim phial in lai-ip aa kiguang sum
alomlom in ong kikhia, ong kipuak ahihman in Laisiangtho Kipawlna
puakding sum ong khang hathat in tuni tuhun in sumpi kigawm 2008 bup aa
puakzah kingahta hi. August 2009 cianghileh 2008 zah 3 peuhmah kingah
zoding aa awn 6 peuhmah puakzawh nading lunggulhna kineihi. Topa
Khasiangtho mahmah in ongpuak hiphialding ka ummawhhi. Thungetna in,
"Kawlgam Lst Kipawlna sum bei khempeuh ZIS in huhzawh nading" cih ahihi.
Kalsuanna thak-1
Apualam leitung tawh akizom ngeilo Zomite ong kizomsak, mitkeuh nailo
Zomite mit ongkeuhsak, khuamulo Zomite khua ong musak, khuazalo Zomite
khua ong zasak, tu-gaa, hei-gaa atawi Zomite khut laikung ong tawisak,
mailam kumtampi leitung khantohna sung aa atualtangding, amaingal ding
aa ong siam, Zomite ading anuntakna ongpia, alutang ong phum Cope Topa
in, Zeisu khekhap zui-in Tedim Khuapi ong siik, 2010 ciangin kum 100
acingding hita hi.
Hih kum 100 cinna Lungdam Pawipi Tedim khuapi ah 2010 ciangin kibawlding
aa, tuasung mah in,
Cope Topa tangthu,
Kum 100 Pawipi phawkna Magazine leh
Cope Topa ongtunma deuh aa kipan tuni ciang Zogam Christian tangthu( in
2 Volumes) ci-in laibu namthum bawlding Cope Centenial Jubilee Committee
(CCJC) in khensatna nei uhhi. Hih akibawlding laibu khempeuh Zomi
Innkuan (Singapore) in sumbei paaibei teng sik zawh nading (CCJC in
phalna ong piak naak uhleh) cih nasepding athak khensatna kineihi. Sum
leh paai tampi beiding ahihman in, ZIS member khempeuh in tukum aa kipan
2010 kum-lai dong khasim aa tawmta hanciamding gelna kineihi. Ngimna,
deihsakna, lunggulhna bang ataangtun zawh nading leitungbup Zomi
khempeuh in Thungetna tawh ong panpih ciat un.
Kalsuanna Thak-2
Singapore aa om Zomi khempeuh kikaikhawm in Cope Topa Zogam ongsiikzawh
kum 99 cinna phawkna, lungdamkohna bawlding kisawm aa, tua mun ah ZIS in
orginiser sepding leh, hih tawh kizui in ZIS pan aa kumsim kihawmkhia
"Zo Huiva" magazine zong Cope Topa Phawkna atuam vilvel in, leh
Singapore gimnam tak in bawl zawhding khensatna kineihi.
Kalsuanna Thak-3
ZCLS in ahanciam uh, Zomite tangthu kep cing nading Innpi lam na ah tha
leh ngal sitlo aa kihel zawh nading zong kihanciam nuam hi.
Kalsuanna Thak-4
Zogam pan apualam ihpial ciang apualam leitung tawh kigamla hetlo aa ih
om theih nading IT siamkul ahihna tawh kizui in Zogam Khuapite ah IT,
computer tawh kisai mipi sawk theihding phualpi phuh kawikawi ding
deihsakna omhi. Hihtawh kizui in ZIS in athak phuangding hilo in a omsa
kipawlna khatpeuh tawh nasep khopding zong hoih kisa in khensatna
kineihi.
ZIS sung buaina
ZIS in huhna kinaak piaklua ahihman in buaina om zelzel hi. Adiakdiak in
innlam hamsatna tamtuah khalo khangno te'n, "Midangte huhna ih piakpiak
natawh ei sung aa ihzatding sum omlo, van neng kisam lei nading nangawn
sum kisit nawnlo" ci-in phun thei uh aa, papii tetung heh ahihloh uhhang
lungkimlo uhhi. Alungdam huai mahmah ahihi. Papiite dawn kik na in,
"Tulaitak ei sangin ihgam, ihlei ihminam hamsa zaw, kial zaw, kisam zaw
uhhi. Ei pen migam milei ah nuam sakhin lel hilo ihihiam?" cih ahihi.
Hihbang buaina pen anuam mahmah buaina ahihi.
2009 kum Nipi masani in Sia Thangno (Mandalay aa Trinity AG Church,
Youth Pastor) in hanthotna ong pia aa, "Zomi Kipawlna Pawlkhatte in
akipawlna buaipih uh aa, ZIS in kipawlna ii nasepding tawh buai mahmah
nahihman un, etteh huai, pahtawihuai na hi uhhi" ong ci-in ong pahtawi
aa, ahikei phial zongin kinuam mahmahhi.
2008 Kumpha
2008 kumbei kuan, Lungdambawl hun aa kipan, ZIS Kumcin Khawmpi sung,
Kumthak sungteng Hongkong pan aa ong zin Sia Pau Lian Mang (TCC) hitaleh
Singapore TTC aa Th.D sinlaitak aa om Sia Nang Sawm Piang hitaleh in ong
makaih, ong lamlah ahihman in lungdamna kiciamtehhi.
Tuabek thamloh in Zomite Singapore tuncil phial aa kipan ong makaih ahi,
Sia Fung Dun, Sia Ngul Cin Thang, Sia Do Sian Thang, Sia Khai Za Dal,
Sia Khoi Lam Thang, Sia Go Khan Suan, Sia Tuan Khan Mung, Sia Vial Za
Thawng, Sia Nang Sawm Piang teleh ong zinsuk zinto Siate khempeuh tung
ah lungdamna kimangngilhlo ahihlam, amaute makaihna, Thupha piakna,
deihsakna omkei leh ZIS in na lianpi hizah kisemkha hetlo ding ahihlam
ka pulaak phapha nuamhi.
Thupuak,
Hang Khan Lian
Zomi Innkuan (Singapore)
No comments:
Post a Comment