Pasian mizat Benny Hinn Thugenna leh cidamsakna, (Singapore Indoor Stadium) ah Nipini nitaak nai 4 hun kava kihel kha leuleu hi.Khatvei paitawh zong phazo, dam khinzo, Zomi Innkuan kikhop ding zong nitak nai 4 mah ahih sam hang, Kawlgam pan leh gamdang muntuamtuam pan zong ong kipaibuang aa, ei aphual aa om lawmlawm kacihteh paiding lam in ong zozawhi. (Muan zawhlohna hang hilohi). Kikhop kapaima in Zomi Innkuanpih teng hopih kawikawi in, "Kuateng Benny Hinn kiang paiding/" kacih leh kua mah paituak lua khollo ahihman in, "Tuni Zomi Innkuan ka gel hang kitheitham ke'n ciai" kei leh kei ka kici hi.Kawlgam, Mone-ywa pek pan aa hih kikhopna ong zuan kazinte (ka ute nupa) pen lawp mahmah, tha ngah mahmah uh ahihman in nitak nai li hun dingpen zingsang nai 10 in innpan pai khiata uhhi. Tua nangawn amasa lam bek ngahzo in amasa pen ngahlo lai uhhi.Ko innteek pawlpite bel sun 12 teh ka paizo pan uhhi.Kikhop sung mah in, Singapore khuami ahilo gam tuamtuam pan aa paiteng kimel theihna in ong dingsak aa ko zong kading uhhi. Malaysia leh Indonesia pan tampen uh aa, muslim gam ahihsi tawh Benny Hinn mahmah in tha ngah mahmah hi. Abeisa asawtnailo lai in, Indonesia pai khin ahihman in Malaysia ah zong ong pai ding hi'ng ci-in kamciam pia aa, mipi-in khutbeng ziahziah in kinuam mahmahhi.Malaysia leh Indonesia khit a atam Sen gam pan hi-in Sen gam pan aa paiteng amuh ciang nuamlua in ki-ip zolo in kap kha ta hi. "Communist gam pan hizah nong pai uh na upna uh, na kipiakkhiatna uh thupi lua hi, tuni Thu kahilh nawn kei zongin kei Thuhilh sa'ng no onglahkhiatna in thupi zaw khin ahihman in ih Pasian lungdam hi" ci-in tha kingah mahmah in Thupha kipia ziahziahhi.Tua khit Saudi Arabia pan, Newzealand pan, Sweden pan, Sri Lanka pan, India pan cihbangin abanban aa akigen khit ko ong donghak ahihman in ka dingding lai uhhi. Kawlgam pan zong kitam sam napi'n munkhat ah tukhawmlo kahihman un kitheitham zolo hi. Thutampi, gam tampi in ong kalhelh khit ciang, "No ee leh koi pan? ci-in kagal lam vua pawl khat dong aa, "Myanmar pan" acihleh theipaklo in agei aa omte'n, "Burma pan" acih teh, "Aw! Burma pan maw" ongcih san ziau hi. Mipi in muakna khut abet khitteh ong tukik sak ziau in ong veivetlo hi.Tuakhit Sen gam pan ateng Pulpit tung sam in kimel theihna, Thunget khopna, Thupha kipiakna, holimna phial neihpihhi. Tua aman teh,Malaysia aa teng kamai ah ong pai un ci-in kaikhawm aa, "Nagam vuah kongpai ding nong deih uhhiam" acihteh, mipi ki-awng zuah in, "Ong deih mah ung" cihi. Na gam kumpi tetawh sem khawm ding hihang acih khitteh, Malaysia pan aa paiteng, khut kilensak in Thupha pia in puksak ziahziahhi. Tua khit ciang Topa tung lungdamna ko aa, Asia aa om gamteng aban aban aa alawh khit teh, "Asia gam ah Kha khanlawhna ong tungsak nahihman in" ci-in Topa tung lungdamna kohi.Tua agam agam aa alawhna ciang, India, Sen, Indonesia, Malaysia, Japan, Korea, Vietnam, Laos ci-in abanban in lo toto napi'n, Thai leh Kawlgam ong lo khanawnlo in Asia gamteng cisuk ziau aa, den mahmah aa "Burma pan"kici khin hang aa tu'n ong mangngilh hita, Kawlgam peuhmah alungsim vuah/uh-ah om zo nai hetlo, ong kivei nai hetlo hitah ci-in ka khasiat ong suak phial mawk aa, "Topa aw mite'n ong mangngilh hang Nang ong mangngilh tuan keiteh" ci-in kei leh kei tha kala kik hi.Hih Singapore ongpaina ah, Singapore aa om City Harvest Church te innteek sepna hi-in Singapore aa Pawlpi lian pen hipahhi. Pawlpimi 22,000 pha ung cihi.
Hangkhanlian
No comments:
Post a Comment