Zomi Pastor te Mimal Pawlpi phuan masa hih tuak kei

Posted by: "Hau Za Cin" suante2002@yahoo.com suante2002
Sun May 27, 2007 10:28 pm (PST)
Zomi Pastor te Mimal Pawlpi phuan masa hih tuak kei: Pastor khat in ama aipeng tawh pawlpi khat phuan in, amah sia sempah, makaipi hi pah, ukpi hi pah, ama sep ding zong amah mah in la, cial cihte ka theih tung in lamdang kasa a, tua bang pawlpi om ngei hiam ka ci hi. Pawlpi mi ding zong koisung pawlpi mi hi khinsa te zol khia, samkhia, la khia in ama pawlpi ah a senglut khin hi. Buhlaak, annlaak hun hita cih i Topa Jesu in a gen pen pawlpi dang pan pawlpi thak khat adingin pawlmi lak khiat hun hita acih pen a hi tam maw, thei kei ing. Ka um ngam kei hi. Bangci pawltuamtuam hong piang hiam?Pawlkhatte pen kum tampi hun paisa pan a Gospel hong puakte pawlpi a zui hi a, tua pawlpi mah zuun toto uh hi. Pawlkhat leuleu pen ka zak a dik leh Pastor pawl khat in gamdang pan huhna sum ngah ahih manin pawlpi thak phuan in amah Driver in pang pah, a pawlpi lui, a omna sa pawlpi ah tua huhna pen pia leh amah Driver hi theilo ding (aman zeek kha lo ding) hi maithei, tua mana pawlpi thak kisam.......Pawlkhat leuleu pen a omna pawlpi ah ta nawnlo, kideih nawnlo ahih manin kihawlkhia a, a taikhiat ciangin pawlpi thak a phuan hi kici hi. Tuate pawlpi thak, mimal pawlpi kipat dan hih tuak hi. India gam a Zomi te lakah a kitam zak lo, ahi zongin a om veve hih tuak. Vaigam ah bel mimal pawlpi tamlua mahmah dan hi. Bangalore ah Zomi LS sangkah te in thei mahmah in ka um hi. Mikhat in a phuat tawm pawlpi pen tam hi.Zomi te a pan masa i hi hiam? Ka um kei hi. Hilo hi. Zomi te pat masak hilo ding hi. Koi sung pan hiam a kithei, a kila, a ki copy, a kizui hi kha ding hi. India ah sangkah tampi a ciah ciang a theih uh ahi tam? Ahih kei leh USA pan sangkah te a ciah ciang a theih uh ahi tam? Ahih kei leh mundangah zong ee?India te in a pat uh ahi diam? Mimal leh innkuan nekzonna khat hi thei hi. Dollar tampi tawh huhna ngah leh pawlpi phuan in hi leh nopsak pih thei uh hi. Tua pen mi tampi in ut mawk ding hi. A diak in India bangah vaite bangin phamawh a salo ding tam hi. Tua leh India vaite in mimal pawlpi a pat uh ahi tam? Um kei lai ing. Amau zong kua cih dan hiam khat a zuih uh hi inteh. Gamkhangto masa leh mipil masa gam te (mipil gam hilo in, mipil masa gam) ah tua bang na om hi kha ding hi. Ahang pen tuapa in tua pawlpi na phuan hi. Tua in tua bang na sem hi cih kiza zeuhzeuh hi. Ka gennop takpen, Zomi te in pawlpi tuamtuam i neih pen... ei pat hi kenteh, I theihsa na khat om a, tua te cih dan a la, a zui, a copy hi ni. Zomi te bek khialhna hi tuan kei, Zomi bek a tuabang gamta hi kei, Zomi te bek a sem, a zang hi kei. Kikhenna a om hang kigawmkik hun om ding hi. Hau Za CinPhuitong Liim