Nang leh nang thupha kipia in:

Mi khat in mi khat pen ka kyizusian hi a cih ciangin bang cihna hiam cih theilo ka hih man in a thei dingte ka dot leh 'nang tunga thupha ong bawlpa/nu' hi ciin hong gen hi [Kyizusian (kawlpau) = Nang tung athupha ong bawlpa/nu (Zopau)]. Mi tungah thupha bawl cih pen a om mah hi. Pasian in Abraham kiangah, "nang thupha na piakte thupha ngah hi dinga, na piakloh te thupha ngahlo hi ding hi" a cih ciangin Abraham khutsungah thupha piak theihna om hi. Ka gen nop pen mi tungah thupha lamen kei ni. Ei leh ei thupha hih sawm ni cih ahi. Ahi thei tam, ka ngaihsut pak leh hi thei dingin ka um hi. Mikhat kiang pan hamphatna ngah sawm in tua mipa maiet den sangin eimah in hanciam in sem leng kuamah mai ah kunkun se lo in thupha ei nek khawm ding kingah thei ding cih ka um hi. A diak in India gam bangah kumpi tung pan sum leh pai leh nasep ding lamen in milian teng i mai et kawikawi sangin eima nuntakna ding thu khat ngaihsun khia in, nek zonna ding nasep khat peuh ngaihsun khia leng tua pen 'Nang leh nang, ei leh ei thupha kipia' cih dan in ka ngaihsun hi. Tua manin mi teng maiet a mi in hong neu muh sese sangin nangma nuntakna ding ngaihsun tawm in thanuam takin sem lecin, tua pen zahtak huai zaw, a tam a tawm thupi kei, nek ding a kicin nak leh thupi hi ka ci hi. Tua pen ei leh ei a kipia thupha hilo hiam ka ci hi. NANG cih ciang kei zong, nang zong, i vek in ka cihnopna hi. Nang leh nang thupha kipia cih ahi thei diam? Gentehna in - Lai Siangtho sangkah a man lian ciangin Pastor sem in ama pawlpi phuan pah in, pawl thak, pawlpi thak khat kipan in, ama nek tawm ding, a inkuan vakna ding kicing in thugen a siam a, meltheih a hauh leh lawhcing in pawllian suak in, pawl thak a pialkhiat kik mateng pawl tam deuhdeuh hi. Tua pen "Nang leh nang thupha kipia in" cih ah a kihel diam. Hi veve lo hia mate? Hau Za Cin