"I belong to Jesus"

Posted by: "Hau Za Cin" suante2002@yahoo.com suante2002
Sat May 26, 2007 2:42 pm (PST)
"I belong to Jesus" by Kaka, AC Milan:Europe gam a tukpeng kimawlte kipawlna UEFA te saina tawh kumsimin Champions League Football Championship kimawlna om den hi. Tukum Final pen May 23 niin AC Milan (Italy) leh Liverpool (England) te in Greece khuapi Athens Olympic Stadium ah kimawl uh hi. I theihciatsa mah bangin AC Milan in goal 2-1 in zo in Champion uh hi. "I belong to Jesus" - ciin Kaka in a puan sungsilh ah gelh in a championship uh lungdampih hi. Kaka kua hiam cih i theihsa hi a, a theilo a om khak zenzen leh Brazil te hi a, tu laitak footballer minthang mahmah khat hi. Tuma in nungak khat in, "Pasian in ka thungetna pan nang pen ka pasal dingin hong hilh hi" ciin va beel a, ahi zongin aman "Kei lam pan tua bang hong kitheisak kei, na ciah kik phot in" ciin nolh hi. Theihsa vive ahih hang Zolai in kigelh nailo ahih ciangin gelh zom vet ni. 1994 kum a FIFA world Cup USA ah a om lai in Brazil leh Intaly Final kimawl a, kisikim ahih manin Penalty (sudden death) mi 5 tuak in sui hi. Tua kum pen Italy te Roberto Baggio kicipa minthan laitak hi a, leitungah a siampen ahih laitak hi. A sam sakol mei banga a hawi hang hi tuan ken teh. Mi 5 tuak in penalty a suihna vuah amah a sui nunung hi a, aman a khum leh a zo ding, a khum kei leh a lel ding hita hi. A suih leh kungtungah lengto in vantungah kikhawh to a, khumlo hi. Italy in guallel a, Brazil Champion hi. Tamp in vantung lam enin Pasian tungah lungdam ko uh a, a puan uh suah in a puansungsilh uh a, I love Jesus, I belong to Jesus, Thank you Jesus....... cihte kigelh hi. [Tua ni a leitung Football siampen pa Hero to Zero a suakna hang pen a lamdang hi. A penalty pen u Johny ka cih uh Shillong a ko NEHU ah self style TV Commentator in a genna ah, "Saikot style" ci hi. Tua pen bangcihna hiam cih Lamka khua khanglam a khua khat Tuining kici te in Saikot ah a kimawl uh cianga theih uh hih tuak hi. A genna vuah Saikot te tawh i kimawl leh goal a khum masak ngeingei uh leh Ball pen ut na lamlam ah sui, vantung lamah sangpipi in sui in, kimawl theih nawnloh, hun beisak na ding ci hi........ tua pen thutuam hi....]Brazil te kungpang pa (Goalkeeper or goal stopper) pen Tauffarel hi a, aman inn a tun ciang a biakinn vuah Testimony gen a, "Baggio in penalty a suih ding tak ciangin thu ka ngen hi. Topa aw tu in Jesu leh Buddha kimaingat hi. Nang Pasian hing taktak na hih leh tu in na Pasian hihna leitung muhah hong lak in" ka ci hi ci hi. Baggio pen tuma in RC pawlpi hi ngei hiam khat hi a, ahi zongin RC nusia in Buddhism ah kipia hih tuak hi. Tua ni in Baggio in goal khumlo hi. Khumlo bek hilo in, khial hi. Leitungah bawlung siam penpen in tua ni in amai kal 12 a gamla goal vang lianpi khial mawk hi. Goal khum siam penpen, a gamla pipi, a kiu pekpek pan zong a khum ziauziau pa in tuani in a kihongsa goal mai lianpi khial demdam hi. Brazil kungpang pa Taufferel in a genna ah - "Jesus beat Buddha" ci hi. "Jesu in Buddha zo hi. Pasian nih kimaingat ciang a nungta Pasian gualzo zaw hi" ci hi. Hih mipa testimony gen pen amau pawlpi mah ahi tualaitak a leitungbup Tuiphum Pawlpi kipawlna Baptist World Alliance ah President asem Rev. Dr. Fenani in tua kum World Cup zawh ciang Shillong hong zinin English Presbyterian Church, Police Bazar ah a thugenna ah a gen ahi hi. Tua zawh ciang Champions Leaugue Final 2000 kum hi in thei ing, Brazil te Defender khat Lucio in zong goal a khum ciangin a puan sungsilh hong lemto a, "I love Jesus" cih kigelh hi. Tua pen TV Camera te in limtak na la den ahih manin leitungin JESUS pen thei mahmah ta hi. Kua hiam cih a thei nuam tam semsem hi. Tua dan om toto ci ni, gen khin zo kei ni.... Cameroon te hihte, Brazil te hih te.......... ...FIFA in puan sungsilh ah lai at khaam: Tua banga mi tuamtuam in a biakna, a upna te uh kimawlna ah a zawh uh ciang alah zel uh pen hoih a salo pawl a om ciangin leitung Football kipawlna FIFA ah gen uh a, tua zawh a kum 2na ciang FIFA in tua banga laigelh ding phal nawnlo uh hi. Ahi zongin tu Nilaini zana Kaka in a kimawl khit cianga a puan sungsilh sunga "I belong to Jesus" cih gelh a, a lawmte lungdama a lam ziahziah kikal a amah khuk dina a khutte lamto a Pasian kiangah lungdam a koh pen FIFA lam pan bangmah genna om lo hi. A lungdamkoh khit ciang a puan silh kik in, amah zong a lawmte tawh a lam khawm kik hi. Mi'n Pasian pen gualzawhna in na zang uh a, a gualzawh hun in zong mangngilh loin lungdam na ko uh hi. Leitung mipi tul tampi maiah zong a Pasian zumpih loin na pahtawi uh hi. La phuakpa khat in - "Leitung khempeuh pia thei hi lengTamlua ka ci ngei kei ding hiA hong itna ken ngaihsun lengKa pum ka tak ka pia num hi."[Were the whole realm of nature mine, That were an offering far too small; Love so amazing, so divine, Demands my soul, my life, my all.]Hau Za CinPhuitong Liim