Lia le tang ten numbat nei leng

Tu kum a zolia khat a ciah pen bel zuthawl kipia sa a ciah cihna hivem maw. He he.... "Sum zong hauthei mahmah...." ahih leh nungak vaikhak theih lel lo ding hiam ci ing..... Yangon ah, Kawlpi ah, Tedim ah, etc... ah Lia le Taang Kipawlna cih khat om henla, Office kician khat om henla, Officer kician khat nei henla, tangval leh nungak ten amau tangthu tomkim (bio-data) lai tawh pia henla, gam dang pan a hopih nuam te adingin telephone zong khat om henla, a kivaikhak nuam, siang gen leng - a kiteeng nuam a om leh kivaikhak uh henla, gamdangah a ut leh kitenna bawl lel leh bang aci tam. Min pen, officer in code hiam, nambat hiam khat neisak henla, a nungak tangval te min taktak genlo in, code maw, nambat tawh hiam in a thei nuamte kihopih masa in a senpi (ka kawlpau theih thak penpen hi) leh a kingaih, a kivaikhak ding ciang a min taktak kihilh pan le uh. Tua lo a laisim, a mah mizia, a siamna cihte pen a taktak vive mah bio-data ah gelh leh. Top secret in koihsak henla, a kisam bangin min piak man sum zong kila mai leh. Match making dan hi lel lo diam, ahih kei leh matrimonial kici hiam, tua dan ee. A sem siam, a gina, a hoih khat in sem leh Korea lama te, Taiwan lama te, Malaysia lama te, US lama te, ........ a lungleng mahmah Zogam Vontawi Taangpaal te damdam in hong kopcing toto sam lo dia. Zum huai dan in a ngaihsun a om laitak in kisam asa zong om ding a, a masa ding a ut a om pah loh hangin zum huai hilo cih a thei om dinga, a sia ahih lohna leh minam leh mimal hamphatna ding ahih dan a theisiam te in Zolia hoih pipi vaikhak liahliah lel ding hi. Tua hi leh Zogam ah Zolia te keu liangin lungleng lo dinga, gamdang ah sidek lianga innlam ngai a lungleeng Zotaang te zong a tawl uh dam tuam in, a nasep ah thalawp tuam ding hi. Tu laitak a nungak tangval te zong Nu leh Pa gawm a kiteeng Pi leh Pu te suan leh khak te vive hi hanga, amau zong Nu leh Pa deihsaka kiteeng te mah na hi lel uh hi. Tuate suan leh khak te hi lel hanga, en tun Pi leh Pu te ngeina zui kik pak leeng (a kisam leh a kul zong hi ta a) a siatna om tuan ding hiam ci ing. Leitungah Zolia khat bek om hi cih a thei te ading bel "amah" vaikhak lengleng ding hilel a, a tuabang lo te adingin zong a lampi ompah cihna hi. Mimal leh Kipawlna cihbangte in a sai nuam a om leh a hoih hi a, a sai peuhmah in kikhemna leh zuau thu tawh a sep ding hilo hi cih muanhuai tak a sep ding hi. Vai te zong tua bang vive a kiteng hi uh a, India gam bup dima vai kiphu maaimaai te tuabanga kiteeng vive na hi lel uh hi. Pasal kum 25 a cin a, numei kum 20 a cin peuh leh a vanglak a om kei nak leh tua bang Matrimonial ah a min pia pah lel uh a (amau a ut uh leh), tua bangin kiteeng lel uh hi. Zomi te cihdan thei uh a, ana zuisuak uh hi lo dia!... he he...Aki deihlo tuaktuak: Khatveivei nungak leh tangval pen a kitheih cian luat uh leh a kideihlo tuaktuak hi nuam mahmah hi. A mah sanga a hoihzaw khat alungsim ah om den thei mawk hi. Mikangte'n "The grass is always greener on the other side of the fence" ci uh hi. Gan khawi mikangte ngaihsutna ah a innvengte huangsungah kiakte pen ama huangsunga kiak pote sangin limci zaw a, ama gante tatna dingin iplahzaw tawntung uh hi kici hi. Gamdang a tun uh ciang Zolia te khawng khek (neu) sa pian, ngo lah deuh, thazawm deuh dana muh sawm pawl om theih hi. Bangmah a sem thei mello Maipuang banga pum pengpang lel mikang mivom tam mu uh ahih cianga. Tua bang Zotaang pen (a om khak zenzen leh) a kamsia mahmah hi ding hi. Zolia sanga Zotaang khat adinga hoihzaw zi om theilo peuhpeuh hi. Kei cih hi kei, Nu leh Pa, Pi leh Pu leh a tuakkha, a neisa, a mitkeuh masa, a khuamu masa - mipil leh thu thei, thukan leh thusuut mite gen ahi hi. Paunak khat kikhek zolo, suangpi kilumlet zolo kici hi. Tua manin thuhoih khat pen mikhat tha bek (mi khat ngaihsut bek) tawh aki lokzo hilo hi. I muh i theih tan ah a hoih pen i tup ciat ciang akihawmthawh tuah vive mihing kihi lel dan hi. A bukim kuamah omlo: Mihing kuamah a cingzo om lo, hoihna nei, hoih lohna nei ciat kihi hi. I thusim khollo khat i thusim melloh mah khat tawh kiteng uh a, ta nu tapa nei in biakinn lam ah kikhin liailiai uh a, i theih loh kal in a tate uh sangkah in BA, MA, zo in sang pipi tung uh a, a nu leh a pa et in up huai lo hi. Tua banga khangkhia vive ihi hi (a tam zaw, ka upmawhna ah, inkuan thupi tampi om veve inteh tuate gen ngam kei hang). Pawlkhat a pa in laikhak gelh thei, Lai Siangtho sim thei, Labu en thei cih bang hi a, a nu in amin gelh theilo, sim theilo hi. A kiten uh mi nuihsan leh ciamnuihna khawng peuh hi lel a, ahi zongin tua bangin khangto uh a, Pasian in kem peuh leh a tunna ding uh ciangtan om tuan lo hi. Inn kuan hoih pan a gina lo tu leh ta a piang omveve hi. Tua manin kuamah a bukim om kei. A kihawmthawh ding zong om tuan kei leng kilawm. Ngaihsun siam in ki it peuh leng, kitawngtawng pipi in zong khangkhat nuntak a kimualsuah ding hih tuak hi. Tua ahih manin i hauhman hiam, i siam man hiam, a hoih zaw i muh muh man hiam, i ngaihsut leh i theih thu te hangin kuamah i hawmthawh ding, i nolh ding, i niam muh ding hilo ahi tam ci ing. (Mimal ngaihsutna hi sam). Thukhupna:A kiteng te i lungdampih a, a kiteng nailo, ami om loh man bek a zi nei nailo te zong ami a om pah ding i lamen a (kei zong kihel), a mi ding muh batah a om kei leh zong a lampi ding khat ngaihsuta vaihawma lampi sial ding ahi cih Macedonia gam pan sapna aw banga i thupi sim ding hiin ka ngaihsun hi. Hun mualliamsa sul leh lo dinga, paallai hun hoih kikho theilo ding hi. Time spent is time gone ahih manin, "La kik thei leng maw" cih in hong nem zo tuanlo ding hi. A om maimai nawnlo.... (he he..)....Hau Za CinPhuitong Liim