Evergreen Fellowship Spring Retreat 2007

Nungak lah hoih, Sen ann lah lim, giakna Hotel lah 3 star facilities vive, a mun lah siangtho, mual sang in umcih in singkungte nim dildial, guahzu sengseng nuai ah huihdam nung hiauhiau, music van kicing, kikhopna lah Air Conditioned vive ........ khat lah maitai... ni 3 tak hi napi, tom buang ei...Thugenpa lah kilawp thungai te lah a kigen peuhmah lei kiasak manlo tawm ziahziah hi mai. Mite Pasian thu duh dan leh a theihnop dan uh. Pasian thu a thei panpan te, a inkuan pan amah bek Christian a suak pan leh inn pan a kihawl khiate, nung kum maha Jesus cih pen nek theih sa a sumbuk ah a leisawm te, a lawmngaih tawh a kikhen mana lungkham a lungnopna a zonna lam ah biakinn lut kha ah Christian a suak thakte, Motor Bike tuanglai Helmet a khuk loh mana Police ten a delh ciang Biakinn ah tailut a a piangthak te, ....... aw! Sawltak Paul hun lai banga Christian te a ciamnuih, a engbawl, a ko, a bawlsia Pasian thu a kigen a zak ciang hong piangthak a, a mawhna a kithukkik loh mana hih biakna a zuite....... .... Lai Siangtho sunga Christian masate hun lai ah khualzin kik mahmah kibang hi. HG Wells in "Time Machine" cih lai a atna ah - Hun lui ah khual kizin kik a, ka nu leh pa, ka pi leh pu te, hun pai masa mite tawh ka kikhawl thei hi..... cih dan a gelh tawh kibang hi. Christian a suak tung ciauciau, Jerusalem thak cih a khiatna a thei nailo, Second Coming cih a thei nailo, Leithak leh Vanthak cih zong a thei nailo te lak ah kihel pen naupang pau kisin a nu in pau a hilh ngakngak tawh ka teh hi. Hih te tawh teh in Zomi te in mual tampi khumta hi hang, kum 100 val lam na pai khin hi hang. Bang ciin Topa hong sawl kammal - "Leitung khempeuh ah pai kawikawi un la, minam khempeuh kiangah ah lungdamna thu na gen un. Minam khempeuh keima nungzui mi suaksakin, Pa min, Tapa min, leh Kha Siangtho min tawh tui sungah na phum un." (Matt 28:19) cih pen bangci in i ngaihsun hiam? Pasian nasem dinga kipia i om a, Topa hong thu nusiat i sep sawm leh hih kammal zong lei kia lo a i top ding kisam sa ing (kei ngaihsutna hi). Jesu pen Pasian tapa hi cih a thei ciamciam te kiangah pattah kisam mahmah uh hi. A pau uh sinin, amau gam a Pasian nasep theihna ding a vaihawmpawl te tawh kizom in, a mel leh puam a kibatpih mahmah Zomi te in sep ding tampi i nei kha ding hi cih ka ngaihsun kha zel hi. [Zhou Dynasty suan leh khak te ka hi uh a, tua man in Zomi ka kici uh hi ka cih ciangin hong unau sanggam bawl in hong it thei mahmah uh a, innkuan khat bangin kigamtang thei hi. Tua mah i hihna ahih manin Zomi Topa galhangte gamkuan ding i hiam? Topa in lampi hong sialsak leh a kuan ding a om tam? Mun tuamtuam ah mission sending foundation, ministry, chuch om dingin um ing, tua te tung pan lampi a lunglutte in kan theih dingin um ing....] (Hong huaiham kha pak hi ing e).

Round the clock Prayer Chain: Retreat neih hun sung khempeuh, tunkim hun pan ciahkhiat ma nai khat tan pen thungen kilaih ngekngek in mi khat in naikhat ta tawlnga lo in thungen hi. Tua bangin khat hun a bei ciangin a zom a in hong laih in kilaih ngekngek a, ni 3 sung pen hunzatna mun ah thunget kitatsat lo hi. Sowing, Reaping, Keeping: Retreat thulu dingin Tuhin, Atin, Nuntakpihin cih kizang hi. John 4 na sungah Samaria numei leh Jesuh Tuikhuk gei ah a kihona pan in tua numei in suahtakna a ngah bek hi lo in mi kiangah a tangko kawikawi bangin Pasian thu zong i tangko ding hi cih tawh kigen khawm hi. [A lamdang mahmah kasak khat pen Zomi te zatngei banga thugen te in thugen in mipi in ngai cih hiden lo in mipi te mi 8 ta in pawl kikhen in tua thugenpa thugen kikum in, ei tuak thutek gen khawm zel cih bang hi. Eima ngaihsutna zong kizang cihna hi.] Lasakna: La pen kilim sak mahmah hi. Worship time cih pen kilim zata, tulai khanlawhna la vive kisa hi. Worship time beina ding lam, hun kipat ding ciangin biakna la (Hymns) kisa a, tualo teng pen khanlawhna la, leh phatna leh pahtawina la (praise and worship songs) vive kizang hi. Lungdamna thu tangko dan: Gospel i cih lungdamna thu pen mi kiangah mawk gen a mi lungsim bun ding hilo ahih manin Pasian itna thu i gen ding ciangin - a mi, a thu, a gen dan (Masses, Message, Method) - tua teng kisam hi. Bangmi, koi ah teng, bangsem, bang lunglut cih theih kisam a; Nang bangthu gen nuam na hiam, bangthu tawh Gospel gen thei ding na hiam, Jesu thu tawh panpah lecin tello ding uh hi; Bangci gen lecin mite a lunglut in telsiam ding hiam cihte kisam hi kici hi. [Hih te a kigenna pen mihing a tamzaw Pasian thu thei nailo leh za nailo ahih manin Gospel theihsak ding dan tulai khangno te in lim ngaihsut mahmah uh hi.]Tua ahih manin amau ngeina zuiin mite theihsiam dingin Pasian thu genpih siam in, mimal kisap leh panpih ngaih dan en kawmkawm in Pasian hoihna genpih in, na thugenna khat peuh pan mite in Pasian hoihna leh ithuai ahihna a theih takpi nadingin damdam in genpih in cihte kisin hi. Kigen khawm hi. Cockcroach Theology: Hih pen Inlawi lungsim leh nuntakzia tawh kibang thuzuihna hi kici hi. Inlawi pen meivak ah koih leng nuamsalo, om theilo in khuazingna lam zuanin kihemkhia, taimang pah, a mialsung ah lut pah hi kici hi. Tua ahih manin tuabang hilo in khuavak tate bangin i nungta dinga, mite zong tuabanga pholak hilo in kidawmtak, siamtakin Pasian thu i hilh ding hi cih - a kisam mahmah thunih (eima nuntak zia leh mi kiangah gen kik zia) kisin, kigen khawm hi. Mary Jane, Missionary to China, kum 77 phata tangthu tawm: A pian ding lai in Doctor te in mihing ngeina banglo ding hi, a nu gilsung pan suak kei leh amah hampha zaw ding hi kici hi. A nu in phallo a, a hi bangbangin ka kem ding hi ciin susia nuamlo in suaksak hi. Doctor te gen bangin mingeina banglo in, Zomi te in 'mi phalo' ci hiam, mibanglo i cihte hong suak hi. Dingtang theilo, pau awk puatpuat, kawi langlangin om a, pau ding hileh kisat thapai hi kici hi. Nungkal May 2007 kha bulin China pan Taiwan ah ong zin a, amah tu in kum 77 pha ta hi. Retreat thugenpa Tim Gillette in "Amah tawh ankuang khatvei um khawm kha ka hih manin hampha ka kisa hi" a cih zaha thupi hi. Kum 14 a phak in China gamah missionary sem nuam ing ciin kipia a, ahi zongin kum 70 a phak kum in tua a sawmna gam tung pan hi, tun kum 7 semta in amah kum 77 pha hi. Ka sihtan ka sem ding hi ci hi, kici hi. Ken mu kha kei ing. Taiwan ah kal khat a tam zawh ciang a sepna China gamah kik kik ta hi. Moses banga pau awk, pau awk bek hilo, mi ngeina hilo... mihing ngeina banga zi leh pasal nei thei ding zong hih tuak lo hi. Ahi zongin aman a gen bang hiam cih leh, "Na paulap bang hiam?" (What is the excuse?") ci hi ci hi. Pasian thu gen thei kei ing na cih pen, "Na.... nan.. na naa.. pa.... paaa.. pauu.... lap ba... ba... ba... bang hiii... hi.. iii.... hiam?" ciin nai khat sunga kammal kician tak 30 zong a gen theilo piteek in nang hong hopih siousiou hi, "Na paulap bang hiam?" ..... bangci'n na dawng dinga?"What is the excuse?"Lawptaka kuan, lungdam tak nuamtak in hun kizanga, ngaihsut kikkik ding thu lian pipi tawh innlam kiciah kik hi. Hih, Nazareth mi kici pa, hizaha leitungin a buaipih banghang hipeuhmah ding hiam cih na ngaihsun ngei na? Topa in thupha hong pia ciat ta hen. Hau Za CinPhuitong Liim

PS: "Interactive workshop" class hun a group photo khat a en nuamte adingin kong tuangsak hi.