ZNC phuankhia pawl

To: Zomi Laisim Uu leh Nau Khempeuh:Sia Khen in ZNC phuan khia masa pawl leh a man te bang hong suah sak ciangin, kum 20 dektak bang ana pai khin man hi-a, tua hun-a, ih lawm te pawl khat bang in zong hong nusia khin uh ahih ciang: hih pen ih tang thu hi khin-a, tua ih sep pih ih lawm te ih phawk na in, tua makai masa pawl te na sep na pawl khat kong gelh nuam hi:Lawm Thang Lian Pau in, "Tuni in party khat na phuan ung ei" ci-a, hong gen ni a zing ciangin, Kawlgam Radio leh News paper te-in, ZNC thu cian tak in, hong gen pah uh hi.A sawtlo-in, Pa Pum Za Kap te' inn ah party sign board suan na pawi ki bawl-a, tua lai ah pa Kap in, hih party pen a ut khempeuh kipawl theih na ding hi-a, beh leh phung, minam kam pau kua mah ki dei-dan na omlo ding hi ci-in, gen hi.Pa Pum Kap te' inn pen ahsaap uh ahih man-in, party sign board suan ding pen inn nei te in hong kan-kuat uh ahih man-in, ih party sign board khiat kik hong kul hi.Kham tung gam Zomi namdang party te tawh ki gawm theih na dingin, nakpi in ki hanciam-a, pa Kap te inn mah ah meeting tam veipi ki tu hi. Tua meeting te ah hong pai mi pawl khat te: Lian Hmung Sakhong, Ram Ling Hmung(si khin?), Dr. Za Hlei Thang, U Lal Bik cih te pawl Asho te' lak pan sia pi U Ba thawng Tin cih bang teng leh ZNC pan makai te a om thei teng; pa Pum Kap, Pu Thang Lian Pau, Bo Sing Khaw Khai, Pa Hau Kim, Pa Gin Kam Lian, Sia Pau Cin Thang, Sia Vung En Thang cih teng bang ki hel hamtang thei hi.Tua hun sung teng mah in ZNC makai te pawl khat Yagon khua sung eimi u lian pawl khat te' kiangah va hawh kawi kawi uh-a, hih ih Zomi party thak ah pan mun hong la un ci-in, va cial kawi kawi uh hi. Tua te' lak ah Col Khen Za Mung in, "Kei pen naing-ngan-gyi agah apaak a ne khin ka hih man-in, na khawl phot ning" ci hi. Dr. Vum Khaw Hau in,"Mai lam ah thu na gen uh ciangin, Dr. Vum Khua Hau in hih bangin, gen hi ci-in, nagen ta un" ci-in, na vaikhak hi. U Lun Pum in, "Taw-lauh-ba- bi; taw-lauh-ba- bi" (enough is enough) ci-in na dawng hi.Tua hun sung teng mah-in, makai te pawl khat khamtung ciah to-in, Kawlpi leh Tedim ah party phut ding ci-in, ki vai hawm hi. A ciah ding te-in, kua peuh mah tavuan na pia ding kahi uh hiam ci-in, hong dot uh ciangin, ngaihsut pak ding mel ki theilo ahih man-in, pa Suan Thang in, ka behpa Pau Kuak bang a ut leh na pia gawp ding ka hi maw ci tantan hi.Kawlpi ah pa Suan Thang te' inn mah ah kiphut in, Tg. Vungh Za Pau in nakpi in sem hi. Tedim ah Zum pi (HR) kiphut-a, Pu Cin Sian Thang, Pa Suan No (Zam Khan Suan) leh Pu Thang Lian Pau te in nakpi in sem uh hi. Tedim ah vaidawn na leh phualpi hon na pawi nasia tak in ki bawl a, Htan-Tlang khua pan in zong mikhat in, thu gen na hong nei hi.Tua bang hun sung tengin, Yangon ah a omlai makai te-in, ZNC thukhun khat bawl ni ci-in, mi ki seh-a, Pu Thang Lian Pau, Bo Sing Khaw Khai, Dr. Zam Khen Thang, Sia Pau Cin Thang leh Sia Vung En Thang te kiseh hi. Thukhun in 'Chin' lakhia-a, Zomi tawh laih ding cih ahih man-in, Bo Sing Khaw Khai in "Delaration Of Zomi and the Hornbill Emblem" akici laibu khat hong bawl pah hi. Tua laibu sung-a, a kigelh ding article hoih mahmah khat Bo Sing Khai mah in Sia Hau Go kiang pan hong ngah khia hi. Tua Sia Hau Go' gelh article in, Zomi ih hih na kipsak a, tua Zomi min-tam "ZBC" aki phuah ciil lai-in, Sia Hau Go mahmah in Zomi namdang makai te tawh bang ci phuahkhawm uh hiam cih thu cing tak in hong gelh hi."Declaration of Zomi and the Hornbill Emblem" laibu pen Yangon khuapi sung-a, Embassy tuam tuam ah copy ka hawm kawi kawi uh hi. India Embassy ka tun uh ciangin, Pu Kei Vom in hong dawn tuah pah hi. Ka laibu piak uh tawm vei sung a haampi in, a etkhit ciangin, "Vung aw, Kawl te-in, 'Chin' ci-in, hong sap leh hong ngiam-et suk na uh hi-a, 'Zomi' ci-a, hong sap leh hong sang-et toh na uh hi ci-in, na ciam teh un" hong ci ngeu-ngeu hi.1990 kum Martyrs' Day ah zah tak piak na pen, tua hun aading in, political activity thupi mah mah khat-a, aki seh ahi hi. ZNC makai masa te' nasep tuam tuam lak ah athupi mah mah khat-a, aki ciamteh ahi hi. Tua bek hilo in, hih mun ah ZNC in ih Zomi, ih Zogam na represent uh ahih man-in, tua mahmah zong lungdam huai phadiak hi. Tua zahtak piak na ka mankhit uh ciangin, khuasung Sen an-sai khat ah ka vek un an ka nekhawm uh-a, nuam ka sa mah mah uh hi. Tua hun lai tak-a, ka theih loh uh khat in, pawlkhat te' aa dingin, tua an neek khawm na pen ih lawm te pawl khat tawh a nunung pen an neek khawm na ahih lam ka thei kei uh hi. A sawt lo-in, Bo Sing Khai in, hong nusia hi. Dr. Zam, Sian Suut leh Uu Gin Thang te in zong hong nusia khin uh hi. Lawm Thang Lian Pau tawh ki muh kik ding pen a ki gen thei hetlo thu khat ahi hi. Sia Thang Bawi leh kei tulai tak in US ah kum 10 val ka om khin uh-a, ka lung leeng mah mah uh hi. Ih gam hong hoih kik peuh mah leh ciahkik pah ni ka ci-ci lel uh hi.Tangthu suak ta ahih man-in, ci-a, ih gelh mawk mawk hi-in, nuam vetlo ana sa pawl khat bang ah omkhak leh ki ngaidam tek ni ci-in, kong thuum hi. Ih biak Pasian in thu pha hong pia tek zeel ta hen!Vung En Thang/Florida.

Sia Khen leh Sia En Thang te'n ZNC tawh kisai thu hong gente uh manpha sa ing. A beisa a thu theih ding a kisam tampi zong hong mu thei sak sa ing. Minam itna hang tawh nasem mite sepna zong kimu khia toto thei a lungdam huai hi.Hih bangin Zomi itna tawh makai masa te'n na sepna te uh na hong gen uh ciangin khangno te a dingin thupi leh manpha mahmah hi. I makai te leh i na sepna te mipi te hong theihpih ding i zumpih loh ding pen nasep na hoih khat hi in mu ing.ZNC thu hong kigen teh kei zong ka lungsim sungah a om khat hong suak kik hi. 1991 kum pawl hi in thei ing. (Tua hun lai in Tonzang ah tan (8) laivuan ding a, Cikha pan a pai ka hihi). Nakzang gunlei ( Tonzang khua nuai a) pang teng a singkung tungte ah, sing hawng teng kimet in, color lai tui tawh a kigelh " ZNC only for Zomi" cih laimal ka muh teh ZNC i nasep taktak leh ZNC in Zomi te a ding a kipawlna thupi khat a hihna mu ing. ZNC pen Zomi te a dingin minam vai a sai ding a madawk dingin a picing pen party khat a hihi.Galkap kumpi in 1993 kum in ZNC pen kawlgam sungah Upadi huang sungah nasep ding a phal nawn loh uh hangin 1990 kum kitelna a kiphiat siang mateng a hing den ding a hihi. Tua a hih manin makai te in zong tu ciang mah ZNC party i policy zui mah in nasem to den lai uh a, leitung bup ah Zomi a kici minam om hi ci'n a tangko zong ZNC mah a makai pen a hihi. ZNC party leh ZNC makai te hangin kawlgam sung leh leitung bup ah Zomi cih minam min tawh leitung makai tuamtuam te'n hong thei zo uh hi. A zenzen in 1990 kum kitelna pen kawlgam ah a kizang suak hi leh ZNC in a mau party policy a hi i minam min ( mi hong theihna a hi Chin) zong Zomi cih tawh hong khek ding uh a, Chin leh Zomi cih tawh kibuai buai nawnlo kha ding hi. I minam min Zomi cih deih te a dingin ZNC tawh mapang khawm leng, lam zang mahmah ding hi.TKS