Paunak zuunna: Kam siam sial lei sang, kam sia sial liau

Posted by: "Tual Khan Suan" zolentang@yahoo.com zolentang
Sat Jun 2, 2007 12:32 pm (PST)
Paunak zuunnaTual Khan Suan (Suanpi)Kam siam sial lei sang, kam sia sial liauA zatna: : Kam hoih kam pha zangin thu gen leng thu sia pen zong thu hoih tawh kikhum zo in i deih kingah a, kam sia zangin thu gen leng i deihna i ngah loh bek hi lo in thu hoih kim lai na ngawn thu sia tawh kikhum thei hi.Mihing te khat leh khat kizopna ah gamtat khohek, kampau mukpau te pen nisim a i zat det thu a hihi. Tua gamtat khohekna, kampau mukpauna te pan in mihing khat i zia leh tong hong lah khiat mah bangin mihing te mailam nuntakna ding lampi zong a sial khia a hihi. Gamtat khohek siam, kampau mukpau siam mite in mi lian mi neu te’ maipha ngah a, mi te’n it a hih man in pawl ding mi a hau hi. Lawm leh gual kikal, veng leh pam te leh khua sung gam sungah ki-itna khang sak a kilemna piang sak hi. Gamtat khohek siamlo, kampau mukpau siamlo mi te pen mite tawh kilemlo bek hilo in mite khat leh khat kikal ah ki muhdahna, ki-elna leh a tawp ah ki thahna ciang dong tun thei hi.Nidang lai a i pu leh pa te pen mikangte bangin midang te vai ah kam kikum khollo uh a, a mau vai bek buai pih masa zaw uh hi. A mau tawh kisai lo thu sia thupha ah cialna omlo pi’n va ki guang lut ut lo uh hi. Kamlpau kidawm uh a, gamtat kidek uh hi. Gentehna in khua sung khat ah zawl gai numei khat om teh a mau tawh kisai lo pi a, a ko mite sialpi khat bang na kigaam uh hi.Hih pen tuhun a i theih ahi mikang te dan “mind your own business” a cih tawh kilam danglo hi.Kam khum tawh thupha gen mite pen khat leh khat mawhna kimai sak uh bangin kam hoihlo tawh a kampau mite pen thu neu no khat bek na ngawn ah liau sum kigaam uh hi. Kampauna in kilemna a piang sak bangin kisiatna zong piang sak hi. Zomi te ngeina sungah lakam tawh tehkakna a kigen teh “Sial” pen a gol pen/ a lian pen genna in ki nei hi. Zomi te gan khawi sungah zong sial in ganhing golpen/ lian pen leh a thupi pen in kinei hi. I pu leh pa te pen nidang lai in dangka/ sum leh pilna tawh na kidem lo uh a, lokhawh singpuak leh huangvulh ganta tawh na kidem uhhi. A mimza a taangza kho ing, huang vulh ganta tua zah nei ing ci’n min na sial uh hi. Tua huangvulh ganta sungah zong sial haute ki thupi sak in kizah tak zaw deuh hi. Ton leh lam a om teh zong sial min na lo uh a, liau sum dingin zong sial mah tawh thu na gen uh hi. A lungdam hun un sial na go uh a, lungdamna sang pen lahna in a neih uh bangin liauna baina ding thu ah zong sial mah na kikalh uh hi.Zomi te ngeina sungah sihna manna leh luang leh ban thu zah a thupi a om ciangin zong sial mah tawh thu kimai zo hi. Mihing khat luang man ding pen sial tawh na gen uh hi. Deih loh pen in khut khial ban khial a om a, mihing sihna ciang dong thu a tun leh zong sial tawh na ki thuum uh a, luangman na kigen uh hi. Kampau mukpau siam a thupha gen mite pen “sial lei” kipia in thupha na kileh uh hi. Mihing luang vai a thu genna a kinei sial ki-it lo in kamkhum, kam hoih a zang mite kipia in thu kimai sak uh hi. Kam hoih pen mi khempeuh in za nuam tek a hih manin kam khum tawh thugen mite thu gen pen kisang thei in kilemna piang hi.Tua ban ah kamkhum tawh thugenna in ngah ding a kilam etloh thupha tampi tak kingah thei leh mawhna maisak hi.”Sial lei” tektek a kipia kei uh zongin thubuai khempeuh bei a, ki-itna omsak a hihi.A hizongin kampau mukpau hoihlo zangin thugen leng Zomi te a ding a a manpha mahmah “Sial” kiliau sak in khat leh khat kigawt uhi. Tua a hih manin kampau mukpau siam a thugen thei mite i pu i pa te’n “ kam siam sial lei sang” na ci uh a, kam hoihlo leh kiphat sakna tawh kampau mite “ kam sia sial liau” ci’n na gen teh uhhi.June 02,2007