Cingno luankhi:

"Kap kei ou" a cih khit ciang galhang numei bangin a namsau kuah kisiang ziahziah liang in a u Thang lam zuan in taiphei a, a kha sai in, a u Thang kawk a, "Ka pa nong thahsak, ken nang hong ngai nawnlo" a cih khit ciang a Namsau dawk in a u Thang ngawngah a namsau nga phei hi. A ut leh a thah dingin a kipia a u Thang a muh ciang lainat lua mahmah ahih manin a khitui kideek zolo in hong luanga.... a sam sang singseng nisuak kilawm takin a sawi kap hiihiai liah ah Cingno luankhi hong luang zangzang tanghial hi. Kua'n tua luankhi a nul thei tam maw? Cingno sam a hoihhoih tawh, bang dinga a khitui luang mawk a hiam? A sam tee deldel mahmah etlawm na pi, a khitui a luan ciang a melsia a, a khasiat ciang a melsia lua hi. A u Thang tawh a om khop ciang Thangmual dawn a Ngeisok pak hoih pen zong a deihtuam om a, a hoih dan kibang mah leh a it diak om hi. "Ei lah kuaman hong eng lo, en lah kuamah englo" ci a lasa khawma Thangmual dung teng ah a kinohnoh hunte uh tawh kilamdang ta si e. Tua laiin a maitai a, nuih mai a, lungdam in a ha paak sisiaiin kidawk den a, etlawm in muhnuam a, singhiang tungah a u Thang in huang deudeu in kuamah ngailo takpi uh hi. Hun khat lai a maitai lungdam a nuiden hun dang khatah a u Thang mahtawh kituah hi si a khitui a luan tak ciang mihing lungsim hong zen lua hi. A u Thang in nuisak a, zong kapsak hi mawk hi. A mit veilam pan hong luang suk Cingno khitui a luangsuak lo a abiangah a khawl tak ciang a nulsak ding omlo ahi tam. A mai ah a tu hithiat a u Thang in banghangin nulsak lo ahia? A u Thang in Cingno bianga dahna khitui luangsuk a muh ciang khasiat lo ahi tam? Nu- ei, a taklam mit pan zong khitui hong buasuk zuazua leuleu...... aw, Cingno in a dahna luankhi nul ding nei kei si e. "Cing no, Cingno aw, koi om na hia? Kei na u Thang hi ing ei. Hong kibuksan kei ve. Nu ei, hehlua veng aw. Kei hiah om ing ei. Nu ei...." ci-a a dahna khitui tawh a zon laiin Cingno koi ah om ahia? Tua laia a dahzia phawklo in a u Thang in Cingno khitui nulsak lo ahi tam. Thangno heh in zong a it mahmah Cingno pak a lawhsakna singkungte zong hehpih zo nawnlo in a Tem tawi tawh singhiang leh singkungte zong satliam giapgiap hi. A dah luat manin hun khat laia Cingno lungdamna a pia Pakkungte zong hehpih zo nawnlo hi. Tua ahih leh Cingno in bang hanga a dahna khitui a mit langnih ah kai zuahzuah, phul zuahzuah lianga apa athahsak a u Thang banghangin maisak ahi tam? A ut leh a thah ding hi a, apa sangin a u Thang itzaw ahi tam? Itna bek in khitui nul zo a, itna bek in huatna maisak hi. Itna bek in maisak zo a, itna bek in gualzo hi. Cingno luankhi a nul thei zong a it mahmah a ngaih mahmah a u Thang hilo a, itna hi zaw hi. (Cingno leh Thangno te pen "Ngaih Anglai" DVD by Khitui Gospel Video Ministry, 2007 pan hi).Lungdam. Hau Za CinPhuitong Liim