Tu laitak leitung ah nungak khat bek om:

"Leitung ah kua hat pen" ciin naupangte dong leng "ka pa" ci lian uh hi. A taktak in bel a hatpen hilo a, tua naupang ngaihsutna ahi hi.

Leitungah nungak melhoih pen Miss Universe hi kici a, a nihna Miss World, a thumna Miss Asia Pacific hi kici hi. A taktak in a melhoih pen hi tuan lo uh a, a kihel teng lak ah a melhoih pen cihna hi bek hi.

Ulian khempeuh a pil hi tuanlo a, a pil khempeuh ulian a suak hituanlo hi. A na om kha cih man bek hi a, ama pilman ulian a suak hi masa tuanlo a, amah sanga pilzaw tampi ulian suaklo om veve hi. Tua mah bangin galkap lut khempeuh galkap bu a suak hi tuanlo a, galkap a lutte lak pan a bu a suak pawl om cihna hi zaw hi. FIFA World Cup ah a siampen a champion hi tuanlo a, amau sanga siamzaw a champion lo zong om veve hi.

Papi khat in ka zi pen ko khua ah a hoih pen hi ci a, a taktak in ama hun laia hoih pen a gen hi lel a, a taktak in tua khua ah a hoih pen hi masa tuanlo hi. A piangsa leh a pianglai dingte hoih dan kigen thei tuanlo hi.

Tua ahih manin leitung pen ei hun ah a mun ah i om khak ding a thupi hi a, i ngaihsutna ah thu hoih a om kha ding a thupi hi. Tua ahih manin 'a "pen" cih om thei lo' a, relative terms, tehpih khat a om hi lel a, a tehpih tawh kisai a, a tehpa tawh zong kisai leuleu hi.

Tua ahih manin, bangbang hi leh ke'n zong, 'tu laitak leitung ah nungak khat bek om hi,' hong ci keihkaih mawk leng thu dik ahi diam? he he...

Hau Za Cin
Phuitong Liim