'Pasian haipih'

Tangval khat in nungak khat hoihsa in sun tawh zan tawh hawhhawh, helhel, zuizui leh tua pen 'nungak haipih' kici hi. A khiatna pen a lungsim khempeuh tawh tuanu delh, ngai, it, kikholhpih cihna hi.

Tua mah bangin Pasian thu bekbek a ci tawntung mihing khat pen 'Pasian haipih' kici thei ding hi.

Zomi te in 'Pasian haipih' hiam? Zomi te in Pasian haipih mah hi. Hoih hi. Thupi hi. Lungdam huai hi. Zahtak huai hi. Thupha ngah huai a, thupha saan huai hi. Hauhna dingin kilawm a, zawngta leng lungnopna hong pia hi. Ne ta leng Pasian min kilo a, ngawl ta leeng Pasian min kilo hi. Silh in teengin kilawm ta leeng Topa kiphat a, silh ding neilo guaktang natawm in i vakphial zongin Topa min kizumpih lo hi. I kampau khat peuh tawh Pasian min kizom a, i kikhenna dingah zong Topa min kilo hi. Cidam a, nahlawhpeek huai hi. Eite hong bawlpa i phawk pen a lungdam huai penpen ahi hi.

Nipini in zingsang tungin tho in zing thungetna eima hih theih dan tek in kinei a, zing annek kuang umna ah Pasian min kipulak kik in, annek kham kikhopna ah Pasian tawh kikhawl in nuamtak hun i zang a, i theihloh kikal in ni in tumlam na heek manin i theihloh kal in Nipini hong bei ziau a, khuazing peuhleh kikhop dak ging kik in, annek sung zong tuciil manlo in kikhangkhan sa in ann kine a, kamgei zong nul siang manlo in biakinn lam i delh hi. I nu te'n a kikhop uh tawh, a thunget uh tawh cik kaal in ann na huan man uh hiam cih ut huai hi.

Kikhop tawp peuh leh lah Khangno fellowship om a, nitak lup hun dawn tan phial mah Pasian min tawh kikholhna hun kizang hi. Nipini hun khempeuh Pasian adingin a zang bei siksek Zomi te i hi hi. Tua manin Zomi te in Pasian haipih hi. Haipih cih ciangin mihai genna hi lo a, a lungsim khempeuh mun khat lam ah pia khin dikdek cihna hi zaw hi.

Nipini bei in Pizingni ciang zong nasep kuan liailiai in nitak ciang Thunget kikhop zan hong tung a, kikhopna ding biakinn dak mah hong ging kik hi. Nilaini hong tunga Numeite kikhopna hi a, biakinn lam mahah Topa tawh hun kizang kik hi. Laizing, Laithaini ciangin mikhual kikhoppih na hun cih bangin hong kizomtoto a, Nino nitak ciangin Khangno kikhop hun hong tung hi. Tua bangin nasep gim in tawlta leh a tun ciang biakinn dak a gin nak leh biakinn delh in kikhawm a, a lupma tan mawk vakthap lo in Pasian tawh hun a zangte ihi hi. Manpha mahmah a, thuhoih, la hoih kisin a, nuntakna ding a manpha tampi kitheih thuah den hi.

Hi zah a Pasian bel, Pasian tawh a kikhawl, Pasian haipih minam leitung ah a tam ding ka um kei hi. Zomite nuntakna a khantoh loh man hi tuanlo a, khangto taleh Pasian kithupi sim veve hi. A hun neih khempeuh uh Pasian adingin zang a, a lungsim vuah biakinn mah lian bel a, a sum neih uh zong a tam zaw Pasian minin zang uh hi. Sum zang uh ka cih ciangin biakinn ah kizang ka cihna hi masa tuan lo a, Pasian phawk kawm in zang uh hi ka cihna hi. Pasian kiangah lungdam ko in, Pasian phawk masa in zangkhia uh hi.

Tua manin Zomi te pen Pasian namteel ahih loh hangin Pasian a teel minamte ihi hi. Pasian i teel manin Pasian in Ama teel minamte mah bangin hong lamsang to a, hong domsang zel lai ding hi. Haksatna i tuahte pen - leitungah haksatna a tuak lo minam omlo a, a tuak deuh zong om tuanlo hi. A tuakte ngaihsut bangbang hi a, amau a tawldam ngaihsut leh tawldam a, a gim ngaihsut leh gimhuai hi lel hi. Leitung a nuam omlo a, a haksa mun deuh zong om tuan lo hi. I omna peuhmah a nuam hi khin lel hi (Pasian tawh om peuh leng).

Tua manin i omna Pasian hong gawtna, hong thuhilhna hi ciin tuat lo in hong koihna mun hi zaw ciin ngaihsun in, i omna ciat ah Pasian mah HAIPIH lailai den leeng hoih kasa hi.

"Tua ahih ciangin Lai Siangtho sungah, “A kisathei mite, Topa' hang bekin kisathei ta hen,” ci-in na kigelh hi." (1 Korin 1: 31).


Hau Za Cin
Phuitong Liim