KINIAMKHAITNA THAMAN

Lai Siangtho simdingkongteel;

Banghanghiam cihleh nangmah in miniamte na honkhia a,a hih hangin mi kiphasakte na niamsak hi. ( Late 18:27 )

Kiniamkhiat- a Topa zahtakna thamanin hauhna,minthan' na leh khansauna ahi hi. (Pau 22:4 )

Amah in lungsim kiniamkhiat mite a man-ah paipihin,azia atong ahilh hi. ( pau 25:9 )

Khazih sungah kongit zomi sanggam te aw tu ni-in i biak Topa in kalsim thalakna hunte hongnei sak kik ahih manin Topa tungah lungdam kako masa hi.Hawm 28,29 sungah zong kiniamkhiatna thu a kicingin i genkhin a,ahih hangin tu ni-in kiniamkhiatna thaman a thakin kikhup pih dingin kongteel khia hi.

Late 18:27 sungah hong gen mahbangin Topa in kiphasakna deihhet lo-in a kiphasak mite niamkhiat a,a kiniamkhiat mite honkhia hi.Tu ni-in Topa honkhiatna sungah na lut nop leh na hihna bangbangin kiniamkhiat a,na nuntakleh Topa'n hong honkhia takpi ding hi.
Tua banah 1Kor 1:26-28 sung i et ciangin kiniamkhiatna hangin Pasian teelna kingah hi.Banghanghiam cihleh leitung mite muhna panin mipil kihi lo-in,mi vanglian zong ki hi tuan lo a,mi thupi zong ki hi tua lo hi. Ahih hangin i biak Topa in mipil te a maizumsak dingin mi haite hongteel a,mi thahatte amaizumsak dingin mi tha nemte a hong teel hi.Tua banah leitung mite simmawh a niamte,bangmahin a ngaihsut loh mite tuni-in Topa hong teel a hihmanin Topa vangliat na a kimuhtheih na dingin mite simmawh mite,Pasian teelna kingahin (pau 3:34) a mahin maipha hong pia lai hi. Amen.

Jeim 4:6 sungah Lai Siangtho in Pasian in akihisakte nial a,a kiniamkhiatte a hehpih hi, a cihmah bangin Pasian hehpihna ki ngahin,Topa' n sangkoih na kingah hi.(Job 4:11)( Mat 23:12) sungah hongcih mahbangin i biak Topa in mi lian in hong bawl lai hi.Tua ahih manin kongit sanggamte aw kiniamkhiatna in bangzahin manpha hiam?Kumpi vangliante atokhom panunkhia suk a,mi neute,mi lianin a bawl hi.Lk 1:52-1 sungah hong gen mahbangin i biak Topa in kumpite tawh hong deidan lo a,hong lam sang Topa min i phat hi.

Tua banah Isai 57:15 sung i et ciangin i bia Topa pen asangna mun ah om a,a siangtho a hih manin akiniamkhiat mite lungsim leh a kisik mite lungsim a thakhausak kik dingin kisik na leh kiniamkhiatna lungsim aneite tawh zong ka om khawm hi hong ci-in tu ni-in Topa kiangah kisik kik a,a kiniamkhiat mite khempeuh Topa in hong ompih ahih manin Topa tungah lungdam ka ko kik hi.

Pau 15:33 sungah Topa zahtakna in pilna mah hipah a,kiniamkhiatna in pahtawina hong ngah sak hi. Pau 18:12 sungah zong a kiniamkhiate in zahtakna ngah uh a,akihisakte pen siatding amanawh hita hi cih hong gen mahbangin sanggam aw tu ni-in na kihisak a,na kiniamkhiat nop kei leh siat na ding amanawh na hihlam kongphawk sak nuam lai hi.

Tua ahih manin kongit lawmte aw Topa in kiniamkhiat ding hongdeih a,na kiniamkhiat leh Pasian deih mi,Pasian it mi na hi hi.Tua ahih manin kiniamkhiatna thamanin hauhna,minthan' na,leh khansau na ahih manin na hauhnop leh,mi,mithang na suah nop leh,nakhan a sau nop leh Topa zahtak a,kiniamkhiat leci'n Topa honglamto ding hi.Tua bektham loh inTopa kiangah kiniamkhiatin thu ngen a,i hoihloh nate pan kiheikik leng, amah in i khelh nate hongmai sak bek lo-in i leitang mahmah thupha hongpia in,hong hoih sak ding hi sanggam.( 2Khang 7:14 ).kongit zomite aw Topa tungah na kiniamkhiat leh Topa in a man-ah hongpaipih dinga,na zia,na tong hong hilh ding ahih manin na nuntakna ah a kiniamkhiat zo nanglehkei, i suah theih nadingin i biak Topa in thupha hong pia tahen!Amen.

Kiniamkhiatna thaman...... 1, Hotkhiatna kingah
2,Pasian teelna kingah
3,Pasian maipha kingah
4,Pasian hehpihna kingah
5,Pasian sangkoihna kingah
6,Pasian liatbawlna kingah
7,Pasian tawh om khawpna kingah
8,Pahtawina kingah
9,Zahtakna kingah
10,Hauhna,minthan' na,khansauna kingah
11,Pasian in leitang hoihsakna kingah
12,Pasian in i zia,itong hilhna kingah
ahih manin kiniamkhiatna thaman in tu leh atawntungin zomite tung,nanglehkei tungah hongom tawntungta hen la,akiniamkhiat zo tawntungdingin Thupha hongpia dentahen!Amen.

Lai at Pa Khaipa Hz