"Pham Takpi Mai Maw?"

Mon Apr 30, 2007
Zomite ki itna:

Hih la Pham Takpi Mai Maw? cih Lengtong Pauno in a sak pen i ngaih ciangin lawmta ki itna la hi cih i thei pah hi. Lawmta kiciam in innsung haksatna a nop tuam khak leh ciin lametna leh hanciamna tawh innlum nu leh pa omna nusia in gamdangah sum leh pai zongin kalsuan uh a, tua a khualzinna vuah a lawmpa khat in lamet loh laitak in sihsan hi cih kithei hi. A lawmpa in a nusiat tak ciangin a luanghawm na tawm a nu leh pa a unau te leh lawm le gual muh theih dingin kipua lo a, a zinna gam ah kivui cip ta hi cih kithei hi. Khasiat huai hi. Dah huai hi. A nu in bang a ngaihsun tam. A pa in bang a ngaihsun tam.

A tapa it mahmah a gilsung ah kha kua gimpih tawlpih in a paai khit ciang hamsi a leitung khuavak mu dingin hong suak khia a, khuavot huihvot lak ah hungin, cisa luna a thuak khak ding lau in puanlum a neih sunsun tawh tuam in a khangual neih bang nikten puansilha guat zawh loh hang a hih theih zah in a nu leh pa in hanciam na pi, a tha a nek theih tak ciang, a lametna uh a mau tha dawn dinga lungmuang taka a om lai un a it mahmah a tapa in a luang nunung beek mulo a a phamsan mai pen ngaihsut hamsa ding hi.

A veng leh pam a bat khak leh ci a lametna mitmul sau lianga a khuamual lumsuang tung pana khuadakdak a tunnu mittui ah khitui a kang thei tam. Nuntakna pen a kilawm mahmah hangin sihna mulkim huai lua hi mawk.

A la en leeng (a phuak kigelh lo a, ka thei tuan kei hi):

Pham Takpi Mai Maw!

Phuak: ........
Sa: Lengtong Pauno

Lungtuak nunnuam a lenlai nite'n mual hong khupsan,
Vaimang sesum ngaiin singkhua singgam vangla ah,
Tun zua ciin tuai leh kholhpih gual tawh gi bang khen in,
Taang na lungtup sesum lambang na zong maw.

Sakkik:
Tu'n ah koi ah vabang nong lensan a, nong heisan hiam?
Tun zua ciin tuai leh na kholhpih gual ten, hong zong zong ung,
Sakduang mel ah mu lo, pham takpi mai maw?
*(Pham takpi takpi maw, mangpha maw mangpha)

Vangkhua khaubang nong ciah ding ci zinbang hong muak ung,
Na lawmgual nih thum te'n naubang kap luankhi hong nul e.
Na nua ciang tun zua ciin tuai leh na kholhpih gualte'n,
Vaibang nong tung ding sa, Hai bang hong ngakngak.

Pianna vangkhua ah nunnuam nga bang i len khop lai,
Lungtuak nuihciam lel in zaideih naubang i awih khop lai,
Sul hong hei nawnlo ding, mu bang ngai siing i kholh lai ni,
Na kholhpih lawmgual ten lungin ngilh kei nu'ng.

Lawm aw na nua cianga na zua pa leh na tuai nih thum ten,
Na heina phung mun muang tung Sianmang anglai panin,
Sim leitung tang bang dam lungtuak gua bang hing khawm ding,
Na tunnu mel na muh ciang thu hong ngetsak un.

* a tawpna ah a hialna.

Hih la a phuakpa in a lawmte khat a si a phuah hi ding hi. A si cih a zak uh ciang a lawmte in a luang hawm mulo in a zinna gam ah kivui a. A khualzinpih a lawmte inn a ciah ciang inn lam ah a om a lawmte mah in a sipa nu leh pa leh sanggam te tawh khuamual ah na dawn in, ahi zongin a tapa uh, a lawmpa uh khat hong kim nawnlo in, a lawmte khitui tawh hong tung uh hi. A dawng nunung pen i et kik leh hih la akiphuah ciang misipa nu in zong nusia kik zo ta hi cih kimu hi.

A nu leh pa lunglen khuangaihna teng gen masa in, na tun leh zua te in Hai bang nong tung ding sa in hong ngakngak ahi ci hi. Tua ciang a nuai ah a khangual vua akikholhna te uh, la sa khawma gual nuam a a lenlai te uh phawkkik in, tua banga kikholh nawnloh ding uh a ngaihsut ciang a lungleng in, 'na lawmgual te in hong phawk den nung' na ci kik hi. Khasiat huai hi.

A tapa in gamdang pan a nusiat zawh ciang a nu in inn pan nusia a, tua ciang a sanggam te leh a pa bek inn ah omta in, hih la phuakpa (a lawmpa khat hi ding) in tua zong a hel khawm hi.

Ka phawk thu pawlkhat om:

1. Zomi te pen khual khua hi in, gamsung hi in, inn ah hi ta leh lawm leh gual a ngai, a it, a kitaisanlo, a kisihpih, a kikhoi, a ki khual mahmah te hi hang. Tua hangin Zomi nuntak nuam mahmah hi.

2. I lawm it mahmah te in hong nusiat ciang i kikholhna khempeuh i mitkha ah hong kilang in, i lungleng in i lungsim ah la kisasa hi mawk hi.

3. Mundang ah si in luangpham kul in om kha leeng luang kipham in a van a na khat peuh nu leh pa muh dingin a kipuakte hi hang.

A khasiat huai dang khat hi in ka up pen:

Tu laitak a tangval tengteng gampua kidenna, inn ah numei naupang bek om, papi leh putek piteek teng a om likliak pen mulkim huai, khasiat huai leh kilawm sa ing. Khuasungah nungak tangval ki hel, kizui, kikhawl muh ding omlo ding cih mawk pen dah huai, khasiat huai a, mulkim huai veve ding khat hi.

Zogam ah i ciahkik diam. Zolei i zuun kik diam.
A ki it Zomi, a kikah Zomi, a kikhasiat Zomi, a kidahpih Zomi,....... .
Hau Za Cin
Phuitong Liim

PS: Kua cih ka theih loh hang hih sunga hong nusia i sanggampa innkuanpihte ka thuakpih a, a dah a kapte khempeuh tungah lungnop khamuanna hong tung ta hen. Hih la a phuak a lawmpa zong Topa in khamuanna leh thuaksiamna hong piaksak hen. (HZC/PhuitongLiim) .
============ ======