Sia Lianpi, HK in hong gen bangin Christian biakna zui sungah LS sungah a kigen lo vai tampi thupisak, thu tampi ki behlap in biakna paidan kibawl takpi hi. Tuate in hun tampi ah kinawngkaina hong neisak a, biak Pasian kibang napi kikholh mawhna na ngawn a piangsak hi. Tua manin Pawlpi tuamtuam ah kikhen in, biakinn tuamtuam ah thungetna hun i zang hi.
Christmas cih pen LS sungah om hetlo mah hi. Ahi zongin a piangpa pianni phawkna hi a, a lim ciinna hi. Topa ankuang tawh a kibang hi. A lim ciinna leh tuabang hun phawkna hi lel hi. Jesuh sihni Good Friday cih a om loh hangin si hi cih om hi. Thokik hi cih om leuleu ahih manin a thawhkikna phawkna hi leuleu hi. A hun maanmaan in zat ding cih thupiak om tuanlo a, Amah phawk ding a thupi pen hi zaw hi.
Hih pen minautang theihsiam (layman understanding) dan ahi hi. Theologian te in bang a ci ngaihsut tam thei kei ing.
Jesu pen Pasian tapa hi ciin i thei hi. Pasian tapa hi ciin zong i saang a, i um a, tua a um khempeuh nungzuite, Christ nungzuite, ahih kei leh Christian kici hi. Jesu mihing bangin hong piangin, mihing bangin khangto a, mihing bangin si a, sihna pan zong thokik in, vantungah kahto in hong paikik mateng hong nusiat Kha Siangtho tawh eitawh hong omkhawm hi.
Tua a pianni phawkna pen - Christmas ciin i muak a, a pianni lianlian hi cih a kigen theih loh hangin a pianna lungdamna hizaw hi. Eite mawhna pan hong gum dinga a sihni om a, tua sihni i theih loh hangin a sihna phawkna leh thuakpihna leh lungdamna hi a, mawhsutna ding a sisan manpha it zolo a a buak khiat na phawkna hi.
Thokik in vantungah kahto in hong paikik ding hi cih i theih man in, a thawhkikna phawkna pen Thawhkik pawi kici a, lungdam takin sihna pan gualzo a thoto pa phawkna in phatna hun a kizang hi. A thawhkikni sese in kizang cihna zong hi khin pah tuanlo hi.
Tua bangin Lai Siangtho sungah kigelh kei ciin a kigelh lo khempeuh pampaih sawm teitei leeng a LS mahmah zong a kigelh hun, a gelhpa gelh lai leh Pasian in a gelhsak lai hunte kiciamteh detdet khin tuanlo a, hih LS mahmah zong kisaang theilo ding hi. Jesu hong pianni teekteek kitheilo ahih manin amah pen piang taktak maw piangtaktak lo cih court ah kidelh leh evidence omlo hi leuleu ahih manin guallel veve dinga, i biakna a mawkna hi ding hi. Tua bangin a dang zong om lai inteh.
Tua ahih manin ko, a LS sangkah lo te (layman te ka cihna) theihsiam dan ah LS sungah a ki gelhlo tu hun Christian te in i zuih i zat vai leh hun tampi te pen Christian biakna a nawngkai sak ding hilo in, biakna a hatsak zaw ding leh a khangto sak ding vai leh hun te hizaw ciin ka sang hi.
Tua hi kei leh mihing piansak laitak a hun a kum kigelh lo zel, mihing pen koi pan hong piang hi ding cih hi kik??
Tua manin leitung nuntak sungin a hoih i teel siam a, manpha taka i zat theih ding thupi a, a hoihna a hoihlohna ciin saikaak kaak leeng i theih loh hun sungin i nuntakna hong bei ding a, nungta manlo in sihna hanmual lam i zuan ding hi. I pian i dam hun sung luvaai in kizang bei cihna hi lel ding hi. Tua bang a ut te lah kikhaam theih hi kei. Ahi zongin hun pammaih mahmah hi. Hun hoih khatvei kipelh leh cik ciang tua bang hun hoih hong kingah kik ding cih kigen thei nawnlo hi.
Tua manin biakna cian takin i theih nak leh a meetna, a hoihna, a thupina leh a manphatna khempeuh meetpih dingin Pasian in hong phal ahih manin tuibual bangin i bual ding ahi hi. Zat cihtak in i zat mai ding hi.
Tua man in LS ah kigen lo i cih - Trinity, Christmas, Good Friday, Easter, Denominations, Sabbath, etc., etc., etc. thu ah buai dingin ka tuat kei a, hun tampi beisak a nuntak kihaksat bawl gawp liangin buaipih dingin ka tuat kei hi. Ahi zongin a deihna leh a hihna bel teltak a theih sawm ding thupi sa ing.
Hau Za Cin
Phuitong Liim
No comments:
Post a Comment